少年成長今日: 0|主題: 16018

收藏本版

發帖

返回列表

跳至頁

查看: 24085 | 回覆: 2

有驚無險又過一年 [複製鏈接]

csir3290

子爵府

積分: 12051

1^#

發表於 24-7-21 10:37 |只看該作者 |倒序瀏覽 |打印

兩姊弟終於都放暑假了！放暑假之前當然係攞成績表同埋結業禮啦！記得舊年呢段時間其實為細佬好擔心。因為舊年呢段時間細佬剛剛中一放榜，其實講真佢派第一志願而且間學校都係好好嘅，對於好多家長嚟講派到呢一間中學其實都應該好放心。但係其實細佬就唔係咁鍾意，因為佢好想同家姐一間中學，雖然家姐間中學比起細佬所派嘅學校喺排名上會差少少，但係其實都係band 1a同band 1b嘅分別，我諗對於大部分家長嚟講，派到細佬呢間學校都唔會再諗去叩門，就算真係轉都係再轉高一啲排名嘅中學。但係見到細佬咁想去同家姐一間，而且細佬而家所派嘅呢一間中學係出名谷成績嘅中學，所以我哋都有擔心細佬會讀得好辛苦，既然佢都想轉，而且我哋諗住由一間成績好啲嘅中學轉去所謂低少少嘅學校應該都冇問題啦！點知到最後家姐間中學都係唔收細佬。最終細佬都接受要同家姐分開去另外一間中學到讀。

所以舊年呢段時間其實都要同細佬做好多心理預備，要細佬接受去另外一間中學而且可能會讀得比較辛苦一啲。我同老婆都擔心細佬喺呢間學校會讀得辛苦，尤其是參加完編班試之後，細佬被編入數學輔導班。我哋都擔心細佬可能有啲難接受，因為始終佢喺小學嘅時候一向都係精英班，但係突然間變成數學輔導班。幸好我同老婆教出嚟嘅仔一向都係樂觀性格，佢又好似冇乜點咁欣然接受，係呢一年入面佢仲間唔中識得自嘲，有陣時佢計唔到啲數都仲會識得講「梗係啦！我係數學補底班㗎嘛！」。

其實佢兩姊弟去到六年班下學期開始到上中學，我哋都已經冇乜跟佢哋啲功課，測驗考試都係佢哋自己溫習。細佬上到嚟升中一我哋都會擔心佢跟唔到，尤其是喺第一次測驗之後，因為佢以前小學從來未試過有科目唔合格，但係中學嘅第一個學期測驗佢就中文唔合格。我同老婆都冇特別話佢，我哋都覺得細路仔上到中一係要接受一啲轉變，而呢啲轉變係需要時間慢慢去適應，對於佢有科目唔合格又或者有啲科目唔再好似以前咁高分，我哋一啲都唔介意，反而可能係佢自己仲有少少介意。但係我哋都同細佬講只要盡力就可以，我同老婆只係同佢檢討一下，可能喺今次溫習上面有啲乜嘢情況可以再做得好啲。喺呢一年入面我都見到細佬其實自己都會緊張，佢對自己嘅學業都有要求，我同老婆依舊都係信任佢放手畀佢自己去嘗試，冇特別話因為邊一科唔合格而要佢補習或者做啲乜嘢補充練習，反而上到中學我同老婆都已經再冇買啲補充練習畀佢做，因為佢呢間中學嘅功課同埋學業壓力都已經幾大，就算再買補充練習畀佢做，根本佢都唔會有時間再做。我哋唔想連佢僅有嘅休息時間都剝削埋。我有陣時同細佬講我話其他家長可能係逼佢幾時溫習，幾時做功課，我就反而係成日提佢幾時打機同埋幾時去睇下電視睇下戲咁，無非都係想佢唔好咁大壓力，同埋等佢知道父母係信任佢，想佢多啲休息。

其實去到學期中考試，佢嘅中文依舊都係唔合格，我同老婆都仲有啲擔心，但係見佢其他科開始都慢慢有進步，所以我哋唔想針對佢科中文，反而係欣賞佢其他科嘅進步亦都讚佢嘅讀書方法開始見到效果。至於中文我哋都係唯有繼續提佢，因為佢嘅弱項係啲讀本問題，我哋幫佢問過人其實都係提佢要早啲溫習。我哋冇特別逼佢，都係繼續由得佢自己處理，只不過間唔中都會提下佢要早啲開始溫定中文啲讀本問題。到下學期學期中嘅測驗，見佢中文雖然都仲係唔合格但係開始有啲進步，佢自己都開心。最終去到學期尾嗰次考試，佢最開心嘅就係自己中文終於都合格，而且分數都唔算係太差。就係咁戰戰兢兢我哋兩公婆都見佢開始慢慢適應中學嘅生活，同埋學習情況開始都上軌道。估唔到呢個小朋友喺下學期仲可以考到全級三十幾名，真係有啲出乎我哋兩公婆嘅意料，而且仲由數學輔導班，出年變成可以入返精英班。細佬自己都好開心。但係我同老婆反而有少少擔心嘅係喺精英班度佢會讀得更辛苦，因為中一嘅時候佢係數學補底班，但係喺呢班入面佢可以考全班第二，但係去到精英班可能會更加辛苦壓力仲大。啱啱上個禮拜我哋見到佢而家成績好咗，我哋仲問佢仲想唔想轉去家姐間中學，我哋以為佢都會繼續嘗試啦！點知反而佢而家話「讀生不如讀熟」，佢話驚轉咗反而仲唔知點咁，所以最終佢都係選擇繼續留喺度，咁我同老婆仲提醒佢唔好畀咁大壓力自己，放鬆啲心情只要盡力畀心機就可以。

講真由佢上學期嘅時候我同老婆都有啲擔心驚佢讀唔掂，到經過今年之後，我哋更加相信原來只要肯信任，畀多啲鼓勵，同嘗試同佢一齊搵方法去改善，最終都可以慢慢解決問題。

0 0 0

私人傳訊

V_VPONG

伯爵府

積分: 15507

2^#

發表於 24-7-22 00:44 |只看該作者

回覆樓主:

加油，我家青年人都係band1中學，剛剛升中都擔心跟唔上，現在還考到獎學金，不要低估佢地嘅能力

私人傳訊

full_working

別墅

積分: 824

3^#

發表於 24-7-23 18:08 |只看該作者

csir3290 發表於 24-7-21 10:37
兩姊弟終於都放暑假了！放暑假之前當然係攞成績表同埋結業禮啦！記得舊年呢段時間其實為細佬好擔心。因為舊 ...

其實講嚟講去就係家長自己自尊心問題。

由樓主好想佢入Band1 谷嘅中學,到跟住又話好擔心佢讀得辛苦，跟住又話入左補底班，又驚自己差過人，但又擔心要谷成績，其實係你想入，定你仔想入(emoji) 到最後如「你」所願入返精英班，我都恭喜你既。

不過坦白講好多時都係家長自己面子問題，個個口就話唔介意盡咗力又得，到頭來咪又個個怕蝕底要硬塞d 細路入左先算(emoji)