少年成長今日: 0|主題: 16013

收藏本版

發帖

返回列表

跳至頁

查看: 13962 | 回覆: 1

無大無細 [複製鏈接]

csir3290

子爵府

積分: 12014

1^#

發表於 22-10-2 11:23 |只看該作者 |倒序瀏覽 |打印

呢幾日喺街度都見到一個好奇怪嘅景象，就係見到啲細路仔好似阿媽教女咁鬧緊啲家長。其中有一次喺餐廳食飯，突然間聽到有個細路仔好大聲咁鬧人，望過去原來有個細路仔同應該係同個老人家一齊食飯，但係個老人家應該係唔畀佢睇手機，個細路仔就一路唔肯食飯仲要一路鬧緊個老人家，又話佢煩又話佢呢樣又話佢嗰樣。又有一次喺個商場度又係突然間聽到個細路仔好大聲咁喺度鬧，望過去今次原來應該係個細路仔鬧緊佢呀媽，雖然唔知鬧乜淨係知道個細路仔不停鬧過阿媽煩，又話呀媽阻住晒，但係個阿媽仲好聲好氣咁氹緊個細路，愈氹個細路仔就越鬧得緊要。

係咪時代唔同咗呢！我都唔明點解啲家長可以畀個細路仔咁鬧法，畀著係我呢一代，細個如果喺街度咁扭計，可能畀人一巴已經打咗落嚟。唔好話鬧返轉頭啦！就算可能只係駁嘴或者發小脾氣都可能已經畀人打咗。我唔係話打係啱，但係做家長起碼要教細路仔禮貌同尊重，做家長絕對唔應該接受細路仔咁樣鬧自己，我當然明白家長可能都有教，只係細路仔可能唔聽，但係家長絕對唔應該容許細路仔繼續咁落去，應該要明確話畀佢哋聽家長係唔接受呢一種態度，當然唔會喺街同佢鬥鬧，但係返到屋企佢一定要接受後果。我明白而家好多屋企都係生一個起兩個止，對細路仔自然會更加愛錫，但係唔代表咁樣就可以不分是非黑白，為咗遷就細路仔為咗令佢哋開心，就連最基本嘅禮貌同埋尊重都唔教。上面我見到嗰兩個例子，好明顯就係自細唔教啲細路仔，所以去到佢哋五六歲嘅時候已經習以為常。要明白越細個嘅細路仔就越容易想用情緒嚟控制大人，所以家長就更加應該自細開始要令佢哋知道情緒唔係攞嚟控制人嘅工具，家長亦都唔可以容易受到佢嘅情緒影響令到佢哋達到佢哋需要嘅目的。亂發脾氣更加應該要佢哋承擔相應嘅後果，唯有自細開始嘅教導，先至可以慢慢矯正佢哋用情緒嚟達致目的嘅手段。

上面嗰兩個例子亦都令我聯想到點解咁細個細路仔會鬧得咁順口咁自然呢？除咗家長可能自細遷就慣佢哋之外，我更擔心嘅可能根本喺個細路仔嘅成長環境入面，個老人家或者個阿媽喺屋企入面根本就成日畀家庭嘅其他成員鬧，而且好冇地位。最容易就係老人家成日比自己仔女鬧，老婆畀老公鬧，細路仔看在眼裏自然有樣學樣，所以先鬧得咁順口，一唔滿意就咁樣去鬧。如果係因為有樣學樣咁就更加可悲，大人喺屋企都隨便發脾氣隨便鬧人，喺咁嘅環境之下成長嘅細路仔，到佢長大自自然然亦都會學到，到頭來亦都會用番咁樣嘅態度去對返自己嘅父母。所以如果屋企生活得唔和諧成日家嘈屋閉，咁就算其中一方想好好地教自己嘅仔女亦都好困難。相反如果好似有啲老人家咁過份溺愛事事遷就，到頭來都係害咗啲細路仔。所以家長唔好只係一味覺得對仔女只係應該愛錫而忽略咗管教嘅責任呢！