想生BB 今日: 0|主題: 109602

收藏本版

發帖

返回列表

跳至頁

查看: 2530 | 回覆: 9

分享: 今日去咗龍母廟 [複製鏈接]

joyheymama

大宅

積分: 1768

1^#

發表於 09-6-30 18:44 |只看該作者 |倒序瀏覽 |打印

其實今日本來係我仔仔既預產期, 只可惜佢係26週時離開咗我……今日放咗自己一日假, 適逢今日係龍母誕, 聽過有BK媽咪話龍媽媽好靈, 我好希望佢可以保祐我再次順利懷孕並平安出世. 因為小產過次兩次, 特別係今次對我既打擊好大………

今日去到荃灣係兆和街(街市街前一條街), 見旁邊有兩間香燭舖, 入左細D個一間請教個好好人既阿姐要買D咩同程序, 阿姐執左份standard既祈福衣紙(記得要話拜龍母)+大香三支+一對香燭+一細扎普通香 ($25), 阿姐仲話龍母鍾意食肉叫我去買D燒肉 (附近街市街有, $30半斤多d), 之後佢教我係佢舖頭前面個車站搭18號綠VAN(去圓玄學院的, $4.1)同司機講係龍母廟落就得喇. 阿姐仲叫我快d, 因為今日11點龍母廟有舞獅儀式.

落車之後仲要行一段斜路 (都幾斜, 行大約七八分鐘, 可以揸車上, 有少量車位), 再行廿幾三十級樓梯到. 我去到11:15左右, 真係好熱鬧, 但人唔太多. 裝完香, 化寶時會有個伯伯問你姓咩, 然後幫你”品”+化寶, 佢會問你收利是, 所以各位有興趣去既姊妹記得準備. 之後同佢講我想摸龍床, 佢就幫我叫另一個嬸嬸.

龍床是在樓上的, 龍床對着一尊龍母像, 嬸嬸叫我先叩三個頭, 之後係龍床張被下抽出一封利是. 我抽了”貴人扶持”, 很不開心立即想哭了, 嬸嬸在旁說有貴人都好好呀. 我答佢其實我是想有BB的, 語帶哭意(其實我當時D眼淚已經快要流出嚟), 嬸嬸好好人, 佢即刻話”唔緊要代你老公抽多次, 記得講佢個名”, 原來要講名, 我頭先無呀! (P.S. 姊妹記得要品自己個名喇). 嬸嬸叫我入香油錢, 再叩三個頭, 我一邊叩一邊講我老公個名一邊喊………我真係好想要個BB, 平平安安健健康康出世就得喇, 生男生女都無所謂…….之後再抽過, 今次係”添丁發財”呀! 我開心到即刻再叩多三個頭!!!

之後嬸嬸同我講, 如果有左可以去求個平安咩(唔記得左), 封利是到年底要化左佢, 還神就要係過冬之後, 立春之前........我興奮到唔記得咁多喇, 不過如果真係中左, 返去再請教過囉! 如果真係, 我一定搭的士上 + 買成斤燒肉俾龍母! 生埋再抬隻乳豬都願呀!

在此祝各位姊妹心想事成, 個個抽到”添丁發財”!