少年成長今日: 1|主題: 16013

收藏本版

發帖

返回列表

跳至頁

查看: 17485 | 回覆: 1

養寵物 [複製鏈接]

csir3290

子爵府

積分: 12006

1^#

發表於 23-1-15 11:13 |只看該作者 |倒序瀏覽 |打印

我老婆自細都好鍾意貓，未結婚前喺娘家都曾經養過兩隻貓，但係自從嗰兩隻貓分別因為病同年紀大唔喺度之後，我老婆就已經再冇養。雖然冇養但係佢成日都睇啲同貓有關嘅片段同相，我兩個細路仔畀我老婆咁薰陶法，所以佢哋都好鍾意貓。其實我覺得細路仔基本上都鍾意小動物，最主要係因為覺得佢哋得意，我對仔女亦都一樣，貓啊狗啊都好鍾意。佢兩個都曾經問過我老婆可唔可以養貓，我老婆冇第一時間反對，但係就話畀佢兩個聽養寵物唔係淨係同佢哋玩咁簡單，更加重要係仲要照顧佢哋包括要處理佢哋嘅排泄物，當啲寵物有病嘅時候亦都要照顧佢哋。而最重要嘅就係對寵物要有一世嘅承諾，包括要面對佢哋嘅老，病同埋死亡。佢兩個小朋友以為養寵物淨係同佢哋玩咁簡單，我老婆同佢哋講如果佢哋要養佢哋就要負責寵物嘅清潔，佢哋一聽到已經耍手擰頭。因為佢哋細個嘅時候喺公公屋企都見過我老婆養嗰隻貓，當時佢哋好細個，但係佢哋都仲記得嗰隻貓有陣時會嘔公公要幫佢清潔，當隻貓去完廁所嘅時候又要幫佢哋清理個貓砂盆，所以佢哋就知道養寵物唔係淨係同佢哋玩咁簡單。再加上我老婆同佢哋講返佢第二隻貓老病就嚟唔喺度嘅時候嗰種傷心法同埋要點樣照顧佢嘅情況，就算我老婆而家講番都仲眼濕濕，以我個仔咁感情豐富佢更加面對唔到自己嘅寵物過身。所以到最後佢兩個都放棄咗養寵物呢個諗法，佢兩個都話到將來自己大個諗清楚先至再決定養唔養。反而而家佢兩個最鍾意養嘅就係佢哋嗰兩隻電子寵物。佢哋話養電子寵物最好，同佢玩又係撳幾個掣，幫佢哋清潔又係撳個掣，總之只係每日撳幾個掣就可以養大佢哋又可以同佢玩，佢哋話咁樣最好，真係畀佢哋激死。

有陣時家長為咗氹仔女開心，所以未喺足夠嘅事前準備同埋深思熟慮之下就買咗隻寵物畀細路仔，但係細路仔有陣時只不過當隻寵物係玩具，玩厭咗或者要照顧佢哋嘅清潔就唔願意再理佢哋，終於到頭來就要家長執手尾，如果家長都唔肯執手尾最終就可能演變成棄養，對小朋友嚟講可能只係少咗件玩具，但係最慘嘅就係啲動物，佢哋都係有生命嘅唔應該畀人當成玩具。其實你問我我都幾贊成細路仔養寵物，但係養之前嘅教導同埋事前準備功夫就要做足，事實養寵物真係可以培養細路仔嘅責任感，亦都可以係生命教育入面一個重要嘅部分。但係養之前就真係要諗清楚動物唔係玩具，養佢哋要負起啲乜嘢嘅責任同埋要面對啲乜嘢嘅情況。你問細路仔當然乜嘢都會應承同知道啦，因為佢哋鍾意，但係可以考慮下帶啲小朋友去做吓動物義工，或者真係去有養寵物朋友嘅屋企幫下手照顧，唔係淨係同佢哋玩，等佢哋真係了解下養寵物嘅實際情況有先再作決定。

總之其實細路仔養寵物有好多好處，但係養之前家長嘅教導同埋事前準備工作更加重要，千祈唔好只係比細路仔一個感覺就係寵物只不過係玩具，玩厭咗就可以唔理佢哋。所以家長千祈唔好一時衝動就畀細路仔養寵物，更加唔好花錢去買寵物，盡可能係領養。總之家長要知道任何動物都係一個生命並唔係一件玩具，更加唔係一件只係攞嚟氹細路仔開心嘅玩具。