少年成長今日: 1|主題: 16033

收藏本版

回覆發帖

返回列表

跳至頁

查看: 3869 | 回覆: 1

家務 [複製鏈接]

csir3290

子爵府

積分: 12136

1^#

發表於 25-9-7 11:30 |只看該作者 |倒序瀏覽 |打印

呢個暑假又要經歷工人姐姐放假放過幾月嘅時間，每次工人姐姐放假，就會煩惱屋企兩個小朋友同埋啲家頭細務點樣處理。但係隨住家中兩個小朋友越嚟越大，其實困難都相對減少。我同老婆都要返工，所以最麻煩就係解決佢兩個食晏嘅問題，幸好住得近公公婆婆，所以佢兩姊弟都係上公公婆婆屋企食就搞掂。但係除咗食晏之外，屋企啲家務都要有人處理，而佢兩個都放暑假，所以我同老婆都特登就佢哋攞大假。今次攞假除咗同佢哋去旅行，起碼可以處理少兩個星期嘅家頭細務之外，仲可以一齊去玩下。但係去完旅行返嚟始終都仲係要面對屋企啲家頭細務。佢兩姊弟平時都冇乜做家務，唔好話佢兩姊弟，就算連我哋兩公婆都係靠曬工人姐姐，起碼屋企嘅打掃放工返嚟就有飯食有人洗碗。但係而家佢放咗假就乜嘢都要靠自己。

我同老婆大家未放完假，四個人都喺屋企嘅時候，好多時啲家頭細務就變咗我同老婆一齊做，亦都冇特別叫佢兩姊弟幫手，可能佢哋兩個見到我哋兩公婆平時都唔係好做家務，而家都要洗衫掃地拖地，有陣時仲要煮埋飯，所以佢兩個都會自動自覺幫我哋晾衫同摺衫。但係我哋嘅假期始終冇佢兩個咁長，始終都要返工，所以喺返工前，我哋特登同佢兩姊弟講要請佢哋幫手，每日朝早幫我哋洗咗啲衫同埋起碼幫我哋掃下地。我同老婆每日放工返到嚟，當然要讚下佢哋係好幫手幫到忙！可能佢兩個覺得幫到我哋手，又畀我哋讚，而且都真係見到我哋兩公婆放工返嚟都仲要煮飯同埋做其他嘢，所以佢哋都好樂意幫手。終於要捱咗差唔多兩個禮拜，工人姐姐先至返嚟，之後一切又回復正常。

有陣時家長會覺得叫啲細路仔幫手好麻煩，我自己就覺得對住青春期嘅細路仔，成日用命令式嘅說話其實未必可以，反而做畀佢哋睇，好似呢兩個禮拜咁，其實我哋返工之前都冇特別叫佢哋幫手，但係佢哋見到爸爸媽媽每日都係自己做家務，反而佢哋仲會自己主動幫下手，不過我始終都覺得就算係仔女都好，佢哋幫手都係要講唔該。而另外一個技巧我自己都覺得好緊要嘅就係凡事都唔好奉旨，就算係仔女都係咁話，所以係要請佢哋幫手協助，令佢哋覺得佢哋係可以發揮佢哋嘅貢獻一齊合作，做家長就更加要欣賞佢哋嘅幫忙，咁佢哋先至會心甘情願咁繼續幫手。總之做家長都要明白冇嘢係奉旨嘅，仔女都有自己嘅工作，其實乜嘢都係互相幫忙，亦都要互相欣賞。非常幸運，喺呢幾個禮拜工人姐姐放咗假嘅時候，全家都冇試過因為做家務而有任何爭執，反而大家仲多咗開心相處嘅時間添！

提外話，話說我老婆唔介意煮飯但係最憎就係洗碗，但係如果我要洗碗，我又好唔鍾意人煮飯嘅時候搞到個廚房烏煙瘴氣亂七八糟然之後我先去洗，所以我老婆開頭都係打算叫外賣解決夜晚嗰餐。而我對仔女可能因為媽媽嘅關係，所以亦都一早講明佢哋唔鍾意洗碗。但係我自己就覺得成日食外賣始終唔係咁健康，所以最終一個禮拜都起碼有三四日我自己煮自己洗。我老婆都曾經話放工返嚟仲煮驚我攰，但係我就唔想成日食外賣。可能對仔女都見到我放工返嚟都仲煮飯同洗埋碗，所以佢哋就更加願意幫手分擔其他家務，而我亦都唔會勉強佢哋幫手洗碗。真係原來做家務仔女都會因為家長唔鍾意做啲乜，而變成自己都唔鍾意做嗰樣家務，所以我成日都講做家長千祈唔好忽視自己對仔女嘅影響。