少年成長今日: 0|主題: 16013

收藏本版

回覆發帖

返回列表

跳至頁

查看: 19956 | 回覆: 0

儀式感 [複製鏈接]

csir3290

子爵府

積分: 12012

1^#

發表於 24-12-29 11:57 |只看該作者 |倒序瀏覽 |打印

聖誕價前同老婆商量平安夜同聖誕節去邊度同對仔女食個聖誕大餐。我老婆就冇乜所謂去邊度都得，但我就有一兩間餐廳好想去，都係啲傳統食聖誕餐嘅地方。忽然間，老婆就話我個人好有儀式感，我自己諗下諗下都覺得係，我哋一家人，都總會因為某啲時間而做某一啲嘢，例如開學前我老婆必定就同我對仔女去文武廟祈福，1月1號就一定係成家人去郊外行大運，聖誕節就一定搵達地方一齊食聖誕大餐，中秋節就一定係一家人出去賞月，而農曆新年嘅年三十晚，就通常都係食完團年飯之後就成家人出街睇場戲渡過年初一等。啱啱先至又同老婆講開話不如12月31號去睇下日落，話曬都叫做2024年嘅最後一次日落，又係畀我老婆話我咁有儀式感。

但係我總係覺得做咁多嘢，其實都係想增加仔女同自己嘅回憶，多啲一家人嘅聯繫。正如我而家都成日同對仔女講，我以前細個對夏天最有回憶嘅就係多數星期日都會同佢哋阿爺一齊去沙灘遊水。又或者間唔中都會同佢哋講起自己細個同佢哋阿爺一齊嘅一啲回憶。到而家自己做老豆就當然更加在意希望同對仔女製造更加多嘅回憶，到佢哋將來自己大咗嘅時候，每逢過時過節都起碼會有同自己一齊嘅開心回憶。

自己諗返以前未有仔女之前，其實都唔係一個咁有儀式咁嘅人，大時大節都冇乜所謂，但係到自己做咗父母，就總係想製造多啲傳統同埋習慣，起碼趁自己對仔女仲係細嘅時候開始，就可以同佢經歷唔同嘅嘢，起碼到而家對仔女雖然都讀中學，但係到呢啲過時過節嘅時候都仲係會一家人一齊做某一啲嘢。所以我非常贊成其實做家長真係要刻意去諗下點樣製造一啲家庭嘅傳統嚟增加同仔女之間嘅聯繫。呢一啲點點滴滴嘅累積，將來就會成為仔女傳畀佢哋下一代珍貴嘅回憶，亦都係父母同仔女之間無形嘅連繫。