自由講場 今日: 304|主題: 1349629

今年二月用完一間係沙田既月子中心，唔建議去！以下係我個人經歷，我都知道普遍都係大陸人去，但因屋企原因再加上當其時有咗五個月先返嚟香港，選擇月子中心，覺得唔使煩一條龍服務…

一開始我係直接同酒店職員用WhatsApp溝通，但之後我搵到一間叫Fxxxxlxxd嘅公司，我見佢哋兩間小冊子都一樣，問F公司就話有同呢間酒店合作，但係問酒店就話冇同任何月子中心合作…咁最後我係去咗F公司度傾，但係之後又唔係佢哋follow up個喎，酒店嗰邊有個sales同我簽約俾錢，途中有咩有關坐月既問題，佢哋都唔係好答，問佢哋嘅陪月建唔建議沖涼，佢哋答客人自行決定…房間有冇大桶for沖涼，都係要不停咁問佢哋先答下答下咁，我都唔係好知自己同緊咩人溝通，亦都唔會有人關心我既狀況。差唔多去到預產期都冇人聯絡我，係要去到我出聲問，先知道如果我入院要點做，同埋佢哋會點樣安排…之後先有另外一個電話號碼聯絡我，其實都幾混亂，我根本都唔知道我應該要同邊一個電話號碼嘅人溝通…我只係覺得我都prepay左所有錢，如果可以早啲同陪月floor嘅人溝通，都應該唔會好過分吧？其實第一次坐月都一定會有好多嘢想問想知，但係係冇得問，因為問都冇用！

最正係佢哋有個S字頭嘅經理，真係唔係好明點解咁嘅人會有份工，check-in時間係九至五，BB同我要隔一日時間出院，我想餵多幾次人奶先出院，問佢可唔可以遲啲過嚟check-in，佢同我講酒店規矩，我一定要本人嚟check in，佢竟然叫我同醫院請假，乜嘢呀?請乜嘢假呀！佢嘅意思係叫我由醫院搭的士去月子中心做check-in再搭返的士去醫院，之後出院嘅時候，先再搭返的士去月子中心！成個電話過程完全冇聽到我講嘢，仲話自己以前做過醫院喎！咁我話叫先生去得唔得，佢話唔得，我Prepay左六萬蚊，個check-in有冇咁緊要！第二日做都唔得？唔得！說白一點5:00係S經理收工時間！到最後嘈完一輪，第二個電話就話先生可以嚟搞。我唔係要佢哋就我，其實第二個電話我已經同佢講，如果你真係唔俾我遲check-in我會返屋企第二日先過嚟，但我係住離島，我同佢講如果我唔係咁樣都唔會用你哋酒店Service，我嘅要求都只係遲幾個鐘check-in。當其時BB都已經因為發燒入咗加護病房五日，如果可以同BB一齊準時check-in我一定會做，只係覺得你哋月子中心面對咁樣嘅情況咁都唔識變通？仲要同我講嘢嗰個係經理？！？即係喺佢哋眼中check-in係緊要過我餵BB嘅！仲話自己係月子中心！用吓腦都唔會叫一個月嫂咁樣走來走去！之後老公過到去就話好理解我嘅情況知道我情緒唔穩定…其實同S經理講電話之前，我情緒真係好穩定！

陪月質素好參差，頭嗰一個禮拜佢哋人手應該係鬆動啲，我被安排一個好有經驗嘅陪月，個陪月好識做，因為我哋唔係一對一專用陪月，大概係三對一，但係個陪月都會成日入嚟，大概一兩個鐘都會入嚟望吓需唔需要幫手，傾吓計，見我未食，準備補奶粉佢都會即刻主動幫手。之後佢連續幾日放假，換咗一個連BB點抱都唔識嘅陪月，佢同BB沖涼睇到我同老公滴晒汗，係去到第二日我哋要求第二個陪月幫BB沖涼，佢哋先換咗一個好D嘅同BB沖…之後我以為我鍾意個陪月會返嚟啦，換咗另外一個陪月，多口問之前陪月去咗邊，佢唔小心漏口風話：唉…都係佢哋傾唔埋啦…佢冇再講落去，之後我WhatsApp問Management，佢哋就話佢屋企有事喎，雖然無從考究，但係我覺得佢哋講大話囉～之後好明顯feel到佢哋人手唔夠，入住一個禮拜之後基本上佢哋唔會主動入嚟，係嘅都係一兩次，基本上都係自己困係間房自己搞，有問題其實都冇得即刻問，試過有一次陪月搞到bb一半俾返個B我，自己走咗去…有一兩次仲要叫到先會幫BB補奶…送餐入房要動用兩個陪月送餐，與其花咁多人力物力送餐，不如睇吓媽媽有冇嘢幫手仲好啦！

