美容扮靚今日: 0|主題: 138126

收藏本版

發帖

返回列表

跳至頁

查看: 1239 | 回覆: 0

騎馬機大比拼 [複製鏈接]

casio1668

大宅

積分: 2833

1^#

發表於 06-3-22 13:44 |只看該作者

騎馬機大比拼

蘋果日報副刊有介紹 :

2006年03月21日
花 Can ：至 Hit 騎馬機 Fing 走肥腰龍躉

話咁快又冬去春來，見到又薄又貼身的春夏裝真係好鍾意，但一拼上身，見到突出的胃腩肚腩，真係乜購物慾都冇晒，醒覺再唔減肥就唔切啦。要減肥當然要做運動，但咁辛苦，我最多只會有 3 日心。有邊個唔想坐度，個人毋須點郁就減到肥？得！你肯投資就得，因為騎馬機幫到手。坊間 Hit 緊 3 部騎馬機，想知邊部最值得投資，通過以下 5 大測試就自有分曉。
記者︰劉昱蘭
攝影︰陳盛臣
Model ︰ Lin & Peggy （ Salvador ）
Wardrobe ︰ TAKE 5 （ 2724 3883 ）尖沙嘴利時商場 422 號

比拼一　靚仔度 + 招式
話明係騎馬機，當然要似馬。首個比拼一於比呢隻「馬」外形、招式和價錢，睇睇邊部合你要求！

1 號　 Panasonic 第三代 JOBA 騎馬健體機
曲線 + 腳踏最神似座椅有曲線，似坐落真馬背咁，面的軟墊幾舒服，又有腳踏，搞到小記上馬時，真係好有姿勢咁，踩上腳踏度上馬。懶人至招式方面，有９個速度，一個坐姿配合三個模式，包括腳力程式、收腰程式和收臀程式，連自己郁轉 Pose 都慳番。
售價： $12,800 （ C ）

2 號　 OSIM iGallop 健馬師
座椅扁平似張面太過扁平唔似馬仔，因為佢冇弧度，總係覺得個人會震到移前，玩玩要自己坐番後。但勝在有紫、黃兩色揀， Sharp 晒。

坐姿多有睇頭
呢隻馬有 4 個速度，可慢步配熱身動作、快步配收腰動作、跑步配收髀動作和循環配收腰旁「鬼祟肉」，雙腳擺唔同地方，都有唔同收身效果。
售價： $5,880 （ A ）

3 號　 Image 太空船形騎馬機
完全冇馬樣

三尖八角，似部穿梭機多過似馬仔。冇坐墊，坐落硬身冇咁舒服。

冇好揀
只有兩種速度選擇，模式欠奉，而且機形 Fix 死坐姿，想自己就番部機都唔得。
特價： $4,800 （原價 $6,800 ）（ B ）

比拼二　收腰

把 13 粒 Pack 箱膠填滿膠杯，然後用皮帶將膠杯綁於腰間， 15 分鐘後睇 Fing 剩幾多隻杯度，剩得愈少就代表腰部運動量愈大。

1 號　剩 4 粒
Panasonic 的「 8 字形」搖動，擺動動作大，更能運動腰部。因為除前後郁，「 8 字形」向左右兩邊搖的幅度，比「 V 字形」闊好多。 Model 都話騎 Panasonic 條腰不停咁扭，運動量勁過齋前後郁的 Sit-up 。

2 號　剩 7 粒
OSIM 的「 V 字形」動作，雖然話可向前後左右傾斜擺動，但試騎時似坐一張會前後震的多，左右擺的感覺好弱， Fing 得唔夠勁。

3 號　原封不動
IMAGE 會打圈咁郁，其實好似做呼拉圈咁都會收到腰，但衰在郁到好似阿婆玩呼拉圈咁，搖得太慢，要成 1 秒多先扭到一個圈，實在太弱。

比拼三　收大髀

將泥膠填滿膠杯，放大髀同部機中間夾實， 15 分鐘後睇邊個最變形，愈畸形雙腿愈出力，收緊作用愈大。

1 號　裂痕唔夠大
部機似足騎馬仔咁有個腳踏，可能力卸落個腳踏度，大髀唔需要咁出力，所以膠杯都有裂開，但就冇爆裂同埋飛出街。

2 號　爆裂飛出街
Model 熱身時雙腳放於兩旁和前方， 6 分鐘度就聽到「啪」一聲，個杯裂。之後將雙腳蹺在後馬腳，再提起少少 Hip ，呢 Pose 迫 Model 雙腳出雙倍的力，結果個杯飛落地。玩完後，大髀又痠又痹，好 Work ！

3 號　得個凹字
由於個放腳位係一個平面，雙腳好輕鬆咁成隻放上去，唔需要點出力，個膠杯都係凹得少少。

比拼四　勁度
戴住牛仔帽玩，睇 15 分鐘後邊個移位移得最多，會唔會快到 Fing 甩帽。

1 號　 Fing 到上頭頂
當剛開始轉到最高速時， Model 不禁「嘩」一聲。睇住佢個人細細粒，馬上高速「 8 字形」咁 Fing 到左傾右跌，最後頂帽跣到頭頂，爭少少甩。

2 號　稍稍移位
OSIM 模仿馬仔慢步、快步和跑步 3 種速度。轉到去高速時 Model 重笑笑口話好自在，睇速度冇咁快，冇騎 Panasonic 時咁慌。最後頂帽 Fing 到露半額。

3 號　 Keep 到最靚
IMAGE 實在冇乜料到， Model 一路都保持到儀態，頂帽郁都冇郁過。

比拼五　消脂
玩完後即刻用面油紙輕印全面，帶氧運動有汗出先消到脂，從汗水睇邊個消脂最強。

1 號　最濕
搖幅大夠高速，搞到 Model 香汗淋漓，濕多於 1/4 張面油紙。

2 號　輸個馬鼻
搖幅同速度都差，但勝在要轉 Pose ，都出唔少汗，濕差唔多 1/4 張面油紙。

3 號　完美面油紙
Model 玩完都 Keep 到靚一靚，仲要係汗都冇滴。

賽後分析
綜合以上 5 項比拼， Panasonic 以五局四勝，大比數勝出！雖然呢隻馬仔價錢貴，但「分唇」同玩法都夠多，而且最緊要 Work 嘛！

騎馬 Do's & Don't
Do
1. 腰板要挺直，可以有埋鬆脊椎和盆骨等的物理治療功效，骨鬆自然筋都鬆埋，成個人舒服晒。
2. 玩耐就唔好用扶手，多靠腰力去平衡，收身效果更明顯。

Don't
唔好太急進一開就開最高速，個人掌握唔到個速度，唔到平衡，一樣冇效果。

靚女點睇
■ Peggy ︰「我會揀 Panasonic ， 8 字形咁 Fing 好夠勁度，好似帶動全身都運動到咁。」
■ Lin ︰「我鍾意 OSIM ，個人要郁，換坐姿 Hold Pose ，先至會覺得真係有運動過，齋坐得部機郁點都冇咁好。」
■ Cathy ︰「如果真係買就買 OSIM ，線條靚個樣 Smart ， Panasonic 個樣有笨拙。」