少年成長今日: 0|主題: 16012

收藏本版

回覆發帖

返回列表

跳至頁

查看: 16813 | 回覆: 0

過年 [複製鏈接]

csir3290

子爵府

積分: 11997

1^#

發表於 25-2-9 13:33 |只看該作者 |倒序瀏覽 |打印

終於過咗幾日農曆年假期，除咗拜年當然又係要搵時間同一家人四圍去下行下食下啦！
講起拜年成日都講係其中一個最容易破壞親子關係嘅時間，因為去到拜年，當成班親戚朋友聚埋一齊嘅時候，最容易提到嘅就係大家仔女嘅學業，平時冇比較冇傷害，但係當大家坐埋一齊嘅時候，自自然然就會講下大家彼此嘅成績，但係無論成績好定差，其實呢個時間啲細路仔就係最尷尬，成績好好似冇乜嘢咁，但係好多細路仔唔鍾意畀人知道自己啲成績，成績差就更加唔使講。父母最鍾意呢個時間就互相比較，但係其實呢個時間就係最傷細路仔嘅時候。所以其中一個原因啲細路仔唔鍾意跟我哋去拜年，就係怕咗呢啲互相比較，同埋啲問長問短嘅時候。我哋做家長係呢啲時間真係要醒目啲，要懂得被重就輕，有陣時懂得適當嘅轉下話題，就會避開呢啲令細路仔尷尬嘅時刻，而且細路仔亦都會覺得家長會顧慮到佢哋嘅感受。家長應該要明白每個細路仔都係獨立嘅個體，有各自嘅長處同埋缺點，同其他人比較其實冇乜作用亦都冇必要，係咪人哋嘅細路仔叻就表示自己嘅細路仔都要咁叻呢！而且我哋要明白，好多時係呢啲所謂成家人親戚朋友喺度嘅時候，各自都只不過係攞細路仔嘅長處同埋最叻嘅地方出嚟講，咁聽下咪算囉，冇必要攞自己嘅仔女去同人哋嘅比較，人哋仔女做得唔好嘅地方亦都唔會攞出嚟講，咁所以根本就冇乜參考價值，只要我哋做家長懂得欣賞自己仔女嘅長處，多啲欣賞自己嘅仔女其實就可以。所以不論拜年又好，或者親戚朋友聚會又好，其實真係最忌互相攞仔女嘅表現出嚟比較，咁只會令到大家嘅仔女越嚟越唔鍾意出席呢啲聚會。我唔係話唔需要比較，其實比較只需要同自己比較，所以作為家長應該比較嘅係自己仔女之前同而家嘅表現，只要有少少嘅進步，其實我哋都應該要欣賞，呢啲進步未必及得上人哋嘅仔女，但係起碼對自己嘅仔女嚟講其實都已經係一啲嘅成就，值得欣賞。

講開年假，剛剛我都講係時候除咗拜年之外，真係要搵啲時間同啲仔女去行下。唔知大家有冇同自己仔女一齊去散步，我自己就好鍾意同對仔女一家人去散下步行吓，有陣時當然要搵啲藉口，好似過年咁，我就鍾意借年初一行大運就叫仔女成家一齊陪我去行下大運，早兩日又因為港島條東岸板度開咗，又借啲意話想去行下，咁又一家人去行咗過零鐘。其實大家都可以試下，有兩條路都好好行，一條係將軍澳嘅海旁，圍住條跨灣大橋行一個圈都係過零鐘，另一條東岸板道亦都係一個好行嘅地方，又係輕輕鬆鬆舒舒服服，最重要係行得唔辛苦，一家人慢慢行吓，自自然然就有好多話題好多嘢傾，當睇下風景呼吸下新鮮空氣都好，如果有時間真係建議一家人一齊去散下步，一路行唔需要特別諗乜嘢話題，自自然然就會有嘢講，而且風景咁靚，行下又可以自拍下，不知不覺又個幾兩個鐘。總之得閒成家散吓步，對身體有益之餘又可以增進感情，總好過得閒就匿喺屋企淨係揸住部手機。