家庭理財今日: 6|主題: 46790

收藏本版

發帖

返回列表

跳至頁

查看: 646 | 回覆: 0

祖移表現勝大象 [複製鏈接]

IVY_K

洋房

積分: 298

1^#

發表於 05-11-12 07:03 |只看該作者

祖移表現勝大象

在魚缸搵食一樣要反應快，早十幾廿年只要有本在手，仲要唔使好大舊本錢，好似盲炳咁求其揀 5 件指巨無霸在手，一直以股代息連本帶利，坐到家陣唔變千萬富翁都變百萬富翁。但自 97 年亞洲金融風暴後，呢支歌仔已經唔聽。呢七八年假如閣下持有市值最重量級的大笨象（ 0005 ），本金增值有限，收息連餬口都未夠。即係話依家要魚缸搵食，與時並進好緊要，即是唔係鑊鏟日日炒出炒入，至少每年都要調整一次投資組合。以今年為例，可以肯定買祖國移動（ 0941 ）實好過大笨象，以大部分吹水報告的分析來看，未來半年都係持有祖移有數。

本地魚缸經過前日「大長挾」，昨日又歸於平淡，現貨場成交額縮水至 169 億元，好淡爭持無乜睇頭，主要 14,600 附近窄幅上落，藍色大隻佬乏善可陳。魚缸焦點落在昨日復賽的四叔旗艦（ 0012 ）及發（ 0097 ）身上，前者向後者以換股方式提出私有化，股價此起彼落，發高收報 12.75 元，跟古勝預期 12 元差不多。

呢期魚缸興搞私有化，繼中石油（ 0857 ）搞掂吉林化工（ 0368 ）後，又到中石化（ 0386 ）搞鎮海煉化（ 1128 ），祖國兩間企業就話配合國企改革，盡快完成系內業務整合，拿拿臨再搞埋股改。至於本地公司何以私有化，古勝預計係班大孖沙怕遲再加息，資本成本愈來愈高，趁手頭有水免夜長夢多。四叔系內的中華煤氣（ 0003 ），同樣炒私有化概念，昨日創 52 周新高 17.1 元，古勝相信煤氣短期被私有化可能性較低，皆因集團在祖國及海外的燃氣能源發展項目仍在起步階段，又唔係話贏緊大鑊，大股東私有化亦唔見得有數，留番個上市地位，方便再有搞作可集資。

領匯吸引力大減
領匯（ 0823 ）昨日開始進行招股，古勝都收到卜架問有冇興趣入場。睇番招股條款，吸引力有限，當係捧場可以買番幾手，但想贏大鑊就要死條心。缸湖傳聞領匯以每單位 9.7 至 10.3 元定價，預計於今個月 25 日上市，至明年 3 月每單位派息唔少於 0.1983 元。若以上限 10.3 元定價，年息率只有 5.53% ，比起舊年招股時預計 6.65% 低。

家陣預計花旗聯儲局緊仲要加息兩次，合共約半厘，本地錢莊亦跟足，即係存款利率亦有上調空間，咁領匯年息率僅 5 厘多些少，點計條數唔算吸引也。至大鑊係目前租金及樓價正處高位，來年經濟有乜冬瓜豆腐，領匯不但無資格加租，隨時仲要畀租戶扭計減租，咁下一年派息或者有減無加，而且新會計制度實施後，物業估值將影響盈利表現，屆時股價表現定隨之而下，唔怪得之今次「出挑唇」反應無去年咁熱烈，房委會真係多得阿盧女士唔少。