少年成長今日: 1|主題: 16045

收藏本版

發帖

返回列表

跳至頁

查看: 16833 | 回覆: 1

家長日 [複製鏈接]

csir3290

子爵府

積分: 12200

1^#

發表於 23-1-29 12:04 |只看該作者 |倒序瀏覽 |打印

放假前阿仔學校家長日，一早就同阿仔一齊返學校聽老師講，阿仔六年班老師當然講多啲關於升中嘅嘢，阿仔嘅成績大致上都有進步，都可以令我同老婆有少少放心。喺我哋見之前阿仔嘅另一個同學喺班房入面見緊，本來冇乜特別，但係連我哋坐喺班房門口外面都聽到個家長喺個班房入面鬧緊個細路仔，應該成績唔係咁好。個阿媽講吓講吓，講到越嚟越激動，但係其實鬧嚟鬧去鬧得最大聲嘅都係話個仔懶。本來都冇乜留心，但係因為佢哋講咗好耐令到我哋喺出面等咗好耐所以先至望下。佢個仔其實一路都冇回應，反而係個老師一路安撫個家長，亦都嘗試教緊個家長點樣處理個仔嘅學業問題。

講真我相信個細路仔嘅成績唔係今時今日先至突然間咁差。我相信咁多年嘅家長日入面，其實老師都可能已經同個家長講過要點樣處理細路仔學業嘅問題。但係有啲家長就係咁奇怪，聽還聽做又係另外一件事。我相信如果由個細路仔細個開始有跟住老師嘅提議，用時間用心機慢慢去處理細路仔學業嘅問題，點都唔會嚟到六年班先至會發現咁大問題。我冇留心聽但都大約估到個媽媽應該係會同老師講成日都唔見個仔喺屋企溫書，考試都唔緊張之類嘅說話。到佢哋返咗屋企，我相信個呀媽都係會勁鬧個仔，話唔定其實喺返屋企嘅途中已經會一路鬧緊。但係我更相信嘅係鬧完之後，其實個家長都係會繼續好似以前一樣咁樣去處理。所以不停喺個老師面前鬧個仔蠢，鬧個仔懶，或者自己唔識教之類嘅說話，其實只都不過係為佢嘅成績唔好搵藉口，覺得個責任完全係個細路仔身上。但係其實講真有幾多個細路仔天生就唔需要父母幫助就已經讀書叻會自己溫習吖，唔係話冇但係一定唔會係好多。超過百分之九十嘅細路仔其實都係要父母從細開始幫佢哋培養溫習嘅習慣。所以去到六年班都仲只係鬧蠢同埋懶其實已經唔再解決到問題。

家長日嘅作用就係畀家長了解細路仔喺學習上面有乜嘢問題，然之後聽吓老師講有乜嘢解決嘅方法。返到屋企之後點樣同個細路仔去總結考試成績嘅經驗先至係更加重要。講真我以前細個讀書都唔叻都係懶，家長日之後返到屋企畀人鬧嘅經驗我都試過唔少，但係講真鬧完之後其實生活咪又係如常咁過，而且鬧吓鬧吓根本都已經習慣咗，所以根本就冇作用。所以我覺得鬧唔係最重要，反而最重要係點樣同個細路仔總結經驗，之後點樣幫個細路仔一步一步去改善先至係最重要。況且只係鬧其實到頭來個細路仔咪只係會覺得家長淨係識得鬧其實根本就冇實際嘢可以幫到自己。

我成日都話學習同埋溫習嘅習慣要重細開始，但係有啲家長就係覺得自己學歷唔高根本就幫唔到佢哋，又或者覺得自己工作好忙根本冇時間幫佢哋。但係其實講真細路仔細個，由其是幼稚園到初小嘅嘢有幾深呢？而且細個家長能夠俾到細路仔一個訊息，就係家長在意佢哋嘅學習，會關注佢哋嘅進度，包括每一日都睇下佢哋啲功課，細個嘅時候幫佢哋溫吓默書測驗考試，其實慢慢細路仔都會養成溫習嘅習慣。講到檢查功課，有啲家長又會覺得到細路仔去到高年班啲，根本都就唔識幫佢哋睇。但我成日覺得功課啱唔啱應該係老師幫佢睇，但係唔代表家長唔需要理，我覺得起碼每一日都檢查下佢本手冊，望下佢做完曬啲功課未，只係需要對下佢做曬未而需要幫佢睇啱定錯，其實都已經會令到個細路仔覺得家長在意佢哋嘅學業，到默書考試之前，其實最簡單嘅幫佢哋溫下默書或者係問下書其實我諗唔需要學歷好高嘅家長都可以做到。所以學歷唔高同唔識教根本就係幫自己搵藉口，有時只不過係自己冇耐性同唔想教。每年去到家長日只係循例性地鬧個細路仔，難聽啲講可能只係鬧畀個班主任睇，同埋令到家長覺得自己已經做咗嘢去解決問題，因為我已經鬧咗佢。咁樣根本就冇可能解決問題，更加重要嘅就只係破壞咗同仔女嘅關係。

成績唔好要同仔女總結經驗搵方法幫佢哋固然重要。如果細路仔成績好係咪就只係讚佢叻同聰明就可以呢？我就覺得其實同成績差一樣，咁當然唔係鬧啦，而係唔好淨係贊叻同埋聰明，反而要幫佢哋歸納一下點解今次考試成績會做得好呢！從而加強佢哋做得好嘅動力，同埋用乜嘢方法可以幫到自己。好似我個仔呢兩次考試明顯係早咗溫習，同埋將溫習變成每天逐少逐少去做，連我個仔自己都覺得去到考試前唔使搵得咁辛苦而成績亦都有進步，所以呢次考試其實佢自己都開始變成逐少逐少每日去溫。

所以家長日其實唔係只係每年嘅例行公事畀家長讚吓或者鬧吓自己個細路咁簡單，更重要嘅係家長點樣去幫細路仔總結經驗。家長應該明白細路仔嘅成績好壞，其實家長都有好大部分嘅責任。呢個世界真係好少好少天生就會自己溫習同讀書嘅細路仔，其實大部分嘅細路仔都係需要家長自細從旁幫助慢慢培養。