少年成長今日: 2|主題: 16013

收藏本版

發帖

返回列表

跳至頁

查看: 28637 | 回覆: 7

重考 [複製鏈接]

csir3290

子爵府

積分: 12004

1^#

發表於 24-6-16 12:11 |只看該作者 |倒序瀏覽 |打印

而家兩姊弟都正直考試時間，咁佢兩個都算非常勤力，日日都自己溫習。有一日返緊工，突然間老婆whatsapp我，send咗細佬學校嘅一張通告俾我睇，然之後話細佬嗰日考嘅一科需要重考。原來係話因為懷疑有部分考試內容，外洩咗畀少部分學生知道，所以為咗公平起見就要重考嗰日嗰科。

嗰晚返到屋企，細佬當然第一時間就講呢件事，佢仲表現得好嬲，因為點解要重考呢？原來係因為個老師用返舊年份試卷，而細佬學校嘅習慣就係啲試卷考完之後唔會收返，咁所以因為呢個老師用返舊年份試卷，所以就有同學唔知係喺啲哥哥姐姐度，定係喺補習社度攞到呢份試卷，而導致有小部分同學知道考試內容。咁至於點揭發就係原來有睇過呢份卷嘅同學，考完之後就好興奮咁喺群組度同朋友講，話自己睇過份卷。點知佢啲朋友就覺得咁樣唔公道我同阿媽講，個家長最終打電話去學校投訴而揭發呢件事。

當事件發生之後，喺家長群組度當然有好熱烈嘅討論啦，仲有家長發起投票睇下贊唔贊成重考，最終喺群組入面大部分嘅嘅家長，都係話為咗公平應該要重考，只有好少數嘅家長覺得唔應該，主要就係話嗰科都唔係主科，其實如果只係為咗公平，其實取消咗嗰科唔計成績唔影響排名咁就可以，何必要啲細路仔重新再溫多一次呢！因為補考嘅日子安排喺考試嘅最後一日先至再重新考過，咁即係啲細路仔都係要再溫多一次。但係好多家長都係覺得唔考呢科會影響成績又會影響排名，亦有家長話取消咗呢科就唔能夠真正知道自己細路仔嘅實力，同埋溫習嘅成效。總之大部分家長都贊成學校嘅處理方法即係重考。

我同老婆嘅睇法就有啲唔同，其實成件事就根本係個老師做錯，因為根本就係佢貪方便只係照用返舊年份卷先搞出呢個問題，簡單啲嚟講重考即係要細路仔去承受大人做錯事嘅後果。咁係咪合理呢？而且細佬呢間中學一向都係催谷成績，所以其實細路仔嘅學習壓力相對都已經比較高，咁何必為咗大人做錯嘅事要細路仔再承受多啲嘅壓力，溫多一次考多一次呢！況且佢哋都只係中一，其實講真考試排名或者考試成績係咪真係咁重要呢！係咪真係非要重考不可，如果冇咗呢一科嘅成績係咪就係對細路仔嘅成績影響好大呢！所以我就覺得既然成個考試對細路仔嚟講，壓力已經咁大，何必額外要再加重佢哋嘅壓力要再考多次呢！所以我同我老婆都好反對重考不過始終我哋都係少數，雖然都有反映，但係最終都係要再重考多一次。細佬亦都要無奈接受，細佬把口就話佢唔會再溫多次，但係以佢嘅性格我知道到考試前佢一定會再溫。

可能對學校同埋大部分家長嚟講，重考就係最公道嘅做法。但係在於我嚟講，我就覺得只係為咗所謂嘅「公道」，就要無端再增添細路仔嘅壓力，而且要細路仔去承擔大人做錯事嘅後果，咁又係咪真正嘅公道呢！好多家長集中討論嘅所謂公道其實只不過係分數上面嘅公道，但正如我咁講，相比起細路仔嘅壓力，對一個中一學生嚟講，分數同成績排名係咪真係咁重要呢？明明諗住考完試就可以有連續嘅星期五六日嘅三連假放鬆一吓，點知而家無端端少咗日假，仲要考多日試，對細路仔嚟講嗰種唔開心可想而知。