母乳餵哺今日: 0|主題: 85709

收藏本版

回覆發帖

返回列表

跳至頁

查看: 1051 | 回覆: 27

終於到六個月！(長文注意!) [複製鏈接]

MrsWongJr

大宅

積分: 1815

1^#

發表於 12-11-15 12:55 |只看該作者 |倒序瀏覽 |打印

終於到今日！我條奶媽路走得不易。係醫院密密餵，乖仔亦啜得幾好，姑娘次次都問我補唔補奶粉，我一話唔補就比面色我睇。:;pppp:我要插尿喉掛住個尿袋，姑娘叫我半夜補奶粉，因為我去唔到餵奶房餵，但我堅持自己攞住尿袋都要去餵，最後佢地抱BB比我餵。出院後feed on demand,一日無12 都有10次。陪月同阿媽都好驚訝我一罐奶粉都無。BB一星期後有黃疸，要督腳板抽血，我就半夜都三小時叫醒佢餵，餵親都成個鈡，個人攰到訓覺時雙手都係放係胸前做餵奶的手勢，成日以為自己餵餵下訓低左，摸摸個胸先知道自己唔係餵緊奶。

BB增重唔理想，每2日要返健康院磅重，陪月又成日想我補奶粉借D咦成日話「媽咪真係狠心係醫院要你餓左幾日」可是我反駁的力都無，只係一心密密餵。BB好采2星期終於返番去出生時體重，唔駛補奶粉，可惜之後增重唔理想，由25 跌落3生長線，而家睇番BB滿月時的相又黑又瘦個心真係仲拿住拿住。

BB三星期時我開始胸痛，約Mrs Chee 又撞正佢放假，到滿月時見Mrs Chee 先知道自己真箘感染，D奶出唔到，泵極只有1、2 安。之後要不停吃藥，敷藥，又要戒口，甜野同麵包全部唔吃得，餵奶又成日肚餓，乜都唔食得，有時索性半夜餓住訓。

睇左Mrs Chee 7 次，次滿懷希望自己好番可以吃正常野，但次次都失望而回，心情極度低落，奶就更少。次次餵奶都驚BB吃不飽，但係我都堅持唔補奶粉，泵奶都係好小心先用，怕BB習慣奶樽唔肯埋身。個段日子真係好黑暗，C6已經好支持我，但老婆成日面如灰土佢都情緒低落，跟住就發脾氣。一直捱到3個幾月，多謝BK JM 介紹一隻超強益生箘，終於病情有起色。但因為真箘感染錯過左上奶黃金期，奶量僅僅夠埋身吃，泵就一定唔夠，所以3個月產假一直自己無出街，無得吃（因為要戒口），無得訓，無的出街，阿仔3個月前肚風日日係咁喊，唯一開心D係吃完奶後15分鐘，但我要將佢比99或工人抱因為我要泵奶，正係好灰。

返工前BB終於戒左夜奶，但我照樣起身泵泵泵，努力儲到20幾包4安冰奶，先有小小安全感。

返工又另一個難關，返工一日泵3次，我用Freestyle都要30分鐘，前前後後要40分鐘，真係做唔到野，但我唔理，阿仔吃飯緊要，好彩老闆都體諒。
所有可能會增奶的食物我都食過，之後再加more milk plus and goat's rue, 買多個Avent duo, 返工又定時泵，奶量終於微升，到BB4個幾月終於感受到大家所講的奶陣同谷奶（之前阿仔可能真係無啖好食）,雖然到而家都要餵兩邊先夠食，朝早餵完泵都係得10ml。

終於捱到6個月，一路都有懷疑自己的堅持係咪正確，係唔係對阿仔最好，但我知道如果我順其自然就一定唔可以全人奶,可能一早已經放棄了。

好多人話6個月夠啦，但係之前阿仔付出咁多努力啜，我又咁辛苦先保持到奶量，就咁放棄太可惜！返工會越來越忙，冬天泵奶會好凍，係仲係好肥，係好困身，但為左阿仔我會堅持到無奶為止！