少年成長今日: 0|主題: 16013

收藏本版

發帖

返回列表

跳至頁

查看: 29034 | 回覆: 2

自理 [複製鏈接]

csir3290

子爵府

積分: 12008

1^#

發表於 23-8-13 13:55 |只看該作者 |倒序瀏覽 |打印

為咗佢兩姊弟可以分房，呢輪屋企都正在裝修，到咗裝修嘅最後階段，我哋全家都要去酒店住咗幾個星期。由於家姐已經過咗12歲，所以唔能夠再迫埋一間房就變成咗要住兩間房，呢一次係第一次佢兩姊弟自己一間房，我同老婆又住另外一間房，因為過往咁多次旅行又或者係住迪士尼都係我哋全家人喺埋同一間房。由於係住幾個星期，咁所以酒店都唔係日日都會有人執房，就變成佢兩姊弟要自己負責執房。我同老婆都冇特別去幫佢哋手，反而係間唔中去佢哋間房度食嘢順便睇下佢哋間房點，又估唔到佢兩姊弟其實都執得算整齊唔會亂七八糟。由於今次要住咁長時間，所以大部分時間都好似喺屋企咁，不過唔同嘅就係除咗一齊出街或者去食飯嘅時間之外，好多時都係佢兩個自己喺房，對佢哋嚟講就係考驗佢哋自理能力同埋自律嘅一次好機會。幸好佢哋都算自律，雖然住酒店但係佢哋都會自己做暑期作業同埋溫習，連夜晚瞓覺都唔使我同老婆操心，佢哋大約十一點零鐘前就會自動過嚟我哋房同我哋say goodnight跟住就瞓覺。細佬就因為升中，佢啲適應課程開始咗所以雖然係放緊暑假，但係日日都要朝頭早一早起身就返學，本來學校好近屋企，但係因為而家去咗酒店度住，咁所以就變咗佢每一朝都要同人逼地鐵返學。雖然今次要住咁耐酒店，但係我同老婆都冇特別幫佢哋執行李，全部都係佢哋自己搞掂，整體嚟講都算做得幾好。間唔中入去間房睇下，雖然都會有啲地方唔係咁整齊，仲可能會篤眼篤鼻，但係都係搵啲地方嚟讚下佢哋，啲唔完美嘅地方就當睇唔到，咁反而慢慢就越做越好，越來越少篤眼篤鼻嘅地方。

我成日都話只要家長肯放低少少自己嘅要求，畀多啲機會細路仔去嘗試，唔好樣樣嘢都插手，唔好少少做得唔好就覺得篤眼篤鼻，將細路仔嘅責任交返畀佢哋自己，其實慢慢佢哋就會越做越好。有陣時見到佢哋啲嘢亂咁放係真係會篤眼篤鼻，好多時都會立即話佢哋，同埋忍唔住手幫佢哋執返整齊，但係其實家長只要忍住唔好出手更加唔好亂發脾氣，話俾佢哋知家長嘅要求，俾時間佢哋完成同完成唔到嘅後果就可以，例如執唔好就冇得去玩之類。繼而當完成就搵佢哋做得好嘅地方嚟讚下佢哋，其實細路仔就會知道家長嘅要求係點，慢慢就會越做越好。我哋要明白訓練細路仔嘅自理能力，係需要畀機會細路仔自己去嘗試，但係唔係一時就會達到家長嘅要求，當中嘅落差家長需要容忍，亦都唔好一覺得細路仔做唔到就樣樣幫佢做咗，到頭來細路仔就會變成樣樣都依賴家長。所以多啲畀機會細路仔嘗試，多啲正面嘅鼓勵，控制自己嘅情緒，將個要求降低少少再慢慢提升，就會令到小朋友嘅自理能力慢慢提升。