少年成長今日: 2|主題: 16013

收藏本版

發帖

返回列表

跳至頁

查看: 28091 | 回覆: 5

食飯 [複製鏈接]

csir3290

子爵府

積分: 12004

1^#

發表於 24-6-30 11:19 |只看該作者 |倒序瀏覽 |打印

我係一個唔鍾意帶飯返公司食嘅人，因為午膳時間對我嚟講係必須要離開工作嘅地方嘅時間，出去行一陣間，靜靜地食個飯諗下嘢，我連買飯盒返去公司食都唔鍾意，就算唔洗喺自己個位度食，但都總係覺得食食下飯時會有人搵或者放唔低啲工作，所以食午飯嘅時間對我嚟講就係避開下啲工作，畀自己靜靜地諗下嘢行下嘅時間。所以經常都會光顧附近嘅快餐店，搞掂餐晏晝之後就再去散下步當做下運動。公司附近有一兩間快餐店我都會經常幫襯，因為貪佢哋就算午飯時間，但因為喺屋邨入面所以都唔係好多人，而且屋邨入面雖然都有啲學校，但係因為我食晏晝嘅時間同附近學校方食晏嘅時間唔係咁相同，所以好容易就搵到位，因為人唔多所以都唔會好嘈！

但係由六月開始，可能大部分嘅小學都係考完試放半晝，所以突然間快餐店喺我食飯時間嘅時候就多咗好多家長同埋細路仔，本來以前係唔會撞到嘅，因為小學通常都喺學校食晏，但係而家因為放半晝，好多家長接咗細路之後就帶佢哋附近去快餐店度食晏晝。本來都可以相安無事，但係當呢一班家長同埋細路嚟到快餐店之後，就改變咗成個快餐店嘅環境，細路仔喺快餐店度走嚟走去嘈圈巴閉嘅有啦！一去到快餐店家長想班細路靜靜地食嘢，就即刻擺部手機或者ipad出嚟打機嘅有，睇片嘅有，更加有嘅就係大群嘅家長自己坐埋一齊聯誼，見到細路仔唔食飯就出聲話兩句然之後又繼續傾，因為家長有家長傾，細路有細路玩，嘈喧巴閉不特止，有陣時仲食到污糟邋遢一枱一地都係。當然當中總有少數嘅家長係教得好好，同自己嘅仔女好有規矩咁喺度食飯，唔會嘈喧巴閉但係呢啲都真係少數。由六月開始，一路到佢哋放暑價前，我平時去開嘅呢兩間快餐店食飯嘅環境會係一個大轉變。一路要去到開始放暑假先至回復平靜。

其實我一路都唔明快餐店就係食飯嘅地方，而且有名你叫快餐店，就係快快脆脆食完飯就離開，留低位置畀下一批要嚟嘅人。喺食嘢嘅地方教細路仔規規矩矩食餐飯其實都係做家長嘅責任，快餐店唔係遊樂場你畀啲細路仔放電，其實人哋都想安安靜靜食餐飯。要放電不如畀佢哋去公園啦！唔係話食飯嘅時候同其他家長傾偈有問題，但係都應該關顧自己仔女食飯嘅情況，唔係塞部手機，ipad，又或者畀佢哋亂咁跑自己食就算數，講真睇啲細路仔食飯就知道家長嘅家教係點樣。得把口講點教點教係冇用，其實睇細路仔嘅表現就睇到個家長真真正正係點教。況且食嘢食到一枱面，一地下都係。都已經唔係叫你自己執返曬自己嘅嘢，只不過係食得乾淨啲同埋整齊啲咁解。當然有人話快餐店已經請咗人負責執枱面同清潔，但係有人同你執枱同自己嘅食相係點係兩回事，係咪有人執自己就可以食到幾污糟都得呢！當然我到而家都覺得最好就係教細路仔食完飯，自己執返自己食過嘅嘢，離開嘅時候留低返一張乾淨嘅枱面畀下一位要用呢張枱嘅人。我知道唔係個個都做到，亦都唔係要求個個都做，但係食飯食成點就係個人修養嘅問題，有啲家長幾咁關心細路仔將來升邊間中學，學校校風好唔好等等，尤其是係而家六月幾嘅時間，就經常聽到家長喺食飯嘅時間傾呢個話題，但係望一望佢哋啲仔女點樣食飯，望一望佢哋走咗之後淨低喺枱面嗰一堆慘不忍睹嘅餐具，同埋地下嘅垃圾，就更加覺得佢哋只關心仔女嘅學識，但係修養又係另一個問題。好學校固然教到知識，但係品德修養就需要有好修養嘅家長先至可以事半功倍。所以我真係覺得喺快餐店睇到家長同仔女嘅食相，就真真正正睇到家長教導子女嘅高低。