想生BB 今日: 0 | 主題: 109574

積分: 443

1^#

發表於 21-12-11 14:07 |只看該作者 |倒序瀏覽 |打印

本帖最後由 Deedeesmom 於 22-4-17 11:43 編輯

(PART ONE)

我同先生努力試了一年半，都係無聲氣，係朋友介紹之下睇DR TAY，感恩一次就陀上BB，現在陀5個月，慢慢整理分享，希望幫到大家。呢次純屬個人分享，睇醫生要人夾人緣，再好嘅醫生都唔可以包生仔，過程中自己工作心態、生活習慣、飲食習慣都有好大改變，同埋無睇過其他做IVF嘅醫生，無從比較，特此聲明，哈哈。

我工作關係成日都好緊張。舊年（2020年）9月第一次見DR TAY，個時已經36歲尾，無避孕10個月左右。第一次見DR TAY 覺得呢個醫生講野好客觀，目標為本，就係要幫你有BB，夠簡單直接，我同老公都覺得佢幾啱傾。 DR TAY安排照輸卵管，驗AMH FSH等幾項，結果正常，老公JJ都正常。第二次見醫生時佢開排卵藥比我，叫我地返屋企買排卵試紙做功課3個月，中左唔使返黎，上網睇番因為DR TAY唔接自然懷孕CASE，佢想用多D時間幫不育嘅夫婦。

試左一個月，但係原來我身體唔啱食排卵藥，因為我食完之後，嗰個月嘅月經會突然間變得好少，代表排卵藥令到子宮內膜變薄得好緊要，子宮內膜薄，受精卵就着床唔到，醫生話好少人有呢個情況。咁唯有又返去見DR TAY，醫生就好直接話，IVF啦唔好浪費時間，解釋咩係IVF（打針、抽卵過程、大概費用等等），同埋我CASE唔啱IUI，因為老公JJ正常，醫生話做IUI根本係浪費錢。聽完個下個心係有受到衝擊嘅，覺得自己「不孕」、「要做試管嬰兒」好難接受，個心都係想自己再認真試下先，於是2020年11月開始，我認真用排卵試紙（用筆記簿記低）、睇專門睇生仔嘅中醫，仲有每個月臨排卵前去其他婦產科醫生度照卵子，睇卵子形狀同搵最佳行房時間（我好認真架，哈哈）。我過去5年一直都有做運動習慣（瑜伽、GYM踩太空漫步機，爆汗嘅，一個禮拜加埋3-4次），呢幾個月就跑步+太空漫步，去照卵子發現越來越圓同接近2x2cm（對比一開始卵子好扁平嘅，上網睇接近2×2嘅先係最有可能受孕嘅卵子，扁平嘅就難好多），但係個肚由11月到5月一直都無消息。不過，呢半年嘅努力比我身體有更好基礎去應付後面嘅抽卵同放胎，依家回想起來都好感恩呢段唔中嘅日子。

好啦，今年（2021年）6月下定決心返去DR TAY度，畢竟都成37歲半，再等就38了。醫生第一句就話我睇中醫、監測卵子係無用嘅、根本係浪費錢同時間，語氣非常直接，好難聽，我當堂難受到喊咗出嚟，因為個心覺得好迷惘同埋難受，但係唔知點解，我竟然冇比醫生咁直接嘅說話激走，返屋企同老公決定，下個周期一開始就打電話比診所，開波打針啦。始終都37歲半啦，唔想再浪費時間，目標為本該做就做。

