http://forum.baby-kingdom.com/thread-2553102-6-1.html
轉載 親子王國- 夫妻感情
這愛有多重 - 人間悲劇
呢個係一個關於我一個好熟既男性朋友既故事。
我個朋友，今年28歲。佢未結婚之前，已經非常赤貧。我試過同佢以前個女朋友(依家個老婆)，煮五蚊米粉，3個人用五蚊食足3餐。但大家唔好以為佢一日半日洗五蚊。佢係幾乎日日都係只係用五蚊過一日。因為佢話唔鐘意錢。所以佢完全冇動力搵錢。我識左佢咁多年，冇一份工係做得長，因為佢話佢要搵份佢鐘意做既工先會有心機做。本來，抱住咁既思想，過1個人既生活，完全冇問題，反正衰都係一個人衰，點知，最唔應該發生既事，偏偏又發生左。
年幾前既某天，佢同我講，話佢女朋友「中左頭獎」，但係佢懷疑個仔唔係佢既。因為之前佢同佢女朋友分過一段時間手，佢女朋友同過另一個男人一齊。佢女朋友知道有左之後，想落左佢，但我個朋友因為想箍住佢女朋友既心(怕佢黐返佢果個男人度)，再加上唔想殺生，再者落左bb會容易有婦女病，所以就叫佢女朋友生左bb落黎。我當時已經叫佢唔好生。因為佢窮到褲穿窿(失業+欠債)，再加上個b又唔係佢既，但佢堅持話因為「愛」佢女朋友，所以可以接受佢既一齊。於是佢地2個就草草結婚。
我個朋友係信佛既。佢老婆陀個bb個陣，2個人已經食齋。但我個朋友既教育方法實在太另類。佢唔俾佢個b打防疫針(話對佢bb唔好)，開頭仲話唔俾bb讀幼稚園(根本佢就冇錢俾bb讀)，又唔俾bb食肉。結果bb依家歲幾，都冇乜頭髮，頭大身細，個肚仔仲脹住。我懷疑佢個bb營養不良(因為個feel好似非洲個d兒童)。bb pet pet生疹，同我講話痛，我個朋友又唔帶醫生，話搽左膏都冇用，求祈搵d凍水"fer"下就算。點知越"fer"bb越喊得厲害。bb腳仔生水泡(我個朋友話因為佢行路行得多)，同我講話痛，我朋友又唔理。話會自己好喎。
bb就快2歲，要報讀幼稚園，佢根本就冇錢俾讀。(佢老婆之前俾人炒左)又唔搵資料，冇錢又唔申請綜援。佢2公婆又冇乜學識，根本冇可能homeschooling。佢屋企乜都冇，冇冷氣，冇電視，冇洗衣機，連電飯煲都冇(佢地用瓦煲煮飯)，30幾度，風扇都冇把。話地板涼喎。結果我次次去佢屋企，都係搵塊大樹葉潑涼。大家無聽錯，係樹葉，唔洗扇。我同佢講，屋企冇電視，bb好難學講野。雖然我未結婚，但係話晒我都係讀教育，以前又係教書，又賣過幼兒產品，我好清楚點教小朋友。bb pet pet生疹，佢就唔俾bb著褲，話著左佢會痛。但佢地板咁鬼污糟，bb坐係地板，仲傷。根本就係佢唔想帶bb睇醫生。
我成日覺得，屋企窮，唔緊要，最緊要用「心」去教小朋友，用「心」愛小朋友。但係對於我個朋友咁「另類」既教法，我已經去到頂唔順既地步。佢話要等佢由細就學會自己解決問題，所以bb整親個頭，話由得佢喎，「hum」得多佢就會識小心。話依家唔教曉佢呢d，遲d飢荒佢就唔識自己解決問題。bb做錯事，我都係嚴肅咁話左bb幾句，佢就打bb手板，打到佢喊。佢bb歲幾咋。佢呢d咁harsh既方法，根本就唔適用於bb身上。
佢地依家一個月平均得1000蚊。3個人用1000蚊，我一個人都唔得啦。交埋租(公屋)，我完全唔知佢地2公婆同阿b可以食乜。我個朋友堅持一定要食齋同有機食品。所以食物銀行完全唔岩佢。我完全唔明白，去到呢個地步，仲要堅持埋佢d所謂「原則」。之前bb可能生牙仔，所以想咬野，我話買舊牙膠佢咬，但佢又話膠有毒，只係俾佢個仔咬瓜子。
呢幾排，我晚晚都訓唔著。每一次諗起bb咁慘既遭遇，都有d想喊既感覺。當初我叫佢將bb送俾人養，佢唔肯。我朋友連自己都養唔踮，為左箍住個女人個心，要帶bb黎受苦。佢自己捱5蚊一日都算。你叫bb點同你捱5蚊一日。就算個bb唔係佢既，係佢當初話要生，就應該負責任。依家bb出左世，佢又冇心機做野，應該話，佢根本就唔想做野。次次做親野唔係話辛苦，就話老細又唔好，再唔係話體力唔夠，又或者份工要「殺生」唔想做。多多藉口。淨係得個老婆返工。如果佢真係愛個小朋友，佢點辛苦都會頂落去啦。如果佢唔想做野，就唔好結婚。我爆呢單野出黎，個心經過左幾多掙扎。因為我識左呢個朋友好多年，知道勸佢一定唔會聽。但我知道bb一上幼稚園，呢單野都遲早俾人踢爆。(不過到時都大機會冇錢俾佢讀)
對於我呢個咁「另類」既朋友，我已經冇晒辦法，亦好心痛。
[ 本帖最後由 味兒 於 09-8-29 02:46 編輯 ]
bb 5月 出世la http:///album.php?op=album&mid=184776&folderid=1653864&u=0]入黎睇下la
發表於 
連最近ga人都唔出手
就算有做警察ga mami都冇用
細b駿晞
up個post上黎有咩用呀!
發表於 
知足常樂 自得其樂 苦中作樂 
可能又多個綜緩客
返回列表
