少年成長今日: 0|主題: 16012

收藏本版

發帖

返回列表

跳至頁

查看: 15274 | 回覆: 0

家長的要求 [複製鏈接]

csir3290

子爵府

積分: 11997

1^#

發表於 22-10-23 10:40 |只看該作者 |倒序瀏覽 |打印

早幾日因為工作嘅關係識到一個教劍道嘅教練，佢教嘅項目喺香港真係比較冷門，佢係一位非常之有心推廣呢項運動嘅教練，嗰日大家就喺度傾開推廣呢項運動嘅問題。除咗覺得香港政府喺體育推廣嘅政策上面有問題之外，其實我哋都覺得同香港家長嘅心態都好有關係。

好多香港嘅家長都會將體育運動興趣視為一種細路仔嘅成就，我之前都曾經講過好多細路仔對體育運動嘅興趣其實係磨滅咗喺家長嘅手上。細路仔細個好多時都會鍾意做運動，大家諗下細路仔嘅時候鍾意跑跑跳跳，你畀個波佢哋就鍾意追住個波嚟跑，唔會理追唔追到又或者輸贏嘅問題。但點解佢哋越長大就好似越嚟越唔鍾意做運動咁呢？另外細路仔細個如果你叫佢參加運動興趣班，佢哋好有興趣，但係點解慢慢練吓練吓就會好似越嚟越唔鍾意呢？教練同我講其實好多時都同家長嘅心態好有關係，好多體育會或者教練都經常會遇到家長問同一個問題就係幾時有比賽，要打到乜嘢水平先至可以加入校隊，有啲家長又會成日問點樣先至可以提升細路仔嘅水平。如果有啲教練希望用遊戲嘅形式嚟到提升細路仔嘅興趣，但係有啲家長就會覺得咁樣好似玩玩吓咁，好似唔係好見到細路仔嘅水平有提升。所以普遍香港嘅體育會或者係訓練班都係以鍛練為主，以提昇技術水平為主，因為咁樣先至可以回應到家長嘅訴求，但係正正細路仔又點會鍾意鍛練又點會鍾意不停咁去練習同一個動作呢！如果佢哋覺得運動係越嚟越辛苦或者根本就係好刻板又無趣，只係練同一個動作，咁慢慢佢哋就會失去對運動嘅興趣。再加上好多家長都會覺得喺香港玩運動或者做運動員會根本就冇前途，所以大部分嘅家長如果要喺運動同學業之間，一定會揀學業。唔好話二揀一啦，就算只係維持運動嘅習慣都寧願要啲細路放多啲時間落去讀書好過。

所以你見到喺香港學界最受家長歡迎嘅運動好多時都係游水，羽毛球，田徑之類呢啲個人項目，因為有學界比賽亦都經常有唔同嘅比賽所以啲家長就趨之若鶩，又或者好似剛剛奧運之後劍擊突然間攞好多獎，啲家長就一窩蜂叫啲仔女去玩劍擊，因為係一個潮流，但係玩下玩下覺得冇乜成績或者要擺好多時間落去，又或者而家電視越嚟越少講嘅時候就會開始越嚟越少人玩。

所以喺香港要細路仔玩運動，其實好多時就係睇家長嘅心態，如果家長都認同運動係一個有益身心嘅習慣同興趣，既然係興趣就要令到啲細路仔覺得好玩同埋變成一個生活習慣。其實好多家長都可以數得出運動對細路仔嘅成長可以有好多好處，包括除咗健康嘅身體之外，玩運動嘅人其實佢嘅毅力會好啲，心態又會積極啲正面啲，透過運動比賽亦都可以提升細路仔嘅抗逆能力。但係好多香港嘅家長偏偏太在乎贏輸，太在乎成績。連參與運動都要睇成績，就係呢一種壓力令到本來係希望提升細路仔對運動興趣嘅體育會或者教練，變成以提升細路仔運動技術同成績為主嘅訓練。試問香港可以有幾多細路仔可以係學界冠軍或者係經常打比賽都會贏呢！細路仔經常要為咗比賽而練習，有幾多個可以能夠咁刻苦呢！只有更多嘅係慢慢由有興趣變成冇興趣到最後放棄參與呢！其實如果細路仔對運動有興趣，其實唔需要迫佢哋亦都唔需要畀任何壓力教練。我自己對教練嘅要求好簡單，就係令到自己嘅仔女繼續鍾意參與運動，所以每一次練完波見到佢哋嘻嘻哈哈笑曬咁同教練傾偈，同隊友一齊玩而佢哋又唔會抗拒個每星期嘅練習，咁我覺得已經達到要求。而且當佢哋慢慢一路玩落去，其實佢哋都會越嚟越想挑戰自己，所以凡有比賽或者所謂嗰啲級別考試，其實都係佢哋自己主動提出話想參加我哋先幫佢報名。其實要細路仔發展任何嘢，都係要令佢哋先覺得嗰樣嘢有興趣，佢哋先至會放心機落去，但係好多時過份嘅壓力，最後都只會磨滅佢哋嘅興趣。但係呢啲壓力好多時正正都唔係嚟自其他地方，而係來自佢哋家長本身。