少年成長今日: 0|主題: 16013

收藏本版

回覆發帖

返回列表

跳至頁

查看: 16748 | 回覆: 1

各有諗法 [複製鏈接]

csir3290

子爵府

積分: 12014

1^#

發表於 25-4-20 12:04 |只看該作者 |倒序瀏覽 |打印

上個禮拜同阿仔一齊去剪頭髮，講真阿仔而家讀到中二都仲肯同我一齊去剪頭髮都算係咁。阿仔細細個就由我老婆負責幫佢剪，跟住之後佢就開始同我一齊去剪頭髮，記得佢細個讀緊小學嘅時候都，佢仲係同我剪埋同一樣嘅髮型，總係覺得男仔只需要鏟短就可以，直接到佢讀中一，佢開始對自己嘅髮型有啲要求，唔再係好似以前咁淨係鏟短就可以，但係我老婆就因為已經習慣咗佢短髮，所以成日擔心佢留得長得滯，會返到學校畀人話，但阿仔就對自己嘅髮型有啲要求，又唔想好似以前咁淨係鏟短，幸好阿仔一向都聽我老婆講，唔會同我老婆有啲乜嘢拗撬。但係我就知道佢有少少唔開心。幸好因為係我同阿仔去剪頭髮，咁所以我就同阿仔講，我話其實我冇乜所謂，你要點剪自己決定，不過最緊要知道一樣嘢就係，如果畀老師捉嘅話咁你自己要負責，咁終於去到髮型屋，我都冇同髮型師講話要點樣幫阿仔剪，就由得阿仔自己決定。阿仔終於都按自己嘅諗法去去同髮型師講，話畀佢聽想點剪。咁原來阿仔自己都緊張，都會驚犯校規，所以佢同髮型師講話唔好剪咁短，但係就唔可以冚過耳仔同埋眼眉，最好笑係髮型師同佢講係咪想剪到好似啲韓仔咁，阿仔話係，咁髮型師就即刻明曬佢想點剪。剪完之後阿仔好滿意，我亦都冇乜擔心，因為總之同阿仔講咗如果返到學校畀人捉，佢自己要負責。返到屋企我老婆都有開聲話點解唔係鏟短，咁我話佢鍾意咪由得佢，而且佢自己都講咗畀髮型師聽要點剪先至唔犯校規，況且如果畀人罰要重新再剪，咁我哋就會喺佢嘅零用錢度扣返剪頭髮嘅錢，而呀仔自己亦都應承負責。咁我老婆亦都冇聲出由得佢。第二日我同老婆放工返到屋企第一件事梗係問阿仔返到學校有冇畀老師捉，佢話梗係冇啦！因為佢啲頭髮又冇過眼眉又冇遮耳仔，咁我話咁咪得囉！以後就跟呢個髮型去剪就冇問題。我老婆亦都冇說話好講，而且之後仲開始慢慢習慣佢而家呢個髮型。

細路仔去到呢啲時間其實總有自己嘅諗法，同父母一向嘅了解可能有唔同，但正如我成日都講，做父母只需要畀仔女了解清楚後果，其實喺可能嘅範圍入面都應該畀佢哋自己去選擇，況且又唔係啲乜嘢大嘅問題，錯咗可以改正，咪由得佢哋試下。咁樣又唔會令到細路仔覺得父母樣樣都唔同意佢哋，亦都會令佢哋覺得父母會尊重佢哋嘅諗法，咁做父母嘅又何樂而不為呢？

講起我記得阿仔二年班曾經為咗著唔著校褸返學同我老婆鬧到發曬脾氣，幸好平時都係我湊阿仔返學。嗰次臨返工老婆臨出門口千叮萬囑阿仔要著校褸返學，話驚佢凍親，但呀仔就死都唔肯，淨係話著冷衫，我老婆發曬忟憎，阿仔又扭曬計，幸好老婆趕住出門口，我湊阿仔返學嘅時候，同阿仔講咗天氣凍，你可以自己決定，但係如果凍你就唔好嘈，所以終於佢都只係著咗冷衫返學，咁佢就開開心心咁跟住我出門口，但係返到學校之後佢就知道凍，自此之後，佢出親街都會問我老婆著乜嘢褸，到而家佢已經中二，但係都仲仍然每一次出街都係問我老婆著乜嘢褸。

所以我總覺得做父母唔好成日為啲雞毛蒜皮嘅嘢同啲細路仔嘈，有陣時咪尊重下佢哋嘅諗法，雖然有時明知佢會錯，但係你咪畀佢試下，最緊要等佢知道要承擔責任，錯咗咪改返囉，又唔係乜嘢大問題。但係如果自細開始識得訓練佢哋互相尊重，到頭來其實對大家嘅關係只會有好處。況且細路仔總需要有機會學習面對錯誤失敗同埋點樣去承擔責任。