下個CYCLE第一日我就打電話去診所，見醫生同抽血（唔記得驗咩），隔一日姑娘打黎講驗血結果顯示，今個CYCLE可以開始，再返去見DR TAY，醫生會比一堆針筒、一個針槍，同埋藥水俾你拎返屋企，打針大概打咗10日多D，人人份量、日數都唔一樣，呢度我就唔詳細講，反正醫生一定會講得好清楚。打針係我自己用醫生比嘅針槍打（按醫生指示load好藥水，放支針入針槍），唔驚嘅，快到無輪，啪一聲就打完。我自己覺得打針唔辛苦，冇話好慘嗰種感覺，可能係我老公次次都係身邊陪住我打，打到最後嗰幾日有朝頭早嘅一針，我老公都會校鬧鐘起身陪我打，幫我壯膽，檢查分量啱唔啱，收拾針筒棉花，我都有同佢講，好多謝佢咁支持，上帝造小孩，就算係試管嬰兒，都真係要兩個人一齊嘅付出，齊心先事成。

打針呢10幾日期間，大概兩至三日就要返去診所見醫生，係一定要返嘅，因為醫生幫你MINITOR住卵子嘅SIZE，我好明顯就係左邊卵巢好過右邊好多，右邊有D慢，所以最後好似打多咗一日定兩日針，等埋右邊卵巢嘅卵子生長，DR TAY都俾咗好多鼓勵，係咁叫我唔使擔心，多卵唔代表質量好，有好多人卵子唔多，但係質量好好，所有野要抽咗出嚟先知。呢一段期間，我有自己敷暖宮貼（淘寶），同埋浸腳，同埋繼續運動（聽醫生建議，我無跑步、但有踩太空漫步機）。自己feel到個肚有兩抽乒乓波咁，哈哈。同埋好感恩呢段期間工作壓力都算可以，心情冇咩受到工作壓力影響，呢個都好重要。

0 0 0

私人傳訊

積分: 1796

2^#

發表於 21-12-11 15:00 |只看該作者

Deedeesmom 發表於 21-12-11 14:07
(PART ONE)

我同先生努力試了一年半，都係無聲氣，係朋友介紹之下睇DR TAY，感恩一次就陀上BB，現在陀5個 ...

多謝分享

請問ivf 價錢大概多少同有無話點解唔好跑步嘅？放胎後有無敷暖宮貼，浸腳，運動等？

私人傳訊

積分: 1796

3^#

發表於 21-12-11 15:00 |只看該作者

Deedeesmom 發表於 21-12-11 14:07
(PART ONE)

我同先生努力試了一年半，都係無聲氣，係朋友介紹之下睇DR TAY，感恩一次就陀上BB，現在陀5個 ...

多謝分享

請問ivf 價錢大概多少同有無話點解唔好跑步嘅？放胎後有無敷暖宮貼，浸腳，運動等？

私人傳訊

積分: 443

4^#

發表於 21-12-11 16:13 |只看該作者

本帖最後由 Deedeesmom 於 22-1-7 22:52 編輯

抽一次卵加放一次胎，針藥，化驗加懷孕頭三個月複診，大約17萬多D（當中95000左右係養和醫院LAB、手術室費，唔係Dr Tay收的）。

平時可以跑步（做運動真係對身體好好），但打針谷卵後，卵巢會有一大抽卵，醫生話呢個時候仲跑步的話，怕會扭到卵巢，所以最好唔好。

放胎後無敷暖宮貼（我上網睇因為高溫會導致胚胎畸型），有晚晚清水浸腳20分鐘。個排奧運，睇電視分散注意力，雖然個心都好緊張。同埋我有祈禱。

私人傳訊

積分: 1796

5^#

發表於 21-12-11 17:09 |只看該作者

Deedeesmom 發表於 21-12-11 16:13
抽一次卵加放一次胎，針藥，化驗加懷孕頭三個月複診，大約17萬多D（當中95000左右係養和醫院LAB、手術室費 ...

