少年成長今日: 2|主題: 16015

收藏本版

發帖

返回列表

跳至頁

查看: 31072 | 回覆: 0

成功感推動進步 [複製鏈接]

csir3290

子爵府

積分: 12023

1^#

發表於 23-10-29 11:14 |只看該作者 |倒序瀏覽 |打印

自從阿仔上咗中學之後，佢嘅功課同溫習真係忙咗好多，晚晚都做到九點幾十點先至搞得掂曬所有嘢。雖然阿仔好勤力，但係始終成績出嚟真係冇小學咁得心應手，正如我之前講小學阿仔嘅成績雖然未必係最好，但係通常佢嘅默書測驗分數都唔會低得過80分。上咗中學之後似乎就keep唔到呢個成績，好多時都係合格多少少或者係啱啱好合格嘅分數。甚至乎試過一次半次唔合格添，對於佢嚟講可能上到中學都真係有啲挫敗感。因為試過有陣時佢同我哋講嘅時候都好似唔係幾開心咁。作為家長喺呢個時候就要發揮支持同埋信任嘅角色，因為我哋知道阿仔係真係有溫書，亦都唔係因為懶惰而導致到分數冇以前咁好。如果我哋呢個時間都仲係埋怨或者對佢嘅成績表示不滿，又或者成日都同佢一齊擔心，到頭來只不過係不停削弱佢嘅自信心，對事情一啲幫助都冇。

我哋要知道能夠幫助到細路仔學習最有效嘅方法就係增加佢哋嘅成功感，令到佢哋覺得自己係可以做得到嘅。所以如果父母恰恰相反不停嘅埋怨或者過份強調佢哋做得唔好嘅地方，咁只會係不停削弱佢哋嘅自信，令佢哋覺得自己做極都唔會成功。所以我同老婆對阿仔都只係一個態度，就係我哋見到佢有用功溫習，我同老婆強調嘅係個過程佢有冇盡力，只要有努力就唔好太在意成績，反而應該誇大咁讚賞佢嘅進步，我哋總相信只要家長夠細心，總能夠每一次搵到進步嘅地方去讚賞佢哋，只有令細路仔自己相信佢哋能夠做得好，先至有希望可以改善佢哋嘅成績同埋持續進步。

好多家長都只係睇住個分數去決定細路仔究竟有冇努力讀書或者成績好唔好，因為分數係最直接最容易睇到，但係要協助細路仔改善或者進步，其實只睇分數反而忽略咗好多其他方面嘅因素，做家長嘅反而係要細心觀察細路仔究竟有冇努力，有冇做得好嘅地方，更加係要發掘佢哋有進步嘅地方。如果只係用分數去論成敗而忽視咗細路仔付出嘅努力同埋當中嘅進步，細路仔做極都得唔到父母嘅欣賞同認同，或者做極都去唔到父母要求嘅分數，細路仔自信心最終不停被磨滅，只會感受沮喪，到頭來破壞親子關係之餘亦都唔能夠令到細路仔進步。所以我覺得作為父母最大嘅責任就係要懂得點樣利用創造成功感去幫細路仔建立自信心從而進步。