少年成長今日: 0|主題: 16019

收藏本版

發帖

返回列表

跳至頁

查看: 17941 | 回覆: 3

溝通之門 [複製鏈接]

csir3290

子爵府

積分: 12060

1^#

發表於 22-1-30 10:48 |只看該作者 |倒序瀏覽 |打印

早一排公司請咗一批後生仔入嚟幫手做一啲初級嘅職位。由於係啲初級職位所以大部分都應該係剛中學畢業冇耐嘅後生仔，其中有一個派咗呢我個部門幫手。呢個細路應該中學畢業就入嚟幫手，所以喺我部門入面最細嗰個就係佢，其實佢做嘢冇乜點，不過就有一般後生仔嘅通病，就係冇乜規矩總係覺得佢好似冇乜禮貌咁。佢入到嚟我部門咁自然我就有責任要教佢。其實都知道同啲後生仔溝通唔可以太過說教，所以一路都係睇住佢等佢一邊做一邊學，但係佢最大嘅問題係唔會主動去問，所以有陣時做錯咗嘢，咁其他同事提醒佢，佢就好似覺得人哋話佢咁。見到佢開始同啲同事嘅關係唔係幾好，我間唔中都會提下佢。但係可能佢都覺得我係老人家，所以可能都我嘅提醒係當耳邊風。其實佢除咗同同事關係麻麻哋之外，其實做嘢真係冇乜點，話畀佢聽點樣可以做番好佢都會跟住做。但係可能真係部門入面其他人嘅年紀都比佢大，工作經驗又畀佢豐富，所謂同呢啲後生仔真係可能有代溝。佢對我可能係上司，所以唔算係好冇禮貌，亦都叫做聽我講，但係亦都唔會好主動同我講啲乜嘢。但係佢同其他同事就真係可以完全冇嘢講。

可能初初入公司佢對我哋又未係好了解，所以大家都add咗大家嘅facebook，本來都冇乜留意佢，大家只係叫做add咗，冇乜嘢特別嘅交流。直至有段時間我見到佢嘅facebook開始有一啲佢平時踩滑板嘅片段post咗上去，我先知佢原來都幾鍾意踩滑板仲踩得幾好，有啲post仲見佢不停咁跌，但係佢最終都冇放棄去練啲新動作。見到呢啲post其實我都欣賞佢嘅毅力，所以多咗畀like佢，試過有次喺公司茶水間見到佢，我只係輕描淡寫咁同佢講咗句話見到佢嘅post覺得佢好犀利，問佢學咗幾耐，佢有啲唔好意思跟住就同我講咗佢踩板嘅經歷。自此每一次佢有新post我都會like，有陣時見啲動作其實有啲危險，我間唔中就會提醒佢小心啲唔好整親。自此我同佢之間就係可能靠踩板多咗個聯繫，大家都多咗說話講。有陣時我會嘗試用踩板作為媒介去提醒佢其實工作都需要好似踩板一樣咁要有恆心，可能喺公司入面冇乜其他人留心到佢踩板嘅能力，所以佢變得多咗嘢同我講。

隔咗大約半年佢就調咗去另外一個部門，其實佢調走咗之後我哋都已經冇乜聯絡，只不過係喺facebook上面互相畀吓like。直至到早幾日食飯嘅時候撞到佢，佢竟然主動走埋嚟同我打招呼仲同我傾偈，佢主動話畀我聽話呢輪踩少咗板，咁我問佢點解啦，佢話因為佢想專心讀書預備考升級試，我同佢講話係啦小心啲踩，千祁唔好到考試嘅時候受傷整親考唔到試就慘，佢仲話佢知道，想好好係公司發展所以而家好畀心機去溫習同預備，正如我之前同佢講只要用返佢踩板嘅決心，佢一定可以有好好嘅發展。

其實同後生仔溝通真係要搵到佢哋嘅興趣，後生仔可能仲係覺得我哋成年人諗法古板同一成不變，又唔了解佢哋嘅需要。但係只要我哋肯主動了解佢哋嘅興趣，唔好好似高高在上咁事事批判，正如呢個後生仔咁，如果我覺得佢踩板嘥時間覺得冇乜作用，甚至乎容易學壞，最終就可能會錯過咗個溝通嘅機會。其實對同事如此，對自己嘅仔女亦都係呢一種態度，家長千祈唔好用高高在上嘅心態，樣樣都睇唔順眼，事事都批判，而係應該嘗試主動投入細路仔嘅興趣，只要呢啲唔係啲乜嘢不良嗜好，其實父母都應該學下去接觸嘗試去了解，咁先至能夠同仔女好好咁溝通。其實要同人溝通先要搵到大家嘅共同話題，尤其是細路仔就更加需要搵到認同感，覺得被父母欣賞，咁大家先至能夠打開溝通之門。