少年成長今日: 0|主題: 16013

收藏本版

發帖

返回列表

跳至頁

查看: 14587 | 回覆: 1

兄妹 [複製鏈接]

csir3290

子爵府

積分: 12014

1^#

發表於 22-7-3 10:32 |只看該作者 |倒序瀏覽 |打印

我有一個親戚佢有一對仔女，佢對仔女其實關係都唔錯嘅，兩兄妹都會一齊玩。佢兩兄妹同我對仔女都好熟，差不多個個禮拜都會見面，成日都會一齊玩。但係嗰對兄妹個細妹而家成日好鍾意將自己嘅成績呢同其他人比較，呢個都唔係最大問題，最大問題係佢好鍾意攞自己嘅成績同自己阿哥比，尤其是係鍾意將阿哥讀得唔好嘅成績四圍同人講。好似啱啱考完試咁，阿哥有邊科唔合格，阿哥考第幾，阿哥有邊啲功課欠交等，佢都會四圍同人講，搞到個個都知。做阿哥嘅就好尷尬有陣時兩兄妹就係為咗咁樣而嗌交。我同老婆其實都覺得咁樣唔係好應該，但係又真係同佢哋太熟所以又唔係好方便出聲。其實佢哋阿爸阿媽應該要教下個妹唔應該咁做。又或者應該咁講，可能因為阿哥已經讀咗中學，而且亦都入咗一間幾唔錯嘅中學添，可能父母對佢嘅期望亦都相對比較高。所以阿妹可能聽到父母口中間中都會話下阿哥，而且又想吸引父母嘅注意，所以成日有意無意就好似笑緊阿哥啲成績咁。再加上因為阿妹相對比較細嗰啲，所以父母都冇乜點話佢，仲成日叫阿哥要讓下個妹，所以我同老婆都開始見到佢兩兄妹而家相比起細個已經少咗講嘢，唔知係咪為咗唔想同阿妹嗌交，以前食完飯都會同我對仔女一齊玩，而家就變咗多咗時間成日揸住部手機。佢阿爸阿媽都發覺呢個問題，但係只會話佢，仲要當住咁多人面前話，但係話完又算，阿哥都係繼續揸住部手機。

兄弟姊妹之間嘅競爭好多時係天生嘅，因為要爭取父母嘅注意，要爭取資源所以好多時兄弟姊妹之間唔多唔少都有啲競爭。其實點樣令到兄弟姊妹之間嘅呢一種競爭減少，就好睇父母點樣去處理兄弟姊妹之間嘅感情，我成日都話好多時都係因為父母唔為意而間接令到兄弟姊妹之間嘅感情受損。好似呢對兄妹咁，其實阿哥都係好聽話嘅，但係好多時我哋都見到係阿妹比較霸道，但係父母就反而要阿哥讓阿妹。而每次阿妹將阿哥啲成績四圍講嘅時候，其實做父母應該要立即制止唔好再畀佢咁做，應該要教阿妹要尊重呀哥，好明顯阿妹都係因為見到父母好在意阿哥嘅成績差咗，所以阿妹覺得咁樣講就能夠顯示到自己相對比較叻，父母會多啲欣賞佢。所以做父母嘅應該要及早矯正呢啲問題，試想像一下如果父母唔再處理兩兄妹繼續咁樣落去，做阿哥嘅只會越嚟越唔鍾意阿妹，最弊嘅就係令到阿哥覺得父母偏心錫阿妹多啲，到頭來年大家嘅感情都破壞埋。所以千祈唔好好似有啲父母咁覺得兄弟姊妹嘅緣分係天生嘅。其實如果硬係要講兄弟姊妹有冇緣份，其實好多時係父母一手造成的。