恭喜你雖然要ivf 但一次就成功
我最近自然懷孕但可惜空心胎準備吸宮
我都準備緊黎緊做多啲運動食supplements 浸腳希望可以成功

私人傳訊

積分: 443

6^#

發表於 21-12-11 22:53 |只看該作者

回覆 loveislove 的帖子

Very sorry to hear that, 祝福你快D休息好，加油加油，個人覺得暖宮、運動、心情唔好太緊張都好有幫助，希望BB快D健康平安咁黎到。

私人傳訊

luckykiki

積分: 1261

7^#

發表於 21-12-13 20:08 |只看該作者

回覆 Deedeesmom 的帖子

謝謝你分享！希望我也一次中啦！我也打算睇Dr Tay! 仍十五十六中，因為價錢也不平，你給我一支強心針！👍👍

私人傳訊

Isla421

積分: 114

8^#

發表於 21-12-16 22:04 |只看該作者

可唔可以pm傾？
我黎緊會搵Dr Tay初診(emoji)(emoji)(emoji)

私人傳訊

積分: 443

9^#

發表於 21-12-17 16:50 |只看該作者

可以呀，你pm我啦

私人傳訊

積分: 443

10^#

發表於 21-12-30 13:40 |只看該作者

本帖最後由 Deedeesmom 於 21-12-30 13:44 編輯

(PART TWO)

打咗15日針之後，抽卵手術安排左係禮拜日（本來係禮拜六，但DR TAY話等多一日，等細D嘅卵長多一日先），本來以為禮拜日肯定要貴D啦，但原來DR TAY都無額外收費，個刻其實我覺得呢個醫生真係黎幫你嘅，唔係淨係搵錢嘅。養和醫院禮拜日好似就有少許額外收費，幾千蚊咁。

個日朝早8點就空腹到醫院報到，手術9點開始。手術期間我老公就去留JJ。全身麻醉其實我覺得無咩嘢，大概11點幾個人醒返，DR TAY話最後抽到16粒（俾我自己心裏面估計嘅多，感謝上帝），交帶返左屋企有咩要注意，包括要高蛋白飲食黎舒緩抽卵後不適，例如食多D肉/雞蛋/魚/蝦，然後1點就出院了，係肚漲漲，無咩其他唔舒服。養和會係DAY 2，3，5都打比我，同我地講返胚胎生長情況，我唔敢聽電話，怕有壞消息自己難過，所以我叫養和直接打比我老公。出院後我哋去咗屋企樓下嗰間酒樓飲茶，食飽先至返屋企。

抽卵後所有滴雞精，浸腳，熱敷子宮，運動都停晒，連埋一日公眾假期，我係屋企休息左3日先返工（禮拜日抽，禮拜四返工）。我個肚仍然都係脹脹咁，但係我覺得最辛苦係要突然食好多肉@@（高蛋白飲食）。出院後大概一個禮拜返去診所見DR TAY, 我老公問醫生飲蛋白粉，人哋健身用嗰啲，得唔得，醫生話都得，咁就一天都光晒，我淨係飲蛋白粉就得啦，唔使食肉食到個人勁飽。蛋白粉我一次一湯匙，放入牛奶度飲，每日一次，但建議大家飲之前都係問吓醫生先，穩陣D無錯。

私人傳訊

claudia99103

積分: 1737

11^#

發表於 21-12-30 14:26 |只看該作者

我聽日都要開始我嘅療程，想上黎論壇睇下姐妹打下氣，因為自己本身未做過手術而且又好怕打針，心情都好複雜又啲緊張又有啲驚。睇完你嘅文字覺得好感動，覺得我同你嘅心路歷程好相似。雖然我地唔係穩同一個醫生，但係希望我地都有同樣嘅好結果。

私人傳訊

積分: 443

12^#

發表於 21-12-30 14:42 |只看該作者

本帖最後由 Deedeesmom 於 21-12-30 14:47 編輯

回覆 claudia99103 的帖子

祝福妳，幫妳祈禱，希望一切順順利利！

私人傳訊

積分: 443

13^#

發表於 21-12-30 15:55 |只看該作者

本帖最後由 Deedeesmom 於 22-1-7 22:55 編輯

(PART THREE)

