懷孕前後 今日: 15 | 主題: 330353

積分: 733

1^#

發表於 23-11-1 09:36 |只看該作者 |倒序瀏覽 |打印

過去兩年分別喺仁安同中大生咗兩個bb，等我分享返兩間醫院嘅用後感先，純主觀感受分享，有需要嘅媽媽可以參考吓。

我覺得兩間都係好醫院，喺產科遇到的每一位職員都親切友善，而且好溫柔好照顧媽媽們的需要同感受，所以喺醫院嘅5日4晚（我剖腹產）都感覺被照顧得好妥貼。但兩間醫院都有對方取代唔到嘅好處。

仁安醫院最大嘅好處係經驗豐富！產後當天及第二天早上我仲未落得床同插住尿喉，姑娘會定時來幫我清潔下身、換衞生巾、網褲同產後墊等等，我記得每次姑娘都叫我唔駛郁，佢會搞掂哂。對於產後肚皮有條新鮮疤痕嘅我「唔駛郁」實在太重要喇，而中大醫院的姑娘有幾次都需要我撐起自己配合佢換墊同清潔，都幾大考驗。而第二天需要嘗試落床，仁安醫院的姑娘會提我幾點塞咗同食咗止痛藥，藥效期間嘗試落床無咁辛苦，所以我生第一胎時覺得落床嘅痛係完全可以忍受到。而喺中大醫院，我冇為意藥效嘅時間，後來姑娘話口服止痛藥效4小時，我落床嘅時候係食藥後三個幾鐘，唔知關唔關事呢，我覺得今次落床非常痛。（我兩次都搵同一位醫生開刀，照計手勢應該一樣？）。所以仁安醫院最大嘅好處係因為職員嘅經驗非常豐富，喺照顧上好多細節位令到我因生產帶來嘅嘅痛楚大大減少，我一直都同朋友形容生第一胎覺得基本完全唔痛。所以如果係好怕痛嘅媽媽，仁安醫院呢個好處都好重要。

另外仲有一個因為仁安醫院嘅經驗豐富而帶來嘅好處，就係嗰個職員同部門嘅配合都好smooth，由入院登記到上房、生產、產後護理等等都非常順暢；反而剛到中大醫院時感覺有少少怪怪地，企門口嘅保安攔住問我同老公去邊，本來以為係指引我哋去登記入院，但原來喺醫院大門已經要登記我同老公嘅全名同電話號碼，然後由入院到上房，有四五個職員重複問我一堆「有冇食物藥物敏感、有冇膠布敏感、知唔知今日嚟做咩、懷孕幾多次等等嘅問題」，如是者我重複答咗四五次。當然，呢個位係好Minor，不過兩間醫院嘅順暢度真係有分別。

而中大醫院令我最深刻嘅係母乳姑娘！中大醫院嘅特色係可以隨時將BB推喺床邊，所以不論媽媽餵奶、親友探訪等等都可以喺床邊直接同BB相處，而有咩問題姑娘都會直接嚟到床邊支援。記得產後第四天開始上奶，個胸谷到好硬好辛苦，真係好感謝當晚有母乳姑娘嚟到我床邊，單對單咁幫我按摩卒散啲硬塊，第二日感覺真係鬆返好多。記得喺仁安醫院都有母乳姑娘，不過當時各位媽媽要定時去育嬰室餵BB，母乳姑娘喺育嬰室對住咁多位媽媽，最多係教我哋用凍毛巾冰敷或者示範一啲按摩嘅手法，好難做到中大醫院嗰種單對單嘅支援。

總括嚟講，喺第四日上奶之前，我有d後悔第二胎冇喺仁安醫院生，因為感覺今次受嘅痛楚多唔少。當然，中大醫院比較新，環境靚過仁安好多，而且基本入住嘅已經係半私家房（我第三日開始隔離床媽媽出院之後直程變埋私家房），不過喺疼痛面前，俾我瞓龍床都冇感覺呢。但係第四晚遇到母乳姑娘即刻覺得揀咗中大醫院都好好，姑娘一邊幫我按摩一邊講解上奶、擠奶的理論同手法，按咗一次即刻有效果，第二朝終於由石頭胸嘅地獄返咗出嚟，真係衷心感謝。

