少年成長今日: 0|主題: 16018

收藏本版

發帖

返回列表

跳至頁

查看: 14155 | 回覆: 0

志趣相投 [複製鏈接]

csir3290

子爵府

積分: 12051

1^#

發表於 22-7-17 10:42 |只看該作者 |倒序瀏覽 |打印

琴晚又係一如往常嘅星期六晚一樣，全家一齊開包薯片飲罐汽水就一齊坐曬喺度睇套戲，呢個差唔多係我哋每個星期六晚嘅習慣。尋晚套戲佢兩姊弟都特別多嘢講，一路睇就一路同我哋解釋同介紹，套戲係「奇異博士之多元宇宙」，啲人話睇套戲之前你要睇左邊套劇集先又要睇咗啲乜嘢然之後先至會明，佢兩個因為之前睇曬啲「懶人包」所以好似做咗旁述咁幫我同老婆喺度解釋，所以成套戲都好多嘢講，但係又真係畀佢哋搞到我哋兩個都明晒。另外，又好似佢兩姊弟都好鍾意睇啲超級英雄劇集，我同我老婆雖然唔係成日睇，但係間唔中見到啲劇情就會問下佢兩姊弟，跟住佢兩姊弟又好似好叻咁同我哋解釋一番。所以有陣時唔好話同細路仔冇嘢講，其實你只要同佢哋搵啱話題，佢哋係可以好多嘢同家長一齊傾。

我成日都講同仔女嘅相處有陣時就好似同男女朋友甚或者同老婆相處一樣咁，要搵共同話題或者共同興趣，咁就會成日都好多嘢講。但係因為有陣時大人會嫌細路仔講啲嘢幼稚或者講啲嘢無關重要，所以細路仔想講嘅時候好多時家長都唔會想用時間同佢哋傾或者覺得無聊。慢慢細路仔都覺得家長唔會同佢哋傾，繼而大家就越嚟越少講嘢。但係我成日都話溝通就係由啲最簡單嘅嘢開始，如果細路仔平日唔習慣同家長講嘢傾偈，到有問題嘅時候又點會覺得同家長可以傾到啲深入嘅話題呢？

好似早兩個禮拜同埋阿仔阿女一齊去一齊去睇top gun續集，我同老婆除咗緬懷下啲情懷之外，阿仔阿女就因為都有睇過上一集而且又知道我好鍾意睇，所以睇完出嚟之後大家都好多嘢傾。又或者阿仔阿女鍾意打羽毛球都係因為我，咁所以羽毛球又自然成為我哋傾嘅另一個話題。阿仔阿女鍾意睇youtube，其中一個頻道佢哋好鍾意睇嘅頻道叫做「小薯茄」，我同老婆又會間唔中同佢哋一齊睇下，原來都覺得幾好笑，咁所以又成為我哋一個共同話題，當佢哋有新嘅片段出嘅時候佢兩個又會即刻介紹畀我哋睇。我鍾意砌模型自自然然就感染到阿仔鍾意都鍾意砌模型，「機動戰士」又成為我同阿仔一個好多時會傾到嘅話題。我鍾意睇嘅電影「星戰」，「漫威」等等，都會同佢哋一齊睇又可以增加大家之間嘅話題。我老婆會睇嘅youtube又會間唔中同對仔女一齊睇，所以我哋每一日都會有唔同嘅話題同埋唔同嘅嘢傾。

同細路仔嘅溝通本來好自然自細就會開始，但係慢慢開始長大，細路仔越嚟越多嘢講，佢哋唔係淨係只係聽家長去講嘅時候，有啲家長會慢慢覺得細路仔講嘅嘢無聊或者大家認識嘅嘢同睇法都唔同，開始越嚟越少傾偈，其實家長可以試下由細路仔開細個開始，慢慢將自己嘅興趣介紹畀啲細路仔，而令到大家有一啲共同嘅話題，都細路仔大啲嘅時候家長亦都要嘗試去接觸細路仔嘅興趣，只有大家都可以好舒服咁同對方傾計同埋溝通嘅時候，大家先至可以傾到一啲深入啲嘅話題。我始終相信要同細路仔溝通主導權都係家長身上，細路仔自細都係鍾意同父母講嘢，點解慢慢會越嚟越唔傾，問題始終都係發生喺父母身上，家長如果唔肯面對同細路仔溝通出現問題係源自於自己身上，咁就永遠都唔能夠改善到同仔女溝通嘅情況。

0 0 0

私人傳訊

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 0|主題: 16018

瀏覽過的版塊

少年成長今日: 0|主題: 16018