少年成長今日: 5|主題: 16017

收藏本版

回覆發帖

返回列表

跳至頁

查看: 1242 | 回覆: 0

派成績表之後 [複製鏈接]

csir3290

子爵府

積分: 12040

1^#

發表於 3 天前 |只看該作者 |倒序瀏覽 |打印

放暑假前應該啱啱派咗成績表，家長就要好好利用派成績表呢個機會嚟同仔女好好地傾下佢嘅成績呢！我所講嘅傾並唔係鬧，其實仔女嘅成績做父母嘅大概都應該心中有個譜，我諗應該唔會去到派成績表嗰日先至突然間發現原來仔女嘅成績咁差或者咁好！所以派咗成績表先至鬧根本就冇用，亦都唔會聽得入耳，所以真正嘅傾其實應該係平心靜氣大家去檢討下或者傾下以後點樣改善，當然最好就係先搵下有冇地方可以讚賞吓先。如果仔女已經去到青春期嘅時候，反而更加應該要傾嘅就係對前途嘅睇法。總言之要記住鬧已經冇意思，家長亦都要開放啲去傾下同埋接受仔女嘅諗法。我明白每一個家長當然係希望仔女讀書讀得越高班越好，最好就大學畢業。但係，係咪個個都可以行到呢條路同埋適合呢條路呢！去到呢個時候要同仔女傾，家長最容易跌落去嘅一個位置就係只係識得鬧同埋批判，但係又完全冇提出改善方法或者只係叫佢哋勤力啲。如果只係因為懶，但係家長又淨係只係識得叫勤力啲，而提唔到啲乜嘢實際嘅方式去幫手嘅話，咁又點樣去改善呢！又或者如果仔女根本就唔鍾意讀書，咁係咪真係要傾下大家對前途嘅睇法，同埋會唔會有其他出路呢！所以我再強調其實去到呢個時候只係鬧已經冇用，反而心平氣和多啲聽吓仔女嘅諗法，同埋就住仔女嘅程度多啲佢幫佢搵下唔同嘅資料，大家一齊傾一個合適嘅方法反而仲有建設性。
另外放緊暑假期間，因為派咗成績表嘅關係，好多家庭聚會嘅話題就會落喺仔女嘅成績度，最常嘅話題就係考試考成點？高中諗住揀咩科？或者將來想大學讀啲乜嘢之類嘅問題就成為家庭聚會最常出現嘅話題。做家長就要喺適當時候幫仔女護航，唔好以為仔女考得成績差佢哋先至唔想講，有陣時就算考得成績好其實佢哋都未必想成為親戚朋友嘅焦點話題，所以成績好亦都未必一定想講，所以做家長就要自己醒水，望到仔女嘅面色唔係好想答其實就應該幫佢哋出聲，當然切忌喺仔女面前落仔女嘅面啦！就算考得好亦都唔好攞仔女嘅成績嚟炫耀！好似我阿仔咁，因為已經升中三，同親戚食飯最多問就係諗住將來㨂乜嘢科，但係阿仔其實都未係好有想法，所以通常我就會幫佢答話其實佢都仲諗緊，咁通常啲親戚朋友就唔會再追問。青春期嘅仔女其中一個好唔鍾意嘅就係成為親戚朋友討論話題嘅中心，所以做父母係呢個時間就要懂得轉換話題，更加更加重要嘅就係要保存仔女嘅自尊同面子，千祈唔好亂咁講，亂咁讚有陣時會令到仔女覺得難為情，但係一面倒話自己嘅仔女懶或者其他負面嘅嘢，亦都令到仔女唔開心。所以呢個時間做父母就要懂得轉換話題，如果唔係久而久之仔女只會越嚟越唔想出席親戚朋友嘅聚會。