結果出院埋單，仁安醫院大概$79,000 ，中大醫院大概$91,000。總括嚟講，兩間都係好醫院，好感謝兩間醫院幫助我順利生咗兩個bb，我同老公計劃中兩個就夠晒數，所以如無意外唔會再生，不過如果真係touch wood有意外的話，我諗都唔難決定兩間之中揀邊一間，因為我真係好怕痛。。。

0 0 0

私人傳訊

ccckaka

複式洋房

積分: 198

2^#

發表於 23-11-1 15:04 |只看該作者

謝謝分享
我之前都係中大同仁安之間選擇
但因為中大唔洗比留位費依家都係book左中大

私人傳訊

ballballbuddy

積分: 2367

MommyPanel勳章最關心BB問題熱投勳章

3^#

發表於 23-11-1 15:48 |只看該作者

謝謝詳細分享!

請問膳食方面，邊間選擇比較多同好味呀?

私人傳訊

積分: 733

4^#

發表於 23-11-1 16:06 |只看該作者

ballballbuddy 發表於 23-11-1 15:48
謝謝詳細分享!
請問膳食方面，邊間選擇比較多同好味呀?

膳食方面仁安醫院選擇多好多同好味，中大醫院選擇少同味道一般呀。

私人傳訊

積分: 733

5^#

發表於 23-11-1 16:10 |只看該作者

ccckaka 發表於 23-11-1 15:04
謝謝分享
我之前都係中大同仁安之間選擇
但因為中大唔洗比留位費依家都係book左中大

中大環境靚同埋可以隨時推BB嚟身邊都係好正嘅！祝你生產順利呀！

私人傳訊

tiffanie0831

積分: 1131

6^#

發表於 23-11-1 18:10 |只看該作者

Chbb1224 發表於 23-11-1 09:36
過去兩年分別喺仁安同中大生咗兩個bb，等我分享返兩間醫院嘅用後感先，純主觀感受分享，有需要嘅媽媽可以參 ...

謝謝分享我見佢可以隨時推bb入房真係好吸引。
仁兩次價錢差左咁多嘅？係因為相隔嘅時間長？

私人傳訊

積分: 733

7^#

發表於 23-11-1 20:49 |只看該作者

tiffanie0831 發表於 23-11-1 18:10
謝謝分享我見佢可以隨時推bb入房真係好吸引。
仁兩次價錢差左咁多嘅？係因為相隔嘅時間長？
...

我冇仔細對比兩次嘅賬單，不過有留意到事隔兩年產科醫生有加咗幾千蚊價；另外，我喺仁安住四人房，而中大最基本嘅房型已經係二人房，本身個package嘅價錢就已經係中大貴啲。

俾多少少資訊你，我有中大校友證，所以中大嘅價錢已經有少少折扣；而兩年前bb喺仁安因為黃膽偏高照左一日燈，仁安計埋照燈個價錢都比已經有校友折扣嘅中大價錢平啲呢。

私人傳訊

積分: 733

8^#

發表於 23-11-1 20:49 |只看該作者

tiffanie0831 發表於 23-11-1 18:10
謝謝分享我見佢可以隨時推bb入房真係好吸引。
仁兩次價錢差左咁多嘅？係因為相隔嘅時間長？
...

私人傳訊

Da____

積分: 2470

9^#

發表於 23-11-1 21:23 |只看該作者

點解唔照去番仁安既, 想試新醫院?

私人傳訊

tiffanie0831

積分: 1131

10^#

發表於 23-11-1 23:09 |只看該作者

Chbb1224 發表於 23-11-1 20:49
我冇仔細對比兩次嘅賬單，不過有留意到事隔兩年產科醫生有加咗幾千蚊價；另外，我喺仁安住四人房，而中大 ...

謝謝
但我見就咁睇package仁安 $26000 、中大$28500 好似唔係差好多

咁睇嚟去中大應該都係預十萬左右走唔甩

私人傳訊