至於湊BB嘅知識，頭嗰個禮拜係一個陪月主要跟，咁佢話俾我嘅知識都係一致，到後尾太多唔同嘅陪月，嗰個就話敲奶樽嗰個就話唔好敲奶樽，個個都講啲又講啲咁，有啲好明顯答啲模棱兩可嘅答案，我只可以講呢一個係陪月中心嘅弊病。

至於另外一點大家自行衡量究竟佢哋教得啱唔啱，佢哋有一份記錄表，上面寫住，首二十天每兩小時餵哺母乳一次，每次只需餵哺一邊乳房，不可超過30分鐘。瑪麗醫院姑娘教我同我之後請個陪月都同我講每邊15分鐘，每次都應該要做到兩邊。我個人覺得陪月酒店嘅建議唔啱，谷奶係兩邊一齊谷，點解唔係兩邊都餵？我唔係專業人士呢樣嘢留返大家自己斟酌。

另外一點，呢一間月子中心管理好奇怪，一入到去就要你揀2個時候陪月入嚟餵奶同換片，我想請問有邊一個BB可以set好時間飲奶同換片？我個人覺得呢個規矩係好小家，咩都要計到盡，咁如果餵全人奶嘅媽媽，唔知酒店又會唔會提供返多兩項服務？btw佢哋係冇依着嗰個時間入嚟餵奶或者換片，主要換片係我自己，佢哋只係會準時入嚟幫BB沖涼。另外其中一個陪月同我透露，佢哋陪月本身係返八個鐘，但之後改制要做12個鐘，佢話好多陪月都選擇唔做走人，我嗰一刻心諗，咁樣嘅管理最後留得低嘅陪月質素會係點？

仲有酒店同月子中心好似係完全唔關事咁，佢哋堅持只係出一張房咭，爸爸係可以留宿，咁但係每次佢要上嚟我係要落去接佢，佢哋話可以叫樓下職員幫佢撳life上嚟，但係樓下酒店職員係唔會幫手，叫我哋叫月子中心職員自己搞…所以每次我係要叫佢哋入嚟睇住BB，我自己走落去…但佢哋又唔係即刻入到嚟…對於訪客都係一樣…

試過幾晚半夜三間樓上樓下唔知邊間房開party，成晚唱卡拉OK…打去樓下反映，但係情況冇改善… 窗台位漏風兼漏水，我入去住嘅時候正值係香港最凍嗰幾日，BB沖涼係feel到有風滲入房…

到最後，因為我冇打針，佢哋要我走，我覺得佢完全唔當我係客人，佢哋Office喺同一層，佢哋係唔會走過來同我解釋情況就咁send message同我講叫我走！佢哋唔會幫你諗方法，好似機械人咁不停重複幾句說話，不停話理解我喎～退款講到明係未入住嘅日子會俾返，計數計咗三次都錯，頭兩次計少…我只可以講我好好彩比佢哋迫走之後，搵到個好嘅陪月。

如果你正考慮緊入唔入住，希望呢篇文章俾你作個參考！以我所知佢哋已經將價錢調整到去差唔多九萬蚊，我真係覺得一啲都唔值！佢哋將自己打造到好高級嘅陪月酒店，我個人完全感受唔到佢哋嘅服務有幾咁高級，如果真係地方問題寧願book Service apartment再請陪月仲化算！