少年成長今日: 0|主題: 16013

收藏本版

發帖

返回列表

跳至頁

查看: 30002 | 回覆: 2

誤交損友 [複製鏈接]

csir3290

子爵府

積分: 12006

1^#

發表於 23-5-21 11:40 |只看該作者 |倒序瀏覽 |打印

早幾日收到個親戚嘅電話，佢好唔開心咁話畀我聽，佢個仔剛剛比警察拉左扣留咗一晚啱啱先至放出嚟。我都嚇咗一跳，因為呢個親戚個仔其實同我對仔女細個都已經好熟一齊玩，而且間唔中都會嚟我哋屋企度過夜。個男仔大我阿女一年，今年已經中三，細個嘅時候都好聽話，而且因為經常見，所以個細路仔都算聽我話。直至到阿女上咗中學之後大家開始就少見面咗。估唔到一收到佢阿媽電話就係話佢畀人拉咗。

我親戚當然好擔心啦！佢話佢個仔最近因為群埋咗班壞朋友，畀警察拉嘅原因就係因為同埋班朋友嘅時候，畀人慫恿一齊去打劫同埋自稱三合會會員，所以先至咁嚴重要扣留一晚先至畀保釋出嚟。個親戚好嬲佢同我講佢話佢已經鬧咗個仔好耐，佢最嬲嘅地方係一早已經同個仔講咗叫佢遠離呢班朋友，但係據我了解其實都係得個鬧字，冇乜實際方法幫個仔遠離班朋友，直至今次出咗事阿媽保釋咗佢出嚟之後，佢覺得個仔仲未覺得好大件事，而阿媽就想你用今次事件叫佢遠離班朋友，點知個仔就反而同返阿媽講，叫阿媽畀啲時間佢，仲話要兩個月時間慢慢先至離開班朋友。佢阿媽當然好嬲啦！所以打電話畀我問我可唔可以上佢屋企，幫手鬧吓佢個仔，因為佢覺得佢個仔都會聽我講。

我喺電話入面都感受到佢阿媽都仲係好激動，都仲未曾接受到呢件事，但係我覺得其實係呢個時間你再鬧亦都冇乜嘢意思，因為你點鬧其實個仔根本就聽唔入耳。即係呢個時間佢根本就覺得朋友大過天，佢覺得同班朋友一齊畀人拉先至係義氣，你仲叫佢離開班朋友咁冇義氣，佢根本就唔會理，而且佢覺得班朋友先至幫到佢。喺呢個時間鬧嘅作用只不過會令到件事發展得更差，我呢個親戚而家好激動好唔開心亦都好嬲，但係愈係想幫到件事就應該越要冷靜諗清楚其實而家應該可以點做。我同個親戚講話其實而家最重要嘅係畀個仔覺得其實家人喺身邊先至係最大支持，應該係同佢一齊去面對呢個問題，講真個細路亦都預咗畀人鬧，所以你鬧佢只會閂埋隻耳仔。喺呢個時間其實佢最不安嘅就係唔知道跟住落嚟會發生乜嘢事，同將來要面對啲乜嘢後果，呢啲不安定性先至係令到佢最擔心嘅事！但係如果喺呢個時間佢覺得屋企人係支持佢，陪佢一齊渡過，陪佢一齊諗方法其實反而會令佢出乎意料。我同媽媽講我話其實如果佢仲係未覺得件事好嚴重，雖然未知道警察方面會唔會告，但係都可以喺呢個時間試下同佢搵下一啲法律意見，因為既然咁大件事，其實可以帶佢搵下啲免費法律諮詢，好似同啲區議員傾下等佢知道其實自己可能面對嘅後果有幾嚴重。

另外，至於我親戚最想佢離開嘅朋友，其實你直接鬧佢叫佢離開，佢根本未必會聽。但係反而佢可以試下由另一個角度同佢講，就係要同佢作最壞打算，萬一真係要上法庭嘅時候，其實佢都想個法官信佢有改過而畀機會佢等佢唔使入去坐，要點樣先至令到法官或者警察相信今次呢件事佢只不過係因為冇諗清楚而受朋友唆擺，而且今次被捕其實對佢嚟講已經係好大教訓呢？就係要佢由而家開始要有一個正常規律嘅生活，唔再出夜街，每日都係返學放學，而且能夠顯示到屋企係有能力管教好佢，等將來萬一要上法庭嘅時候，個法官會相信佢係可以有能力改好，而今次只不過係單一事件，佢係因為受朋友唆擺冇諗清楚而做錯咗！我話與其你直接叫佢離開班朋友都未必得出效果，不如同佢傾下點樣可以做好啲，令人相信其實今次嘅事件對佢嘅教訓係好大，而佢亦都汲取教訓重頭做好，咁反而比直接叫佢離開班朋友可能仲易於接受。因為係大家諗方法點樣改善而家嘅生活模式，點樣向好的方面發展，當個細路仔感受到屋企人嘅關心同埋幫助，反而佢會容易接受。講真如果個細路仔少左出夜街，返學放學嘅規律亦都好咗，而且都透過呢次機會之後佢肯接受返去補習或者參加一啲正常嘅課外活動，咁佢自然見嗰啲朋友嘅機會就會少咗。而且當佢知道原來屋企人先至係佢最強大嘅支持，係不停諗緊方法去幫佢嘅時候，佢更加會知道其實佢嘅所謂朋友根本就幫佢唔到，只不過係得把口同佢講話冇事。不過我都提醒個親戚，個重點係唔可以淨係屋企人同佢擔心同做，所有嘅嘢同傾出嚟所有嘅方法都一定要個細路仔參與先至作用！絕對唔可以皇帝唔急太監急。

到最後我都有同個細路傾偈，但係我冇鬧佢，其實我都係從上面講嘅方向同佢一齊傾，慢慢同埋佢阿媽一齊大家傾一個方法究竟點樣可以令到萬一將來要上法庭嘅時候嘅處境好啲嘅方法。我同個細路講話你唔好當為咗滿足阿媽嘅要求先做好，反而你應該當係為咗自己，為咗令到自己將來萬一面對最差嘅環境嘅時候，可以點樣令到自己嘅處境會好啲。最終大家都傾出一個方法，期間我哋都冇再提點樣離開班朋友呢一件事，反而著眼於係點樣令到自己嘅處境好啲嘅方法。最後個細路仔都應承一齊去做。

個細路仔雖然已經十五歲，話大你都唔大，其實好多嘢佢都開始識諗，我覺得最有問題就係出現咗喺父母以為佢上咗中學就已經大個，一下子自由度放得太大，由間中開始夜少少返屋企，都後來經常都夜返，家長就只係識得用鬧嚟處理，其實我成日都講你越鬧就只係越推個仔向朋友嗰邊。朋友嗰邊就嘻嘻哈哈，永遠都唔會令佢唔開心，反而每一次返到屋企，屋企人就黑口黑面到頭來就只會令到個細路仔越嚟越唔想返屋企。其實我都有同個親戚講過，不過可能真係少見咗，而且可能因為真係覺得家醜不出外傳都唔出事嘅時候都唔想向人求助，所以情況先至會越嚟越差。其實我都唔知咁樣同佢哋傾過一次之後究竟件事係咪真係會有幫助。因為真正幫助到件事嘅只有佢哋呢一家人自己肯真正面對問題，肯冷靜落嚟處理先至有機會幫到。