少年成長今日: 0|主題: 16108

收藏本版

發帖

返回列表

跳至頁

查看: 16675 | 回覆: 2

好家長，壞榜樣！ [複製鏈接]

csir3290

子爵府

積分: 12552

1^#

發表於 21-10-24 11:40 |只看該作者 |倒序瀏覽 |打印

有一種家長其實佢係非常之愛錫自己嘅仔女，有時係愛錫到有啲過份，事事都為仔女操心，事事都照顧到對仔女無微不至，每樣嘢都以仔女為考慮。呢一種家長喺仔女嘅心目中絕對係一個好家長。但係正正就係太愛錫自己嘅仔女，太過以自己嘅仔女為中心，就完全唔考慮他人嘅感受，為咗自己對仔女可以完全無視其他人嘅感受同埋規矩。早個禮拜返學嘅時候大風大雨，又係呢啲家長出沒嘅時候，我阿仔間學校唔係喺正路邊，所以停低架車都仲要行一段距離，但係因為落雨為咗令到自己嘅仔女行少啲，就係要將架車停正喺最近學校嗰點嗰度落車，完全無視後面塞曬車亦都無視其他家長嘅需要連校巴都要不停響安。總之就係自己對仔女斯斯然落車，仲要慢慢湊埋佢哋入去學校先至返出嚟駛走架車。呢個情況唔係間中發生，就算好乜嘢天氣都一樣會有呢啲家長出現。

唔單止呢啲情況，就算喺社交平台都見過有啲人鬧啲家長為咗令到自己啲仔女搭車嘅時候唔使企咁耐，就係要人哋讓個位畀佢坐。唔想自己嘅仔女排隊排咁耐就公然帶住對仔女去去問人哋可唔可以畀佢哋排先，甚至乎公然打尖畀人話嘅時候就叫人讓下自己啲仔女。去公園同人玩，自己嘅仔女同人爭野玩唔排隊，就同人講細路仔係咁嘅樣。好似呢啲咁嘅例子多不勝數，冇錯佢哋喺自己仔女心目中可能真係一個好家長，但係其他人心目中呢啲就係壞榜樣。

呢啲家長教緊自己嘅仔女就係無視規矩，為咗自己咩嘢都可以唔理，完全以自己為中心，美其名就係為自己仔女著想，實際上就貪方便貪小便宜。小朋友喺呢種咁嘅教導之下成長會學到啲咩呢！只係學到為咗自己利益乜嘢都可以唔理，唔怪得知成日都有人講生仔要考牌。做家長除咗要照顧自己嘅仔女之外，亦都要教佢哋乜嘢係守規矩，乜嘢係照顧他人嘅感受呢啲，全部都係要家長自己身教。咁樣教仔女冇錯細個可能係去到佢無微不至，但係大個咗佢要面對呢個社會嘅時候就將會面對好多失敗同埋好難同人相處。呢種「好家長，壞榜樣」嘅教仔女方法真係好常見，但其實到最後受害嘅唔止係父母及其他人，最大受害嘅正正就係自己嘅仔女。所以作為家長除咗時刻要記住成為仔女心目中嘅好家長之外，更加重要係要時刻記住自己要係仔女心目中嘅好榜樣！