少年成長今日: 1|主題: 16038

收藏本版

發帖

返回列表

跳至頁

查看: 15362 | 回覆: 0

關愛坐惹的禍！ [複製鏈接]

csir3290

子爵府

積分: 12168

1^#

發表於 22-10-16 11:33 |只看該作者 |倒序瀏覽 |打印

上個禮拜又係喺網上面睇到，有位自稱台灣媽媽嘅女士因為喺火車上面要人讓座畀自己個細路仔，最後演變到互相拍攝鬧曬大交，仲要上埋東張西望添！件事嘅最大爭拗點就係車上面嘅所為關愛座究竟係為邊個而設，係咪一定要讓座。當然各有各嘅立場，都冇話邊個一定啱曬邊個一定錯曬。但係我就覺得其實呢件事嘅發生，好主要係因為個媽媽太過以自己嘅仔女為中心，咁冇話一定錯嘅，我諗好多家長都係愛錫自己仔女。但係問題在於其實我哋都要教自己嘅細路仔其實個世界並唔係圍住佢哋嚟轉，點解人哋見到你係細路仔就一定要讓座畀你呢？其實每個人都有自己嘅需要，正所謂讓就人情唔讓就道理，既然要講人情，就更加一定要有禮貌，同埋要預咗唔一定有人讓畀你。但係好多家長就正正係將自己仔女嘅利益放到最大，所有嘢都要以自己嘅仔女為中心，細路仔喺父母咁樣嘅心態之下長大其實冇乜好處，因為將來佢會好難適應呢個社會，自細就以為社會上面人人都需要讓佢，人人都需要遷就佢嘅時候，長大佢就會發覺原來個社會唔係咁運作要重新適應。

其實如果你問我，我就覺得細路仔根本企吓就唔係問題，況且香港鐵路嘅車程有幾遠呢！自細佢哋要適應搭交通工具就係咁㗎啦，反而我覺得更加要教細路仔係需要讓座畀更加有需要嘅人，如果細路仔自細就習慣人哋讓佢，覺得人哋讓佢係應份，又點會培養出佢哋嘅同理心呢！我自己反而會教自己嘅細路仔就算有人讓畀佢哋都要有禮貌咁婉拒，因為細路仔企下冇所謂，應該讓畀更加有需要嘅人。

另外我覺得成件事反而最有問題係個阿媽喺車廂入面教個細路仔要做一個有教養嘅人，因為有教養嘅人就會讓座畀人，喺度單打車廂入面嘅乘客話佢哋冇教養，到頭來仲要係喺自己嘅仔女面前同人鬧曬交，其實正正就係表面就係為咗爭取自己嘅權益，但係就用緊一啲冇教養嘅方法去做，咁樣對細路仔嘅影響重大個冇人讓座畀佢，細路仔反而可能會學到原來為咗爭取嘅自己嘅權益，只要惡只要大聲音又或者對人單單打打就有用。其實咁樣教又係咪真係教到有教養嘅細路仔出嚟呢！而且個阿媽仲要為咗攞到大家嘅注意及同情，最後仲要上埋東張西望，表面就好似為咗爭取自己權益爭取自己所謂嘅公道，但係其實只不過係唔忿氣想爭取人哋嘅認同令人哋覺得佢先至係啱嗰個，但係咁樣咪就係好似佢教仔一樣，覺得所有嘢都要以自己嘅仔女為中心，呢位媽媽嘅做法咪就係自我中心囉！將來佢嘅仔女長大其實可能都係會比較自我中心，唔理其他人嘅睇法同埋感受囉。

總之我唔係話以自己仔女為中心呢個諗法係錯，但係做家長就要懂得分寸，愛錫自己仔女當然冇問題，但係亦都要教佢適應呢個社會，亦都要教佢真正嘅教養係點樣樣。另外，其實問心我真係覺得應該取消關愛座，讓座應該係一種教育係一種有教養嘅生活習慣。試問係咪讓座只係適用於關愛座呢一個位置呢？係咪只要我唔係坐喺關愛座上面我就唔需要關顧他人嘅需要，就算見到有需要嘅人，只要我唔係坐喺關愛座上面我就冇責任讓畀人呢！如果人嘅質素唔提高，就算設立再多嘅關愛座只會引起更多嘅爭拗！係咪只要我唔係老人家，唔係孕婦，唔係手抱嘅細路仔，咁就算我唔舒服或者我好有需要都唔可以坐落去關愛座呢！我覺得教細路仔要懂得讓座之餘其實更應該要教佢哋懂得體諒別人！只係教細路仔等佢接受人哋應該讓座畀佢，到佢將來長大先至讓座畀人呢一個概念，只不過係教緊佢以自己為中心，唔係真係教緊佢同理心同埋關顧別人。