少年成長今日: 0|主題: 16013

收藏本版

發帖

返回列表

跳至頁

查看: 23580 | 回覆: 0

層次不同 [複製鏈接]

csir3290

子爵府

積分: 12004

1^#

發表於 23-6-4 11:07 |只看該作者 |倒序瀏覽 |打印

上星期一家人喺屋企附近嘅快餐店食飯，食完飯之後我照例都係將枱面嘅餐具執好曬放番去清潔嘅地方然之後先至離開。出咗門口之後阿女忽然同我講話佢而家晏晝同同學一齊出去食飯，有陣時都會去啲快餐店食，食完飯之後得佢一個會自己執好啲嘢然之後交返畀清潔姐姐，其他同學都冇咁做，而且因為佢要將啲餐具放番去清潔姐姐度，所以要啲同學等佢所以佢覺得自己好似有啲怪怪哋咁。同埋咁做嘅時候好似有啲尷尬因為會有啲其他人都會望住佢。咁我問佢如果佢覺得怪，咁佢仲有冇繼續咁做呢？佢話有，咁我就問佢點解佢仲會咁做呢？佢都係同我講番因為佢去到快餐店食飯嘅時候都唔想有張唔乾淨嘅枱，然之後要幫人哋清潔人哋食完嘅嘢，所以佢都覺得唔想下一個人嚟到見到佢檯面佢食完嘅嘢然之後要同佢執，因為食飯嘅時間好多人，啲清潔姐姐根本做唔切。咁我問佢覺得自己做得啱唔啱吖，佢當然係覺得自己做得啱，但係只不過係覺得人哋望佢嘅態度好似有啲怪怪哋咁，有啲唔係好自然。咁我同佢講話我都好明白佢嘅感覺，因為我同自己啲同事出去食晏，有陣時都會喺快餐店其實都會遇到佢同樣嘅情況，所以非常之明白佢嘅感受。但我解釋畀佢聽其實最緊要佢明白自己做緊嘅嘢係啱嘅，因為佢而家做緊嘅嘢係快餐店冇規定嘅做法，而且又冇法律規定一定要咁做，係我哋自己自發做多咗嘅嘢。但係社會就係咁，有啲人只係會選擇遵守法律規定最基本嘅嘢，又或者係覺得如果冇明文規定嘅規矩，而當法律冇規定嘅時候就要睇嗰個人究竟相信啲乜嘢同埋佢自己嘅標準有幾高！有啲人覺得你怪只不過可能係佢哋未達到你呢一個水平去明白你做呢一樣嘢嘅原因。我哋唔可能要求個個都同我哋一樣，但係我哋都要尊重每一個人嘅選擇，更加我哋要知道我哋每一個選擇嘅原因。正如我哋企喺紅燈面前就算係紅燈但條路冇車行過嘅時候，有啲人都會選擇過，有啲人會選擇企喺度就算冇車只要係紅燈都唔過。當我哋企係度等綠燈嘅時候其實一樣會有啲人就咁照過，有時候甚至會望下我哋好似係點解咁傻企咗喺度唔過更甚係覺得我哋左住佢哋。其實道理都係一樣，所以人哋唔做唔緊要，只要自己知道自己點解要咁做背後嘅原因同埋價值觀就可以，同埋我相信同阿女一齊食飯嘅同學可能見得多習慣咗阿女會咁做而且可能慢慢會知道背後嘅原因，可能最終都會跟埋一齊做。我話當人人都做多一步其實最終都可能會令到大家都做多一步。

細路仔有時就會面對呢啲矛盾嘅處境，因為父母或者學校教畀佢哋嘅價值觀，可能會比普遍社會嘅風氣為高，所以有陣時佢哋會覺得跟住咁做可能會有啲怪，甚至乎學校教嘅嘢有陣時家長都未必跟住做，正如我成日都講學校教學生要守規矩要守秩序，但係有陣時就連家長自己都做唔到，只係一句方便，唔好蝕底或者趕時間就抹殺咗細路仔喺學校學嘅價值觀。要隨波逐流好容易，但係要堅持自己嘅價值觀，有陣時就可能會好似我個女咁面對嘅情況會覺得自己好似怪怪地咁。做家長有陣時就係要教細路仔點樣去堅持自己嘅價值觀，最緊要教佢哋明白呢啲價值觀背後嘅原因，細個嘅時候可能只係教佢哋要守啲乜嘢規矩邊啲嘢可以做同邊啲嘢唔可以做，要教最容易就係由家長自己身教，細路仔就會跟住呢一套規矩去做。但係其實除咗新教之外，家長亦都要明白當細路仔長大嘅時候其實亦都要教佢哋呢啲價值觀背後嘅原因，唯有當佢哋真正明白係乜嘢原因推動佢哋佢堅持自己嘅價值觀，佢哋先至會就算喺冇法律規管之下或者冇其他人睇住嘅情況之下都仍然堅持做正確嘅嘢。要提升下一代整體嘅質素其實最重要係睇呢一代嘅家長點樣去教我哋自己嘅下一代！