少年成長今日: 2|主題: 16012

收藏本版

發帖

返回列表

跳至頁

查看: 27854 | 回覆: 3

棒打鴛鴦！ [複製鏈接]

csir3290

子爵府

積分: 11999

1^#

發表於 24-5-19 11:42 |只看該作者 |倒序瀏覽 |打印

前幾日細佬食飯嗰陣同我哋講佢學校嘅情況，佢話佢嗰日有個同學好唔開心，可以話係雙重打擊。佢就發揮咗佢安慰人嘅長處，走埋去安慰佢。咁我哋問個同學最後有冇好啲，佢話本來都好啲嘅。點知朝早上堂冇耐，呢個同學就突然間畀人叫咗落去見訓導。之後就一直見唔到佢直至到食晏。細佬話見到佢一個人悶悶不樂咁坐咗喺飯堂，而咁啱嗰日細佬又要留喺學校食飯，所以細佬又走埋去陪住佢。跟住細佬話個同學講講下仲流曬眼淚。原來佢話個同學之所以咁唔開心，係因為畀學校發現佢拍拖。細佬話呢個男同學其實係同佢嗰班嘅一個女同學好似拍拖咁，細佬話本來都冇乜嘢嘅，因為其實只不過係每日一齊返學放學咁，冇乜特別嘅行為，個同學話又冇約過一齊出嚟去街，所以極其量都只不過係大家互相有好感咁啦。但係有一日佢哋班有個同學就趁呢兩個同學一齊放學嘅時候喺後佢哋面影咗張相，仲放咗上班群。本來都冇乜嘢，大家都係睇吓笑吓咁，細佬都話佢有睇過張相，但係都唔覺得有啲乜嘢，只不過係佢兩個一齊行放學，又冇拖手。但係都琴日朝早返學嘅時候，原來個女仔個媽媽唔知係咪睇到班群入面嘅相，同埋啲同學笑佢哋拍拖嘅內容，於是就喺番學嘅時間，去到學校門口截咗個女同學返屋企，跟住仲去咗學校投訴，所以個男仔就畀人叫咗落去見訓導。細佬話學校嘅政策當然係唔畀拍拖，但係佢就覺得學校同埋嗰個家長咁做，就搞到個男同學同女同學都好唔開心，當然嗰日成日都再見唔到個女同學返學啦！而個男仔就食完晏之後再要去見訓導。細佬話學校好似只不過係同個男仔傾計不過就傾咗好耐，可能都係教佢唔好拍拖，唔好過早有男女關係之類，但係細佬話學校通知咗個男仔嘅家長，所以個男同學都仲擔心緊番到屋企之後唔知點同阿爸阿媽交代。咁當時其實細佬都冇乜嘢可以做到，只不過係陪住個男同學一齊食飯，安慰下佢。細佬仲好笑話佢連唯一嘅檸檬茶都請咗呢個男同學飲，因為個男同學好唔開心連飯都冇食。細佬自己都話佢唔知道嗰對男女係咪真係拍拖，但係佢就知道今次個女仔嘅家長咁做好似有啲過度緊張。
我明白個女仔嘅家長見到張相覺得自己個女，中一就拍拖可能會好嬲，或者唔知點處理。所以就揀咗一個最激烈嘅做法。可能佢咁做嘅時候淨係諗到要盡快令到佢個女唔好再同呢個男仔拍拖，但係佢冇諗過其實之後仲要喺學校面對同學同老師嘅就只係佢個女同個男同學。可能佢唔考慮個男仔嘅感受，但係都應該要考慮下自己個女嘅感受。講真入得去我個仔間中學嘅學生，絕大部分都係又乖又成績好嘅學生，我相信個女仔都會逆來順受，但係其實喺個女仔嘅心目中又會點樣諗自己嘅家長呢！你一方面我又理解學校點解要同我男仔傾咁耐，講真有個女仔嘅家長嚟到學校咁樣投訴，學校如果唔做嘢又點樣都講唔過去，唔通叫個女仔嘅家長接受同忍耐咩！所以最終就唯有要搵個男仔傾又要通知埋家長，正如我之前講只會越搞越大件事！

作為家長其實我覺得我哋都要接受仔女去到青春期嘅時候，不論係男仔定女仔都會對異性產生好奇，好似我個仔同學呢件事咁，其實中一嘅同學佢哋可能真係未必知道乜嘢叫做拍拖，只不過係覺得好似同個女仔比較啱傾或者有喜歡嘅感覺，根本就未去到所謂拍拖嘅地步。但係如果家長或者學校喺呢個階段只係用禁制嘅方法去阻止佢哋對異性產生好奇，其實效果可能只會識得其反，只會令佢哋收得更埋收得更密。如果好似呢個家長咁，甚至乎係將個問題交咗畀學校向學校投訴，其實我覺得只會令到同個女嘅關係越嚟越差，同時我只覺得呢個家長係放棄咗自己嘅責任，將個責任交畀學校就算，以為用學校出面壓制就可以解決所有問題。如果我哋明白青少年時期對異性產生興趣同好奇係一個正常現象嘅話，作為家長其實嘅責任就係慢慢去引導仔女，如果父母同仔女嘅關係好，仔女遇到喜歡嘅人嘅時候可能都會同家長講，其實家長就應該慢慢去引導佢哋，多啲同佢哋傾計。就算佢哋真係拍拖，其實講真「棒打鴛鴦」嘅方法只不過係令到大家都反感，亦都唔係真係解決到問題。反而如果家長可以開放啲接受仔女嘅一啲諗法，可能仲可以一路睇住關係嘅發展，從中作出輔導或者提醒。對仔女嚟講可能仲易於接受。

講到尾其實中學生開始拍拖，絕對唔係用學校出面就能夠解決問題，反而係家長應該開放一啲，從旁睇住事情嘅發展慢慢去同仔女去傾。講真好似我個仔同學呢個家長嘅做法，我真係唔欣賞，因為可能佢覺得咁樣係最快趣可以解決問題嘅方法，但係其實咁樣我覺得只不過係掩耳盜鈴，因為就算係個男仔又好，佢自己個女都好，都仲要繼續面對將來佢哋仲要喺呢間學校讀書同埋面對朋友嘅問題。但又係咪真係解決到佢哋拍拖嘅問題呢！

0 0 0

私人傳訊

peggyrickie

大宅

積分: 2364

好媽媽勳章畀面勳章

2^#

發表於 24-5-21 13:09 |只看該作者

我同你既諗法都係一樣，應該要接受自己仔女係青春期拍拖，自己都後生過，明白阻止只會導致關係變差！
我女中一都比我發現左佢拍拖，我冇去阻止及鬧佢，我仲講笑咁話邊個男仔咁冇眼光對你有好感呀？之後我女就介紹個男仔比我識！
識左個男仔之後，我都好開門見山話比佢地知有D咩做得有D咩唔做得，我話我接受你地拖下手，因為在所難免，但著住校服就一定唔得，而其他野就留返大個左先做啦！
反而我持咁既態度去處理佢地既感情事，關係比以前更好，我女會同我私下討論個男仔點點滴滴，我又會分享下自己同老公相處經歷比佢知！
我覺得中學時期拍下拖都係成長既必經階段，或者反轉黎諗，2個可以係中學時期陪伴成長，都係一件唔錯既事！