少年成長今日: 8|主題: 16047

收藏本版

發帖

返回列表

跳至頁

查看: 19182 | 回覆: 0

打仔 [複製鏈接]

csir3290

子爵府

積分: 12213

1^#

發表於 23-5-7 11:27 |只看該作者 |倒序瀏覽 |打印

早前喺社交媒體睇到一張相片，影到一個媽媽喺街度掌摑一個細路仔，一路打中一路鬧個細路仔。發相嘅人話個媽媽當時情緒好激動。發想嘅人淨係話個媽媽跟住一路行都仲喺度鬧緊個細路，發相上網就係想提醒個媽媽唔應該用暴力去教個細路仔。

張相喺社交媒體引起好多討論，當然最精彩就係睇留言啦！好多人都譴責個媽媽覺得用暴力解決唔到問題，唔應該喺街度咁樣打個仔，主要都係話暴力解決唔到問題，亦都只會加深個仔同媽媽之間嘅嫌隙，咁樣當眾打仔對個細路仔嘅自尊心亦都好有影響等等，好多人用一般嘅常理都會講到唔應該咁做嘅原因。當中都有好多人發表意見，亦都有人勸個媽媽用打嘅方法教仔到最後只不過係破壞大家感情，亦都會令到個細路仔長大嘅時候越嚟越唔鍾意個媽媽。另外亦都有教個媽媽應該點樣去放鬆自己情緒或者真係搞唔掂嘅時候要搵社工幫手嘅意見。但係意見總又相反，有一啲嘅言論冇話贊成個媽媽咁做，但係佢哋就批評提出意見嘅人冇細路仔就唔知道教仔辛苦，但係睇佢哋呢啲講法你就會覺得好奇怪，係咪唔知道教仔辛苦，就唔可以提出意見呢？而且唔知道教仔辛苦所以就唔應該話個阿媽用打嘅方法教仔係唔啱。

我覺得呢啲人嘅言論好奇怪，一句其他人唔知教仔有幾辛苦就可以否定其他人嘅意見。好似其中一個意見話未有細路仔之前都同自己講唔可以俾電子奶嘴個細路仔，但係當有咗細路仔之後就明白如果要個細路仔安安定定咁食飯，電子奶嘴係必須嘅，如果唔係嗰餐飯就會攪唔掂，呢啲冇教個仔嘅人係唔會明白嘅。首先我覺得如果話冇教過細路仔嘅人就唔應該評論其他人教仔嘅方法。咁其實評論嘅人好多都係用常理去評論，即係細路仔唔鍾意畀人打或者咁樣會令個細路仔自尊心受損呢啲，都係用常理就已經諗到，係咪一定要教個細路仔先至會明白呢？而且如果呢個邏輯係通嘅話，咁我哋好多嘢都唔應該評論啦！即係冇做過特首就唔應該評論特首做嘅嘢啱定唔啱，冇做個老師又唔應該評論做老師嘅方法唔啱定唔啱等等！所以呢個邏輯好有問題，況且就算未教個仔但係都做過人哋嘅仔女，其實都會知道做細路仔嘅時候有啲咩嘢會影響自己。我有陣時就係覺得有啲人做咗父母嘅時候就忘記咗自己做細路仔嘅時候其實有邊啲嘢鍾意，邊啲嘢唔鍾意，點樣同父母相處先至係最舒服。好似有啲人講話自己細個都係畀阿爸阿媽打㗎啦！又唔見自己學壞，咁打仔有乜問題呢！呢個我都明白，因為我自己細個都有畀阿爸阿媽打，但係當講呢句說話嘅時候，其實你只要問下自己當年畀阿爸阿媽打嘅時候你鍾唔鍾意呢？或者會唔會覺得其實阿爸阿媽如果用第二個方法同自己相處會開心一啲呢！正正就係因為我細個唔鍾意畀阿爸阿媽打，所以到而家自己做咗父母就會好在意知道其實打唔一定可以解決問題。

另一方面其實我相信所有bb出世嘅時候其實都係一張白紙，佢將來嘅發展其實就睇父母係呢張白紙上面輸入啲乜嘢，要教細路仔規矩要教細路仔品行，越細個開始越好，應該越細個開始就畀佢知道乜嘢係得乜嘢係唔得，就好似之前嗰個講話有咗細路仔之後先至知電子奶嘴嘅重要，但係其實想深一層就會發覺根本就係嗰個父母一開始就以為用電子奶嘴可以解決問題，所以先至搞到自己冇咗個電子奶嘴就唔得。正如我頭先講細路仔一出世根本就係一張白紙，你畀乜嘢佢接觸佢就會學啲乜嘢，好似我對仔女咁，我從來都冇畀電子奶嘴佢哋，但係從來佢哋出去食飯都唔會係一個問題，因為由佢哋開始懂得自己食飯開始，我哋已經教佢哋食飯嘅規矩，一路玩一路食係真係會拎走碗飯，佢哋亦知道發脾氣冇用，其實喺細個嘅時候係講父母有幾堅持去教佢哋呢啲規矩，直至到佢哋懂得呢啲食飯嘅規矩嘅時候，我哋先開始慢慢帶佢哋出街食飯，所以根本就唔需要乜嘢所謂電子奶嘴。

其實好多父母都係喺細路仔好細個嘅時候忽視咗呢啲規矩嘅教育，冇錯我明白你細個要教佢哋呢啲嘢係需要用好多時間同埋耐性，但係細路仔細個嘅時候就好似我之前講白紙一樣，係好容易寫一啲規矩上去，等佢哋容易適應同埋習慣，但係有啲父母就喺仔女細個嘅時候唔在意去教，到細路仔慢慢長大俗語講積習難改嘅時候，就用打同鬧嘅方法以為可以改到。但係到呢啲壞習慣都已經成咗型嘅時候，你越打越鬧只不過係破壞緊大家嘅關係亦都越嚟越改唔到。細個你唔用時間同耐性慢慢去教，都大個你先至要話去改嘅時候，就要付出幾倍嘅時間同埋耐性，以為簡單用打用鬧就已經可以解決問題，其實到頭來只不過令到個問題更加複雜更加解決唔到。