想同大家分享下我小產到再成功懷孕既經歷，希望可以勉勵到同路媽媽唔好放棄。
我試左接近一年終於Bingo左，係7wk既時候出現流啡，去私家到照超聲波醫生仲話一切正常，初期流啡都好常見，仲第一次聽到bb既心跳
(估唔到都係最後一次)，醫生開左黃體素安胎，當時好快已經無再流啡。
一心諗住bb已經無事，點知9wk既時候再去私家照醫生話胎囊已經萎縮左，
再聽唔到bb心跳，
只係見到子宮一堆積血，醫生話要儘快安排做手術，否則會有大出血危險。
當時個腦一片空白，只係不斷諗唔係真既，身邊既人全部都可以順利生b，咁不幸既野唔會發生係自己身上，叫醫生可唔可以check清楚啲。
直至第2日到醫院做手術，都仲希望奇蹟會發生，只係醫生睇錯，直至手術完，見住下體流出黎既血，先慢慢接受bb離開已成事實。
雖然一方面仲不斷怪責自己，係咪自己太早講左比其他人聽搞到bb小器，係咪因為自己飲左有薏米既湯令bb無左。
但另一方面我都知道自己要振作，係醫院既時候不斷搵有關小產既資訊，發現原來小產既機率高達20-25%，每4-5個就會有一個小產，有好多同路人都有相同既經歷。
雖然好傷心，但我知道只有自己最能幫到自己，係屋企休息既一個星期，雖然成日忍唔住喊，但我都一直搵唔同既方法幫自己走出陰霾。係生理健康方面，要bb番黎我身邊，一定要調理好身體，所以我好訂埋小月餐，搵埋中醫。
係心靈健康方面，我睇左好多同路人既分享，知到由否定到接受到重新開始都係必經既過程，鼓勵自己每日嘗試喊少啲。係病假既最後1日，整理左bb既超聲波相，幫bb改左個名，整左本相簿，然後同老公將本相簿收起，同bb做最後既告別儀式。
我好幸運，手術後大約個半月，黎左一次正常既月經之後，又成功bingo。有好多資訊話要調理3個月先可以再試，但我問過西醫同中醫都話唔需要，完左惡露就可以即刻試，而且小產後半年內係特別容易成功。我明白之後成功幾多個都取代唔到失去既天使bb，我打呢篇野既時候仲忍唔住喊，但我明白到點樣同呢份傷心共存，呢個經歷亦令我更珍惜現在所擁有既一切，同大家分享完呢篇野我又再釋懷多啲。
第2胎懷孕過程都出現好多驚嚇狀況，但依家bb已經出世，健康成長中，有時間再同大家分享第2胎既懷孕經歷。
發表於 
返回列表