DR TAY話抽完卵唔會即刻放胎，會隔一個CYCLE先放，因為想個PATIENT休息下。

我抽完卵之後大概7日就黎月經，黎完呢次，要再黎一次月經先放。兩次月經之間我主動提出照下宮腔鏡，照下子宮入面有無息肉咁，其實等於照下胚胎住嘅個間房裡面有無奇怪嘢，DR TAY係法國醫院幫我照，要訓一晚醫院，全身麻醉，價錢$36K all in（我保險包晒）。宮腔鏡結果又係一切正常。我之後有熱敷下肚，飲滴雞精，繼續做下運動（普通運動，無好劇烈嘅），為放胎做準備。

放胎之前幾日都要返幾次診所照陰超，要子宮內膜有某個厚度先可以放（我唔記得咗詳細數字，費事係度講錯），如果唔係，就要等下一個CYCLE。日日熱敷子宮之後，子宮內膜果然好靚。當接近排卵日，DR TAY叫我去屈臣氏買排卵試紙自己返屋企測，測到有深紫色就記低日期同時間講比醫生知。

我係放DAY 5嘅胚胎1個（我好想放兩個架，但醫生話以佢經驗，放一個同放兩個嘅成功率差唔多，陀雙胞胎複雜好多，更加有早產嘅風險，所以佢而家只係會放一個）。個日12點到養和醫院報到，1點放胎，可以飽肚，因為唔會麻醉，係清醒嘅狀態下邊放胎嘅。放之前要飲三杯水，我就係低估左呢三杯水，飲得好快，搞到放胎之後突然急尿急到爆炸。後尾上網睇返，要慢慢飲，先會慢慢急，你飲得越快就急得越快，真係人都癲。

放胎嘅時候，DR TAY好warm咁講「希望你鍾意佢，佢又鍾意你」，我覺得佢一直都係呢個style，講野好FAIR，好實在，但心裡面係好祝福妳成功嘅。佢仲問我「你朋友個仔依家幾大呀？」，因為我朋友結左婚5年都無，兩年前搵DR TAY做咗個手術移除朱古力瘤，手術後馬上就自然懷孕有咗BB，我幾個月前有同DR TAY提起過呢個朋友，點知佢都記得，喺放胎嘅時候提醒返我，令到我有一個美好嘅願景，我好感激醫生的心思同善意，個心覺得好溫暖。

放胎後，DR TAY話子宮頸已經完全閉合，完全唔使擔心個胎會sir番出嚟。由於我急尿急到爆炸，上床瞓咗15分鐘，就忍唔住去咗廁所，心想今次GG了，好驚自己會屙咗個胎出嚟。之後再上床瞓到四點左右，老公就來接我出院。我地去左附近食雲吞麵，再搭的士返屋企，上車後我同司機講，我岩岩做完個小手術，叫佢渣定D，但點知架車避震勁差，搞到我都好擔心。

返到屋企，第一日梗係瞓喺度唔敢郁啦，訓到腰都酸埋。但係醫生話記得要行街食飯，瞓喺度唔郁令到血液運行得差，對個子宮環境更加唔好，所以頭兩三日我喺屋企都係瞓吓坐吓又行吓，每日晚上都有清水浸腳15分鐘，唔係用好熱嘅水，個人覺得溫暖就得啦。第四日有出街食飯，第五日去咗剪頭髮添。我禮拜四放胎，休息到禮拜二。禮拜三返工。

