少年成長今日: 1|主題: 16038

收藏本版

發帖

返回列表

跳至頁

查看: 20738 | 回覆: 1

忙過番工 [複製鏈接]

csir3290

子爵府

積分: 12168

1^#

發表於 23-4-2 11:04 |只看該作者 |倒序瀏覽 |打印

上個禮拜睇星期日檔案，主題就係講中產家庭點樣培養自己啲仔女參與興趣班。節目入面講到其實好多中產嘅家長都視參與興趣班為搵學校嘅手段，節目訪問啲家長嘅時候，家長樂此不疲咁講到自己嘅仔女要參加幾多嘅興趣班同埋補習班，目的就係希望將來報學校嘅時候個profolio好睇啲，有家長就講到好無奈咁話因為個遊戲規則係咁，希望學校見到仔女個portfolio好啲，所以先至要佢參加咁多補習班同埋興趣班。但係相反訪問啲細路仔嘅時候，啲細路仔又似乎唔係咁享受同埋咁鍾意參加補習班同埋興趣班。喺節目入面睇到啲細路仔其實都好攰，每日放學要補習班再加上要學唔同嘅興趣班，連放假都好似返工一樣，家長要陪仔女四圍去參與唔同嘅興趣班。講真喺個節目入面我就一啲都唔覺得嗰啲細路仔係好有興趣咁去玩嗰啲所謂嘅興趣班。啲細路都講放假寧願瞓耐啲連睇電視同埋玩嘅時間都冇。

其實我都明白家長嘅心態，個個都希望幫自己仔女搵到一間好嘅學校，但係參加咁多補習班同興趣班係咪就真係可以入到家長心目中仍為好嘅學校呢？坦白講，中產家長心目中所謂好嘅學校其實來來去去都係嗰堆，報得呢一間學校嘅細路仔個個都參加n咁多個補習班啦，係咪真係個portfolio入面有好多唔同嘅興趣班同補習班，學校就會欣賞多啲呢！如果要靠興趣班嘅成績入到呢啲所謂心儀嘅學校，除非你喺興趣班入面個成績好標青啦！例如攞好多獎仲要係全港性嘅比賽，呢啲所謂特異功能唔係真係話你肯參加興趣班就可以，要細路仔做到咁其實要好細個就逼佢去練習。其實學校你可以話佢好現實，講真例如好多細路仔都話有學琴咁，除非你一年班已經彈琴彈到六七級甚至乎八級，如果唔係學校根本就唔會因為你有幾多嘅興趣班而去揀你，相反你以為細路仔咁細個就學到八級就一定會有學校收，但係其實個細路仔畀你咁逼法佢係咪真係鍾意呢？學校都係現實嘅，到最終咪又係睇成績去收，即係你面試嘅表現同埋學術嘅表現，細路仔參加咁多興趣班同補習班，其實相對地佢嘅眼界一定唔會闊，因為佢根本冇足夠嘅精神去吸收唔同嘅常識同埋知識，所以與其畀細路仔報咁多興趣班同補習班，不如畀啲時間佢去睇下唔同嘅書去擴闊佢嘅眼界可能效果仲理想。

另外我成日都講興趣班當然係要有興趣啦，如果玩興趣班玩到細路仔越嚟越冇興趣，越嚟越覺得嗰件係一件苦差，其實你只不過係犧牲咗細路仔嘅童年。想細路仔可以有發展，其實最好嘅係令到佢對嗰樣嘢有興趣，點樣先至令到細路仔可以產生興趣，當然就係要玩得開心啦！只有玩得開心佢先至會享受當中嘅樂趣而愈嚟愈鍾意玩，繼而先至慢慢開始追求更高嘅目標。有啲家長以為細細個開始要佢玩咁多唔同嘅興趣班，佢哋就會有興趣，有啲家長甚至會話佢咁辛苦都係為佢好，希望佢將來可以入到間好嘅學校，但係講真如果係我自己對仔女我都唔想佢咁辛苦，我想佢哋培養嘅係興趣，至於佢哋發展成點就要佢哋自己嘅努力。我對仔女都有學興趣班但係我從來唔會逼老師要佢哋考試，阿仔阿女學琴老師認為佢哋得而佢哋又想考先至考，打羽毛球打咗咁多年其實只要個心態當係一種運動可以調劑身心冇乜太大壓力，其實佢哋就會越嚟越鍾意玩！

所以如果以為報好多興趣班同好多嘅補習班就可以幫細路仔增加籌碼入到想入嘅學校，反而我就寧願畀多啲時間佢哋去發展自己鍾意嘅興趣，睇自己鍾意嘅書擴闊佢哋眼界，等佢有一個開心嘅童年，到佢面試嘅時候其實佢可能仲可以有唔同嘅話題去發揮！講真我自己對仔女雖然冇參加好多嘅興趣班，但係佢哋而家讀緊嘅學校都係我同老婆當初想佢哋入嘅，咁係咪真係要跟一個咁樣所謂嘅遊戲規則呢！定係其實只不過係有啲家長心目中只不過係驚蝕底驚自己嘅仔女唔夠人哋嚟呢？