少年成長今日: 0|主題: 16017

收藏本版

回覆發帖

返回列表

跳至頁

查看: 2858 | 回覆: 0

補充練習 [複製鏈接]

csir3290

子爵府

積分: 12040

1^#

發表於 25-7-27 11:30 |只看該作者 |倒序瀏覽 |打印

啱啱書展完咗，睇新聞知道原來喺書展最好賣嘅除咗係啲消閒書之外原來就係啲補充練習。新聞訪問啲家長，有啲真係去掃貨一樣，一疊二疊補充練習拎走。有家長仲講到明係因為細路仔要考呈分試所以嚟到要買定啲練習畀細路仔預備。
講真書展係一個比細路仔培養閱讀習慣嘅好地方，本來細路仔開開心心去睇書，仲可以買自己鍾意嘅書，但係變咗走嘅時候係大疊練習拎返屋企，咁佢哋又點會開心呢！其實都有啲奇怪，我諗補充練習呢一個市場其實可能真係喺中國人社會度獨有，我自己都試過去外國行書店，我真係未曾試過喺外國嘅書店度搵到有一個位置專係擺補充練習嘅地方。喺香港只要你行入書店，其實最多家長嘅地方就係買補充練習嘅位置。我成日都話如果要培養細路仔睇書嘅習慣就要多啲帶佢哋行書店行圖書館，但係如果家長只係顧住邊本補充練習適合仔女，其實到頭來只係嚇怕咗佢哋。

坦白講我都明白補充練習對家長嚟講有幾重要，我自己喺我對仔女細個嘅時候，其實都有畀補充練習自己對仔女做，但係而家嘅情況就好似發展到家長要鬥做得多同埋要鬥做得全面，總之其他細路仔有做，自己個細路仔就一定要做，唔做就好似會蝕底咗咁。講真我唔反對用補充練習，因為我自己都有用，但係做補充練習我自己就覺得一定有方法同埋唔可以盲目咁樣樣只係俾本練習出嚟，就叫啲細路仔做曬，咁只會嚇怕咗佢哋，如果嚇怕咗佢哋，其實到頭嚟個效果只會適得其反。對於我自己嚟講，其實補充練習嘅目的好清晰，第一就係要了解仔女其實喺日常學習上面有啲乜嘢學得唔係咁好嘅地方，第二就係作為長假期嘅時候嘅一啲補充。講真細路仔日日返學，放學返到屋企都有一大堆功課做，如果再盲目咁要佢哋做練習，只會令到佢哋越嚟越驚。所以我自己喺平日返學時間就一定唔會畀補充練習自己對仔女做，補充練習一定留返喺長假期或者係考試前作為溫習之用。另外一個好重要嘅策略，係家長一定要同仔女睇返佢做嘅練習，我嘅意思係唔係只係對答案咁簡單，而係真係要了解細路仔做錯啲乜嘢，從而知道細路仔對邊啲概念掌握得唔好，然之後慢慢同佢哋改正等佢哋了解返正確嘅做法。最最最無效嘅用法，就係只係叫細路仔做完然後自己對答案。對細路仔嚟講，做練習係一定唔開心，但係如果家長能夠耐心教返佢哋做錯嘅嘢，而由練習入邊亦都令佢哋睇到自己邊啲嘢其實係做得好嘅，家長多啲去鼓勵咁樣先至可以令佢哋減低對做練習嘅不滿同唔開心感。另外家長千祈唔好畀藉口自己，成日覺得自己唔識教，所以就只係掟本練習畀佢哋自己做然後叫佢哋自己對答案，小學嘅嘢有幾深呢？如果家長只係掟本練習但係又唔盡自己責任嘅話，其實最壞嘅情況只不過係令到佢哋越嚟越唔鍾意做，越嚟越唔鍾意學習。另外好似我自己咁，其實自細開始放長假期都會每日做一至兩個練習，慢慢等佢哋習慣咗，就算喺假期入面都唔係淨係玩，每日都要有學習嘅時間。只要從細開始適應而份量亦都唔好咁多嘅話，其實細路仔係會適應亦都明白呢個係學習嘅責任。再者其實我好建議利用一啲補充練習，形式係一個個單元測驗咁樣嘅練習係去到幫仔女喺考試之前作為一個總結嘅溫習，透過呢啲單元嘅溫習家長亦都好清楚可以了解到細路仔喺邊啲部分特別做得冇咁理想而加強喺嗰啲部分嘅溫習。所以其實補充練習都有佢嘅作用。好似我自己對仔女嚟講，考試前有陣時真係唔知點樣幫佢溫習，如果淨係同佢哋背同淨係同佢哋讀，又好似唔知道佢哋邊啲嘢唔識，所以我就好建議利用呢啲以測驗形式一個個單元嘅練習，喺測驗考試前畀對仔女去做。從而令到大家都知道喺溫習嘅時候邊啲係溫習嘅重點。

補充練習唔係做得多就好嘅，只係量多但係細路仔真正學到幾多呢？所以利用補充練習去幫細路仔提升學習嘅效能其實係真係需要技巧同耐性，千祈唔好以為將市面上所有嘅補充練習買曬返屋企，細路仔嘅成績就會有所提升。講真，學校成績最好嘅學生又係咪真係只係靠不停做好多好多練習而達到呢？所以唔係多就好，反而要用得有策略同埋家長係需要花更多嘅時間去陪細路仔一齊運用補充練習咁先至可以達到實際嘅效果。多唔係一定好，有陣時如果家長肯用時間一本兩本就已經可以發揮好好嘅效果。