自由報料 今日: 109|主題: 300709

當iPhone 4S熱辣到港，雖然貨少兼喪炒，但配備嘅最新iOS 5，一眾果迷一毫子都唔使就享受得到。今次Update增加200多項新功能，其中最注目嘅iCloud雲端儲存，一裝iOS 5即送5GB俾你玩，歌、相、聯絡人等全部可掟上嚿「雲」度，隨時存取！

記者：韓繼聰
攝影：劉永發
Model：Pamela@Interplay Workshop

存相靠嚿雲
簡單來說，iCloud是一個網上空間，俾你存取資料，等你部iPhone、iPad、電腦等裝置可隨時互通資料。每位iOS 5用家都免費提供5GB容量俾你玩，唔夠仲可以畀錢加大嚿「雲」。實地試用「照片串流」，只要到設定中啟動該功能，再試吓影相，相片就會存到「照片串流」的相簿中，並即時Upload上iCloud。再開另一邊Mac機嘅《iPhoto》睇睇，啱啱喺iPhone影嘅相已即刻現身，完全自動複製！iPhone只會喺有Wi-Fi情況下先會Upload，所以唔驚爆月費Data。不過要留意，iCloud只會存相30日，記得要Save番落你嘅裝置度。

iPhone影完嘅相，好快就可以喺其他裝置睇到。

iCloud設定好簡單，一開就搞掂。

相片，行事曆、聯絡資訊等等全都可透過iCloud同步至其他裝置。

相機功能大升呢
一向覺得iPhone個影相掣唔就手，今次更新，終於用加大音量按鍵擔當快門鍵，影相感覺返晒嚟之餘，自拍亦零舍方便。除此之外，亦新增咗鎖定畫面時的開啟相機Shortcut同構圖格線，雖細微，但超實用！另外亦可對相片進行優化、除紅眼、旋轉及裁剪。

裁剪功能操作非當簡單。

加大音量按鍵變快門鍵，自拍極好用。

閱讀器 整理文章
用iPhone上網，遇着廣告多、欄位又多嘅網頁，屏幕唔大真係幾頭痕。今次《Safari》就解決咗呢類問題，只要一按網址隔籬嘅「閱讀器」鍵，網頁即時會去除廣告並排好文章，仲可選擇字體大小，上下拉動就可以睇晒段文，唔使放大縮細左郁右郁咁麻煩。

網址隔籬設有「閱讀器」鍵。

利用「閱讀器」功能可去除網頁的廣告並排列好文章，方便閱讀。

一拉睇通知
新加嘅「通知中心」，無論E-Mail、SMS、行事曆等等，有咩通知都會喺畫面上方短暫出現，而你可從畫面最上方向下一拉，就Show晒所有未閱覽過嘅通知，仲有埋天氣同股市，感覺有啲似Android，方便過以前逐樣Check。

「通知中心」有齊iPhone上大部份的通知，以及天氣和股市消息。

從畫面最上方向下一拉就可開啟「通知中心」

iMessage結合SMS
英文名改咗叫《iMessage》，但中文就一樣命名為《訊息》，其實就好似將《Whatsapp》同SMS二合為一。普通SMS會用綠色顯示，而iMessage就會用藍色。只要大家都有iOS 5，就可以無限兼免費地互通Message、交換相片等，唯一缺點係唔可以跨平台Send囉。

分別以綠及藍色顯示SMS及iMessage。

筆畫輸入的鍵盤有所改變。