另外，記得放胎之後唔好熱敷子宮，因為高溫會令到胚胎畸形架。我有照飲滴雞精，無運動。

養和嘅姑娘話，放咗胎之後，就要當自己十分之有機會懷孕咁對待飲食習慣，寒涼野，白蘿蔔、白菜呢啲唔好食啦，瓜湯菜湯一律唔飲，香蕉木瓜唔食得。我就飲桑寄生蓮子茶（上網睇安胎好，叫阿媽煲或去鴻福堂買）， Dr Tay會比一堆藥你返去食藥同埋塞藥，同埋俾藥水你，到第8日要打一針安胎針，之後第16日又打一支，自己喺屋企用針槍打。到第21日開獎，醫生話唔好提早自己偷偷地驗，提早驗係唔准嘅。
我其實係冇任何懷孕嘅徵兆，啲人話有腰痛，子宮痛，着床痛，我咩都冇，本來覺得唉今次都無得架啦。係有一晚半夜凍到醒咗，可能就係呢個時候着床？真係唔知。不過坦白講其實都好緊張㗎，個心日日都1516，我唯有不斷祈禱，希望上帝帶領，子女係耶和華所賜嘅產業，成功與否，呢一切都係上帝嘅意思，我心裡面就係記住呢一點，十分感恩上帝的恩典夠用。

分享到呢度結束，誠心祝福各位準媽媽順順利利，心想事成。亦希望我肚裡面嘅BB乖乖地，健康平安咁出黎，期待見面時。

私人傳訊

積分: 1796

14^#

發表於 21-12-30 19:48 |只看該作者

多謝你分享希望你生產順利！睇完覺得就算做ivf 事前準備/對醫生既信任都好緊要！

私人傳訊

積分: 443

15^#

發表於 21-12-31 10:29 |只看該作者

回覆 loveislove 的帖子

多謝多謝！

私人傳訊

yuyu09

別墅

積分: 720

16^#

發表於 22-1-3 14:54 |只看該作者

claudia99103 發表於 21-12-30 14:26
我聽日都要開始我嘅療程，想上黎論壇睇下姐妹打下氣，因為自己本身未做過手術而且又好怕打針，心情都好複雜 ...

我而家都進行療程中今日打左第9日針打埋聽日到返去復診醫生話如無意外星期五抽卵大家加油(emoji)

私人傳訊

積分: 443

17^#

發表於 22-1-13 20:40 |只看該作者

本帖最後由 Deedeesmom 於 22-1-14 10:10 編輯

回覆 yuyu09 的帖子

加油！搵出開心嘅電視劇煲下，幫助分散注意力，有可以放鬆心情，我嗰時睇大叔的愛，笑到痴咗線。。。

私人傳訊

積分: 443

18^#

發表於 22-4-16 06:46 |只看該作者

本帖最後由 Deedeesmom 於 22-4-29 12:15 編輯

非常感恩BB已經係四月順利出世，我地一家人都非常感激Dr Tay, 佢係我地一家的恩人。我好感激佢當初叫我哋快啲IVF唔好嘥時間，佢嘅專業判斷令我地慳返好多錢同埋時間。產後少不免有D汗爾蒙波動，我出院之後開始喊，但全部都係開心嘅眼淚，回想呢個journey，有幸喺朋友介紹之下認識呢個醫生，得到佢嘅專業幫助同心理上鼓勵，一路由療程、產檢、入院開刀，到抱住自己嘅BB，同BB一齊出院返屋企，一切都咁順利，真係一個奇蹟。

順帶一提，Dr Tay開刀嘅手勢一流，攞左BB出黎之後，佢好細心、花好長時間幫你清理同埋縫傷口，縫到我老公喺手術室瞓着咗！我第二朝已經可以落床，傷口完全唔痛個下好野，係只有子宮收縮嘅痛。勁好笑，dr tay嚟巡房嘅時候，一手撳落個傷口度，話，拿！你睇吓個傷口唔痛㗎，好多人都話個傷口痛，其實邊痛㗎！我都嚇咗一嚇，但真係唔痛個喎，佢真係好嘢，同埋證明佢對自己好有信心。

產後第七八日，惡露已經好少。去拆線，我老公話佢肉眼要好細心先至睇到個傷口。

診所兩位姑娘非常友善，雖然好忙（因為醫生實在太多病人），係我入院生仔前特別私人醒我有咩要帶。返去診所拆線嘅時候，又同姑娘傾咗好耐，兩位姑娘係唔忙嘅時候，其實非常友善，同埋願意分享好多有用資訊，我哋傾到唔願走。

私人傳訊

鼠女神