少年成長今日: 3|主題: 16051

收藏本版

回覆發帖

返回列表

跳至頁

查看: 13930 | 回覆: 2

反叛 [複製鏈接]

csir3290

子爵府

積分: 12219

1^#

發表於 25-8-31 12:09 |只看該作者 |倒序瀏覽 |打印

我諗好多家長都會覺得青春期嘅細路仔一個好重要嘅特徵，就係你叫佢去東佢就會去西，你越係叫佢唔好做嘅嘢佢就越係會做，我哋會稱呢做反叛。好多家長都會覺得同呢個階段嘅細路仔相處非常困難，因為佢哋已經唔再好似細路仔嘅時候咁聽話。我甚至乎聽過有人講話「如果你有樣嘢好想做而又想有人幫你做嘅話，最好就係同青春期嘅細路仔講叫佢哋千祈唔好做，咁因為你叫佢唔做佢就自然會幫你做曬！」咁樣講好似好誇張咁，但係亦可以令到我哋呢一班做家長嘅反思一吓，其實點樣同青春期嘅仔女相處會舒服啲。
雖然我哋都知道呢個時期嘅細路仔，你叫佢做，佢就越唔做；你越唔畀佢做，佢就越係想去做。咁我哋同仔女傾計嘅時候，我哋就要記住唔好事事講到咁死，即係一定要佢做乜或者一定唔畀佢哋做乜。試想像以下一個例子，好多家長都會覺得好煩惱，就係青春期嘅仔女拍拖，可能有家長都會試過一知道仔女拍拖，即刻當然好反對，因為我哋總係擔心青春期嘅仔女咁快拍拖會好容易出事，但係你越反對咩！佢哋就越係拍，甚至乎收埋嚟拍，點解會咁呢？因為呢個時間嘅仔女總係覺得要衝破障礙，家長反對佢哋就會更加覺得需要克服呢啲困難，佢哋覺得衝破呢啲重重嘅障礙先至係成功。所以想盡辦法都瞞住家長。但係如果家長唔係咁反對嘅，反而有陣時佢哋會玩吓玩吓，又或者時間耐咗佢哋就覺得所謂嘅拍拖對象未必適合自己，反而仲會容易分手同埋處理。但係如果家長俾嘅阻力越大，反而掩蓋咗佢哋嘅理智，總之佢哋就覺得要衝破重重障礙！不過我唔係話要家長聽到佢哋拍拖要舉腳贊成咁極端，反而講真其實唔拍都拍咗，反而順住個勢發展，間唔中喺側邊提醒下佢哋，可能仲容易溝通仲容易相處。

既然青春期嘅仔女咁鍾意同父母作對咁反叛，咁做家長係咪事事都贊成就可以呢？咁當然唔係咁極端啦！我想講嘅只係話同呢個時間嘅仔女相處，我哋要保持一個開放嘅態度，唔好事事都只係得黑同白，準同唔準。反而要留多啲空間畀大家，有陣時畀機會佢哋去試下，可能仲容易溝通！記住越阻止只有越反叛，所以唔好一開口就係唔畀，就係批判，反而留多啲空間，睇下事態嘅發展，爭取多啲同仔女溝通嘅機會同空間，先可以減少反叛期時候大家嘅爭執。橫掂好多情況之下就算家長講咗話唔畀，但係佢哋都係一定要去做，咁不如留多啲空間畀大家去商量，有陣時順下佢哋意，等佢哋知道家長唔係事事都反對，令佢哋唔會咁容易畀情緒蓋過理智，咁先至可以令到大家嘅關係改善，起碼達到俗語講「有偈傾」先。