少年成長今日: 0|主題: 16010

收藏本版

發帖

返回列表

跳至頁

查看: 44563 | 回覆: 2

信任與自律 [複製鏈接]

csir3290

子爵府

積分: 11982

1^#

發表於 24-1-28 11:26 |只看該作者 |倒序瀏覽 |打印

早幾日同阿女傾開之前因為工作要參加一個好重要嘅會議，開會之前入去會議嘅場地嘅時候，個個參與者都要熄電話確保冇人錄音錄影，跟住阿女就話其實唔熄入咗去都冇人知啦！呀女仲話如果咁嚴重，點解唔入場之前要啲人交曬電話出嚟交畀公司保管先咪仲好。我話咁大個人會自律㗎啦！而且個會仲講明如果有任何人錄音錄影就要付上被公司處分嘅後果，咁大個人都仲唔識自律咩！

咁話題就傾下傾下就轉咗落去我女講話佢學校都係話喺學校入面唔可以開手機，不過從來都冇人會檢查。佢話佢聽到佢有啲唔同中學嘅小學同學講，佢哋啲中學會喺入學校之前要畀部手機老師檢查睇下熄咗機未，最嚴重嘅一間係要交手機畀老師，放學先至可以攞返。我話其實你學校即係信任自己嘅學生，會懂得自律。因為學校嘅責任就係教你哋自律，如果都要收起你部手機又或者要成日檢查，咁根本細路仔就學唔到乜嘢叫做自律。

講真我成日都覺得越好嘅學生就越唔需要管咁多，因為越好嘅學生大部分時間其實都會懂得自律。喺我身邊嘅親戚朋友入面，佢哋嘅仔女唔少都係讀啲band one名校，我真係發覺越係有名同真係band one嘅學校，其實對學生嘅管束就越少，唔會好似有啲學校咁好多唔同嘅校規對學生好多嘅限制，呢樣唔畀嗰樣唔畀，犯咗規又會點罰。但係越係好嘅學校我發覺其實對學生嘅呢啲管束就越係少，呢啲學校最關注嘅都係學生嘅成績。講真有啲名band one學校我見到啲男仔有陣時啲校服仲冇普通學校執得咁嚴，有陣時見到佢哋啲學生恤衫西褲襯對波鞋就返學，我相信呢啲係普通學校一定唔得。尤其是係去到中學，學生正直係反叛期，其實越多管束可能佢哋都只係口服心唔服，成日有機會就會嘗試違反規矩。但係如果學校哋信任佢哋會自律，而佢哋亦都知道違反規矩嘅後果，當放手畀佢哋去試嘅時候，萬一違規佢哋亦都會願意接受同承擔相應嘅後果。而且因為學校肯畀機會同埋相信佢哋會自律，所以相對地佢哋亦都會對學校有更加多嘅歸屬感，因為覺得學校係信任佢哋嘅。而且因為呢一份信任，某程度亦都令到啲細路仔會更加謹慎唔會隨便去違反規矩，違反大家嘅信任。所以我有陣時聽我啲親戚朋友講話佢嘅細路仔讀嘅學校，校規好似唔係好嚴，我就會同佢哋講因為學校信任你哋啲仔女，畀機會佢哋學習自律。同埋我都會同佢哋講其實真係越好嘅學校，先至會越管得少學生，普遍都係比較自由同埋開放一啲。

就係正正係咁，所以我更加覺得教自己對仔女，都係應該要畀多啲機會佢哋去學自律，千祈唔好成日都呢樣唔得嗰樣唔得，正直反叛期嘅細路仔可能都會有一個現象，就係你越係唔畀佢就越係要做，所以與其係咁，不如講多啲「可以」同埋「應該」，更加要信任佢哋嘅自律，咁同佢哋嘅相處先至唔會成日處於一個緊張嘅關係。