少年成長今日: 1|主題: 16003

收藏本版

發帖

返回列表

跳至頁

查看: 22099 | 回覆: 0

傾啲乜，家長唔知得？ [複製鏈接]

csir3290

子爵府

積分: 11922

1^#

發表於 24-4-21 11:58 |只看該作者 |倒序瀏覽 |打印

上個禮拜講完表白之後，都見到有啲家長回應，家長面對嘅問題其實都係好多家長都可能會面對。就係成日有女同學WhatsApp自己讀六年班嘅仔，而個仔就因為怕畀媽媽知道所以就講大話話只係同同學傾功課。但係最慘嘅係畀家長知道個仔講大話，但係又唔知點同個仔傾好。

我覺得呢個其實係好多家長都面對嘅問題，尤其是一提到男女相處再加上自己嘅小朋友都仲係咁細個，好似束手無策唔知由邊度同個仔講起好。況且而家有通訊軟件同社交平台咁方便，大家可以唔使傾電話都可以講到好多嘢。想番我哋呢一代以前細個冇呢啲咁方便嘅途徑咪又係一樣成日同同學或者朋友傾電話。傾得多家長都係一樣唔鍾意，亦都好怕加長文長問短所以一般都係同家長講話傾功課。家長個重點可能就係個仔成日同個女同學whatsapp，而且因為咁樣而講大話呃自己所以又覺得嬲又唔知點處理好。

但係如果換一個角度諗，我哋會唔會係將個重點太過放咗喺擔心拍拖呢樣嘢上面呢！雖然把後就話唔鍾意個仔講大話，但係其實只不過係擔心佢哋會過做拍拖。試問如果佢哋哋成日傾嘅對像唔係異性而係同性，家長可能相對又會放心好多，就算個仔到頭來都係怕煩而敷衍地話係傾功課。其實而家通訊軟件咁流行，細路仔好多時都會喺通訊軟件上面聯絡，講真對象唔係男仔就係女仔㗎啦！係咪如果只係同同性成日喺社交平台傾計就唔擔心呢！我覺得個重點未必係拍拖，反而係其實成日咁樣傾計會唔會影響學業或者影響其他嘅生活呢！正如個仔講驚畀媽媽知道之後煩佢，因而講大話話係傾功課，因為呀仔知道用傾功課嚟做藉口就可以避免家長問長問短。可能連個仔都知道家長就係驚佢拍拖，所以好避忌畀家長知道佢同女仔傾偈嘅內容。我明白講大話當然係唔啱，但係作為家長都要明白佢講大話嘅原因，佢未必係想掩飾佢拍緊拖，反而更加可能就係避免更多無謂嘅追問同埋話題。請如我哋大人有陣時唔想其他人問長問短，都會隨便咁敷衍咁答一個答案。嗰位家長亦提到當佢知道咗個仔講大話同埋同女仔傾計之後，佢嘗試心平氣和同個仔傾。但係我哋自己都做過細路仔，其實家長你越係咁樣以為正正經經，平心靜氣咁同佢討論同佢傾清楚，其實佢就越唔想同你傾，因為細路仔會覺得你咁樣係煩住佢哋，而且佢亦都未必真係拍拖，你咁樣傾佢會覺得你係屈緊佢。

所以我覺得反而將件事嘅重點唔好放喺拍拖上面，因為就咁表面睇，只不過係佢同個同學用whatsapp傾計，內容未必係傾功課咁解，正如我之前講其實用社交平台，對像唔係同男仔就係女仔㗎啦！好似我個女咁，其實佢而家都成日用社交平台同佢啲同學仔通訊，我從來都唔會問佢哋傾計嘅內容同埋對象，反而只係間唔中提下唔好成日傾咁多影響學習，亦都提醒佢哋喺網上嘅言論要小心啲就係咁多。我覺得唔好成日將重點放喺拍唔拍拖上面，反而係要教男女相處嘅正確態度。而且唔係刻意去講，而係要喺日常生活入面唔好刻意去傾，例如有陣時借睇電視見到嘅主題，又或者可能接放學嘅時候一定會見到有啲中學生著住校服拍拖，從而提下咁樣有啲乜嘢唔好處。總之作為家長越係想傾呢個話題，就越係要不經意咁同佢傾，更加唔好下下用教誨嘅形式同佢講，因為你刻意咁去傾，以為大家可以講清楚，但係講真個細路仔根本就知你係話緊佢，到頭來佢閂埋隻耳仔只不過係敷衍咁回應。所以最好就係借吓人哋嘅例子嚟傾下大家嘅睇法，因為用人哋嘅例子唔係講自己，感覺冇咁埋身而且好似第三者旁觀咁，細路仔會容易啲去講。就好似呢個星期每晚食完飯同阿仔阿女坐埋一齊睇「東張西望」講嗰個專呃女仔發生關係嘅所謂kol事件咁，其實呢件事係可以有好多話題去傾，例如網上資訊信唔信得過、又或者家長好擔心嘅男女相處問題，其實呢件事都係一個好好嘅例子去傾，而傾嘅時候家長就更加要用開放嘅心態去聽細路仔嘅睇法，唔可以下下用教誨嘅模式用批判嘅講法！只有咁，細路仔先至會願意同家長去傾。我明白當家長見到細路仔成日揸住手機，成日用通訊軟件或者社交平台，都會好有好奇心想知佢哋講乜嘢，但係最唔好嘅做法就係揸住佢哋講嘢嘅內容去批判佢哋！但係就算點樣想知都好都唔好用偷睇嘅方法，因為如果你細路仔知道，佢只會收得更埋。可能家長會話問個仔又唔講，如果唔偷睇可以點知道入面嘅內容呢？但點解一定要知道佢哋傾計嘅內容呢！係咪知道咗就可以預防到佢哋拍拖呢？另一方面家長覺得個細路仔唔應該講大話，但係當家長同佢傾講大話呢個問題嘅時候，到底期望個細路仔搭乜嘢答案呢？個仔要應承家長以後唔再講大話？咁係咪即係家長以後問到同邊個傾計或者內容嘅時候，佢都要一五一十咁好清楚講畀家長聽呢？其實到頭來最終咪又係敷衍咗家長就算。講真就算細路仔答你真係傾功課，但係如果嗰日日同女仔傾功課最終咪又係可能會日久生情。所以我覺得問題嘅重點根本唔在於細路仔同邊個傾或者傾啲乜嘢，家長始終都要接受細路仔會長大，有自己嘅私隱或者有啲嘢唔願意畀家長知道。家長越係在意咁去問反而只會令佢哋更加覺得煩厭更加唔想答。講到最尾其實家長都只不過係驚仔女過早拍拖，但係以為掌握曬佢哋談話內容或者談話對象就可以避免佢哋拍拖咩，而家社交平台咁發達，同埋啲細路仔根本睇下家長嘅眉頭眼額就已經知道佢哋會反對，所以如果佢哋真係拍拖反而只會收得更埋。與其係反對，不如早啲教佢哋或者多啲同佢哋傾男女相處之道，幫細路仔建立多啲興趣同埋人生目標，反而仲可以避免佢哋過早拍拖。講真只要家長放開一啲咁去傾下男女相處之道，而唔係一開始就事事反對，連同異性傾偈都過度緊張嘅話，反而可能細路仔仲願意開放啲咁去講自己嘅諗法。