少年成長今日: 0|主題: 16031

收藏本版

發帖

返回列表

跳至頁

查看: 13256 | 回覆: 0

諗唔開 [複製鏈接]

csir3290

子爵府

積分: 12119

1^#

發表於 21-11-14 11:09 |只看該作者 |倒序瀏覽 |打印

前幾日阿女放學返嚟講，話上上吓堂突然間全校畀人叫曬去禮堂特別早會，原來佢學校有個高年班嘅女仔自殺，所以要去曬禮堂做輔導。

講開青少年人自殺，唔知點解近呢兩個月真係好似好多咁。冇人會想見到呢啲事情發生，造成青少年人自殺嘅問題當然好複雜，唔係三言兩語就可以講得清楚，但係其實做家長嘅係咪真係冇嘢可以做到呢！我曾經聽我個教書朋友講過，佢見過有啲家長同老師講話驚自己啲仔女會自殺，所以乜嘢都唔可以話佢哋，要盡量就曬佢哋。我個朋友話根本呢啲家長就係揾藉口，走咗去另外一個極端，採取放任政策以為就可以避免問題，但係其實根本就冇能力教或者唔想教，就搵一個藉口俾自己等自己好下台，但其實根本乜嘢作用都冇。

我覺得有陣時啲年青人會選擇自我了結，其中一個好重要嘅原因就係佢哋覺得自己已經再搵唔到出路，搵唔到人幫，如有啲亦都唔習慣搵人幫。針對呢個原因其實父母已經可以做到好多嘢。首先父母有冇教到自己仔女一套樂觀嘅人生觀，呢啲人生觀嘅嘢，雖然可能有部分係性格但係後天亦都好睇父母點樣身教，父母事事都怨天尤人，父母事事都係向負面諗，自自然然仔女亦都會向呢個方向發展。

另外父母願唔願意同仔女溝通呢？正如我剛才講有陣時係由於青少年人搵唔到人幫，亦都搵唔到人傾訴。如果父母事事都係批判，唔懂得去聆聽，咁慢慢仔女就唔會同自己嘅父母去傾，但係偏偏屋企就應該係青少年人最後嘅避風港，如果連呢一個安全網都冇埋，咁就更加容易走向極端。好多時青少年人需要嘅係理解同埋聆聽，但係好多時父母，都慣於去批判而唔習慣只係聆聽同埋支持。有啲家長以為同仔女講叫佢繼續加油或者係同仔女講「你遇到嘅問題其實有其他人比你更慘」等等呢啲嘅說話，就可以令到仔女諗得開，但係正正其實呢啲說話一啲作用都冇，甚至乎仲有啲反作用，因為青少年人去到呢個地步都會覺得自己嘅問題係解決唔到，重點樣加油，重點樣去同人哋比較呢！但係如果父母懂得用理解嘅方式，用支持嘅方式令到仔女覺得搵到一啲嘅安慰，咁反而比起解決到問題更加重要。

再加上其實青少年人走到去自我了結嘅地步，好多時都唔係突然間發生，而係經歷咗一段時間嘅累積。喺呢個過程入面父母有冇敏銳性去察覺問題嘅存在呢！例如仔女突然間成日都唔講嘢，或者成日都苦口苦面，又或者做嘢冇曬動力等等。其實好多好多嘅跡像都可以係有蹟可尋，但係好多時父母都忙於自己嘅工作或者係覺得仔女嘅嘢唔係乜嘢大件事，過一陣間就會冇事而忽視咗問題嘅存在。

總之青少年人自殺嘅問題非常之複雜，但係父母其實亦都唔係無能為力。如果父母平時唔留心，到有問題發生嘅時候先至話點「解仔女乜嘢都唔同自己講」，之後好後悔自己乜嘢都做唔到嘅話。咁我哋就應該自細開始幫仔女建立一個防禦網，提升佢哋嘅抗逆能力，呢啲全部都係父母可以做到嘅嘢，只不過父母有冇留心去做咁解啫！與其發生咗先嚟後悔，不如提早預防先最重要！