少年成長今日: 1|主題: 16049

收藏本版

發帖

返回列表

跳至頁

查看: 14662 | 回覆: 1

呈分試 [複製鏈接]

csir3290

子爵府

積分: 12219

1^#

發表於 22-8-21 10:00 |只看該作者 |倒序瀏覽 |打印

阿仔終於派咗第一次呈分試嘅成績表。一路都好擔心阿仔嘅成績，因為佢五年級第1同第2個學段嘅成績都係介乎band1 同band2之間，其實阿仔一啲都唔懶，但係就係唔小心，同埋心急。之前一路都俾佢自己溫習，佢自己都做到佢亦都唔會偷懶，但係可能佢自己溫除咗我哋畀佢嘅練習之外佢唔係好知道溫習嘅重點喺邊度，所以考出嚟雖然成績唔係話好差，但係如果要入到去同家姐一齊嘅中學似乎就有啲危機。終於呈分試之前我老婆同阿仔講話都係要出手同佢一齊溫習。果然喺第二學段完咗之後我老婆開始同阿仔一齊溫習，明顯睇到阿仔嘅成績開始慢慢有進步，阿仔嘅信心亦都越嚟越大，雖然有陣時佢都有啲怨言話有好多嘢要做，但係因為佢都見到自己有進步所以其實佢都只係呻下。我哋慢慢一路鼓勵住佢，終於捱過咗第一次嘅呈分試，而出嚟嘅成績其實雖然唔算得上係好好，但係都總算可以達到band one嘅要求，而且佢仲攞咗學業獎所以佢自己都好開心。

我同老婆都知道阿仔其實成績唔算特別差，但係如果要入到同家姐同一間學校似乎就需要再加把勁。但係我哋知道如果每日黑口黑面叫阿仔溫習又或者只係不停咁畀補充佢做，阿仔到頭來只會越讀越唔開心。我同老婆都知道要細路仔進步必須一定要畀好多成功感佢哋，所以開始嘅時候就由溫習默書開始，果然我老婆出手幫佢溫默書，佢嘅默書成績就越嚟越進步，雖然以前都次次合格但係而家係次次都九十幾分，慢慢建立佢嘅自信。數學方面其實佢唔係唔識，不過好多時都係唔小心同心急，雖然每日我都係會要佢做一啲額外嘅補充練習，但係一定唔會做得多，可能每日都係做多幾題，但係就要有獎有罰，如果做完啱多嘅，第二日就可以做少啲。如果做錯咗就要佢做詳細嘅改正，因為我哋要改善佢嘅係佢嘅心急同埋唔小心，所以就喺每日做嘅數量上面慢慢調整，鼓勵佢慢慢做同埋小心啲做。又係一樣慢慢建立信心，等佢知道小心啲做就可以有進步。至於英文就更加係我老婆嘅強項，我老婆自細就已經令到個仔其實咁多科入面最高分就係英文，同對英文一啲都唔抗拒。

另一方面除咗學業上面要幫佢溫習之外，心理上面嘅調整我都覺得好重要，要畀一個好明確嘅目標佢。我哋觀察到其實阿仔都好想同家姐一間中學，因為佢見到家姐讀得開心而且都鍾意嗰間學校，最重要係佢覺得家姐間中學好有愛心，所以我哋見到阿仔其實都想同家姐一間學校，我哋就利用呢樣嘢慢慢鼓勵佢，而家姐亦都好好間唔中都同細佬講話將來時如果一齊一間中學嘅時候家姐可以帶住佢話畀佢聽學校嘅嘢令佢快啲熟悉。另外，亦都要幫佢安排作息嘅時間，可以畀佢玩嘅時候就盡情去玩，幸好佢整個五年班嘅大部分時間都係返半晝，所以佢有足夠嘅時間完成功課同埋溫習之後仲可以同家姐玩，我同老婆都知道千祈唔可以畀阿仔有個感覺就係佢嘅生活入面只有溫習，咁樣只會越嚟越令佢唔鍾意，阿仔今次嘅成績進步最大功勞都應該係我老婆。我哋相信只要阿仔keep住而家呢個成績，其實應該已經可以入到去同家姐一間中學。當然我哋都要繼續不停鼓勵佢，令佢相信自己能夠做得到，覺得自己係可以有能力做得更好。如果要另一個細路仔自己求進步就要令佢相信自己可以進步。家長可以做到嘅就係用多啲嘅正面鼓勵，經常黑口黑面係絕對不能夠達到想要嘅效果。五六年班嘅呈分試真係好折磨人，希望我個仔可以平穩過度盡快完成呢個咁消磨人嘅考試啦！