少年成長今日: 2|主題: 16048

收藏本版

發帖

返回列表

跳至頁

查看: 17466 | 回覆: 0

番學與唔番學 [複製鏈接]

csir3290

子爵府

積分: 12213

1^#

發表於 22-12-4 11:10 |只看該作者 |倒序瀏覽 |打印

上個禮拜細佬剛剛考完試，考試頭一日，細佬返到嚟屋企同我哋講，話嗰日喺學校考完第一科，小息嘅時候坐佢前面格兩個位嘅同學突然間唔舒服話頭暈，跟住啲同學走埋去關心佢同話畀老師聽，跟住後來發覺原來個同學發燒最後仲要早退。本來都冇乜嘢但係點知第二日細佬就返嚟講話原來個同學確診咗要喺屋企隔離。呢樣嘢令到我老婆即刻好大反應，佢同話都唔明啲家長點諗嘅，就算係因為驚影響呈分試成績都唔可以明知個小朋友唔舒服甚至發燒都畀佢返學。因為發燒唔會係突然間應該嗰日朝早個細路仔都已經唔舒服，我老婆估應該係因為佢哋而家係考緊呈分試，家長驚如果唔返學會影響考試，所以就照畀佢返。但係我老婆話最怕就係驚影響埋其他同學，因為佢哋啲小學生唔知頭唔知路又關顧同學，見到同學唔舒服又走埋去，一陣搞到其他同學都確診埋就大件事。其實嗰個細路仔都唔舒服勉強叫佢返學校考試，其實成績點都會有影響，再加上隨時影響埋其他同學，咁就大件事。況且細佬間學校其實都因應情況設有補考，只要隔離完其實學校都會集中佢哋同一日補考。所以為乜要咁緊張非要返去考試不可呢！

上面嗰個例子這因為緊張考試一定要返學，但係有另外一個極端，早兩日我個同事去完日本旅行返嚟，因為實在太耐冇飛，所以佢一知道可以通關就即刻攞假然之後即刻飛。佢返到嚟講話喺日本遇到好多香港人，喺啲大城市四圍都可以聽到講廣東話。但係我同事最奇怪嘅係好多都係帶埋細路仔一齊去旅行。我同事話乜啲細路仔唔使返學㗎咩！點解啲家長可以喺11月嘅時間帶埋啲細路仔去日本玩呢！呢個問題好易明啦，咪就係因為啲家長好想飛但係又唔可以放低啲細路仔咪帶埋佢哋一齊去囉！而我亦都好肯定學校係唔會批咁樣嘅事假，我好相信好多家長如果係呢個時候帶細路仔去旅行嘅，都係先去咗旅行再返嚟同學校講，又或者只係作個原因出嚟同學校講。但係呢一批家長嘅做法咪就係話畀細路仔聽其實有好多嘢係重要過返學，包括去旅行，包括機票平包括而家冇咁多人去等等嘅原因，就令到個細路仔可以唔使返學一齊去玩。我唔知道有幾多家長返到嚟香港之後同學校請假會真係同學校講話同咗個細路仔去旅行，抑或會用其他原因同學校講要請假。但係用乜嘢原因都好個細路仔只不過係學到原來有陣時返學未必係咁緊要，玩可能仲緊要啲。我明白大家都好耐冇飛大家都好想即刻去旅行，而且如果等到聖誕先至去可能價錢又會貴好多亦都會多人好多，所以可以揀嘅都希望盡早飛，可以唔使咁貴之餘亦可以冇咁多人。但係作為家長呢個正正就係取捨，究竟返學緊要啲定係其他嘢緊要啲呢？呢個就係教緊乜嘢價值觀畀細路仔嘅問題。如果學可以隨時都唔返，咁細路仔又點會重視返學呢個責任呢！我自己都有假我都好想好似以前同老婆拍拖嘅時候咁，可以隨時攞假去旅行都得，但係自從我地呢對小朋友要返學之後，我同老婆已經再冇呢支歌可以唱。呢個唔係個細路仔讀緊幾多年班，課程緊唔緊張嘅問題，有啲家長可能覺得佢哋都係讀緊幼稚園返唔返學都唔緊要，但係其實細路仔佢哋正正就係要知道返學係佢哋嘅責任，返學就係盡力學習，到放假就可以盡情去玩，呢個就係人生。

上面呢兩個極端嘅例子一個就係緊張考試病都要返學，一個就係為咗去旅行可以學都唔返。為咗考試病都要返學，好似價值觀上比較啱啲，但係其實都係教緊細路仔錯誤嘅價值觀。對於我嚟講細路仔返學學習一定係最優先，但係病就始終都應該要休息，更加重要嘅係唔好影響到其他人。病咗都要返學，為咗去旅行而唔返學，其實對細路仔都係冇好處，只不過係教近佢哋一啲錯誤嘅價值觀。