少年成長今日: 4|主題: 16109

收藏本版

發帖

返回列表

跳至頁

查看: 13648 | 回覆: 0

做爸爸都要學 [複製鏈接]

csir3290

子爵府

積分: 12562

1^#

發表於 22-6-26 10:23 |只看該作者 |倒序瀏覽 |打印

呢輪好鍾意睇嘅電視節目叫做「尋人記2」，有兩集印像比較深刻，第一集就係講到有兩個媽媽參加咗一個叫做「好媽媽課程」學點樣做個好媽媽，好同意入面嗰位媽媽講做媽媽真係要學，因為唔係天生就會識，睇佢同自己個仔嘅相處，就知道佢真係能夠將課程入面嘅嘢學以致用。

但係呢一集畀我印象最深刻嘅除咗係個媽媽好積極咁學點樣同仔女相處之外，其實亦都會令我哋諗下喺社會上面普遍仲係覺得教仔女就係媽媽嘅責任。但係我覺得反而爸爸更應該要去學做好爸爸嘅課程。就算媽媽學咗啲乜嘢返嚟都好，如果冇爸爸嘅合作其實都好難發揮到作用。喺嗰個年代好多時媽媽都係留喺屋企，爸爸就出去返工搵錢。而正正就係因為爸爸返工搵錢，咁佢哋就有一個好好嘅藉口覺得教仔女嘅責任就係喺媽媽身上，所以返咗屋企之後，唔好話主動幫手，只要唔好做豬隊友已經還得神落。但係時而勢易，其實呢一個年代好多媽媽都已經係在職媽媽，但係社會上依然嘅風氣就係覺得教仔女都仲係媽媽嘅責任。到今時今日講起仔女有啲乜嘢問題都依然係媽媽嘅教導有問題。但係偏偏我覺得唔識同仔女相處嘅好多時都係喺爸爸身上。好多爸爸都只係覺得只要有威嚴，只要話事，返到屋企仔女唔聽話就係媽媽有問題。最慘係好多時有問題嘅時候，做爸爸嘅反而唔會識得自己檢討，亦都唔會主動尋求幫助，更加唔好話會用時間去學下點樣教仔女。但係其實睇好多心理學書或者教仔女嘅書入面都講到一個最基本嘅常識，就係爸爸嘅形象喺仔女嘅心目中其實非常之重要，如果爸爸可以懂得喺仔女面前建立一個正面嘅形像，懂得點樣同仔女相處，懂得喺適當嘅時候發揮爸爸嘅威嚴，但係更多嘅時候又要懂得點樣同仔女溝通同埋相處。咁樣仔女嘅發展就會正面好多。但係到今時今日呢年代，社會資訊咁發達風氣咁開放都好，但係社會上畀爸爸學點樣同仔女相處嘅課程少之又少，再加上爸爸會主動尋求幫助嘅就更加少，如果爸爸懂得檢討自己嘅問題已經好好，最慘係大部分嘅爸爸到仔女有事發生嘅時候，都只會係將責任推落媽媽身上，覺得做阿媽嘅唔識教仔。

如果睇番「尋人記2」，另外一集講兩個單親爸爸嘅，就更加感覺到爸爸要照顧細路仔嘅時候所面對嘅問題可能更加多，主動尋求幫助其實好重要，如果唔係嗰兩位單親爸爸懂得主動尋求幫助，懂得去學習點樣同仔女相處，可能就唔會有之後嘅好結果。雖然好欣賞嗰兩位爸爸，但係想深一層其實可能都係因為仔女嘅問題逼到埋身，老婆唔喺身邊，所以先至迫住要去做。正正就係反映出社會上面嘅問題，就係教仔女嘅責任點解大部分都係落喺媽媽身上呢！好多嘢由爸爸去教，根本就會得心應手好多。而且爸爸喺仔女心目中嘅形象亦都會透過爸爸肯主動參與教導入面慢慢建立出嚟。

喺教仔女嘅問題上面如果爸爸媽媽能夠互相合作，能夠用正面嘅方法一齊去處理仔女嘅問題，咁仔女嘅成長必定有更好嘅發展。做爸爸嘅唔好再用咁多藉口同自己講話咩嘢要搵錢，乜嘢工作好攰，又或者返到屋企要休息自己又要娛樂等等。呢啲通通都唔係理由，因為仔女係爸爸都有份嘅！況且而家咁開放嘅社會成日都講男女平等，咁點解教仔女嘅責任好多時又變成好似只係媽媽嘅責任呢？做爸爸嘅應該學下點樣做媽媽嘅神隊友，互相合作，然之後一齊去教好自己嘅仔女。生仔要考牌，好多時畀人嘅感覺都係話緊做媽媽嘅，但係做爸爸嘅其實更加需要去學。就算社會上有幾多機構肯去開辦一啲好爸爸課程都好，都要做爸爸嘅主動覺得有問題，主動肯去承擔同埋去學先至可以。總之教仔女一定唔係淨係媽媽嘅責任，其實爸爸嘅責任一樣咁重要。