回覆 Sumyeema1 的帖子
DR集團迫客一月前轉投新公司 疑似金蟬脫殼 議員促政府速決
(2012年12月24日)
【am730訊】【am偵察】涉及靜派輸液療程而發生傷亡事故的DR醫學集團，繼上月要求員工簽署離職信再簽新約去另一間公司Dr Reborn後，DR再有新動作。陸續有客戶收到DR電話，要求她們須在明年1月前簽署新約，把現時所有療程及服務轉往另一間公司Dr Reborn，但過往因沒有給客戶黑字白紙單據確定療程數目，多位客戶被迫轉公司後療程相對減少，甚至有客戶的資料已遺失無法核實。立法會議員麥美娟質疑有人以蠱惑手段逐步製造空殼公司現象，警方若不盡快公布調查結果，擔心消費者到時追討無門。
記者：簡淑明 攝影：林振東
60歲的陳女士08年在工展會，經美容顧問游說後自此成為DR的客戶，至今4年共支付了差不多18萬元，參加了該集團的美容及身體按摩療程。她自言每一個療程才開始1至2次，美容顧問又說服她再開一個「更好」的療程，先付一成現金，之後用信用卡分期付款，無視她是沒工作的退休婦女。「每一次去做療程，都好似喃嘸佬咁喺我旁邊講嘢，游說我改療程，咁當然又承諾買多10次又送多幾次免費嘅俾我。我俾咗錢無得怨，但佢哋乜單據都無，尤其唔會寫低送俾我嘅免費療程數目，到下次去做，又係無證明的，只係簽喺佢哋本大簿度，得佢哋有紀錄，我就靠個腦去記，但做多兩次了，佢哋又游說我開另一個新療程…….如是者，簽咗十幾萬，有六、七份單要供，但我根本唔記得已經買咗啲乜嘢療程，有啲可能仲係重複咗。我淨係知，單係今年，我已經供了3個療程，都至少2萬。」
陳女士曾被游說進行抽眼袋及增強抵抗力的打針療程，結果抽眼袋手術失敗，沒法追究；打針療程中途停止，也不得退款。「話一萬五千蚊打5支針增強抵抗力，我俾咗錢之後開始後悔，第一次去打時已經唔想做，因我其實唔知係乜針嚟的，打落手臂，我同美容顧問講我唔打喇，佢話唔得喇，醫生已經喺入面等緊我唔可以臨時取消㗎，咁我就打了一針，但我真係唔敢再打落去，但又唔俾我退款，只可以轉去攞佢哋嘅產品，又貴又無用，但只有呢個方法。」
抽眼袋失敗留瘌
「到上年1月話我眼袋有啲浮腫，叫我俾二萬二蚊，幫我打支針抽眼袋，結果手術後眼腫、谷瘀血、眼四周黑咗十幾日，我唔可以俾老公同個女知道，戴黑超戴咗十幾日，依家眼尾仲帶有一撻瘌，攰的時候對眼會掹住掹住，個美容顧問俾支類固醇藥膏我搽，叫我搽落撻瘌度，我梗係唔搽啦，點知有無影響。我唔敢追討賠償，已經有十幾萬數喺佢度，我驚佢唔賠俾我之餘，仲會留難我唔俾我預訂到療程，咁我到時就血本無歸。發生咗死人事件後，我好驚佢哋執笠，去過要求退款，但佢哋話我唔係肇事嗰隻療程，無得退，只可以換貨或者繼續服務。我唯有攞貨兼搏命約時間，但根本都俾唔到我，一係堆埋一個星期做3次療程，一係又半個月至一個月才有得做。依家仲突然通知我要將我啲療程全部轉去Dr Reborn，我上咗去簽，結果佢話，因為一直跟開我嘅美容顧問已經離職，佢哋講唔實我而家仲有幾多療程，更加講明唔會知道之前佢承諾送過啲乜嘢免費服務俾我。」
立法會議員麥美娟(圖2)透露，她在過去一個多月接獲類似陳女士的個案有十多個，因為DR紀錄混亂又不給予客戶白紙黑字的收據證明，有個別個案甚至已失去紀錄，她今天將召開記者會詳細交代個別客戶慘況。她最擔心有人正以蠱惑手段，有預謀地將客戶及職員轉移到另一間公司，「而且仲指定要喺明年1月完成程序，我哋係擔心公司短期內會有行動，如果到時變成咗一間空殼公司，咁警方及政府要追究起來，仲可以告邊個，仲邊有責任要負呢？警方應該在短期內加緊調查，將元兇揪出。」
DR不聞不問
據悉，死者陳宛琳的家人已委託律師，協助查核陳生前在DR購買了多少療程，及研究索償的方案。而另一名因敗血症令血液供應受阻，仍在聯合醫院深切治療部留醫的女病人，其家人亦曾發出律師信要求DR交代，但對方一概不回覆。警方現正循誤殺和訛騙方向調查，暫未有人被捕。
在DR集團工作3年的美容顧問李小姐透露，自從月初跟隨香港美容健體專業人員總會召開過記者會後，Dr Reborn的老闆鄧志輝向員工表明不會要求簽署離職書後才簽新約，還揚言願意不計佣金的情況下向員工包薪至1月31日，「但1月後呢？會點對我哋，新老闆睇完個記者會後好囂張咁同我哋講，我哋鍾意過檔就過檔，唔過檔無人會留難我哋，佢亦唔會求我哋。但呢個時勢就嚟新年，我哋可以唔過去新公司咩？即使有可能好快脆食晒我哋啲客後就炒咗我哋，我哋都肉隨砧板上無得怨。」
公司註冊處資料顯示，要求客戶及員工簽約到新公司的Dr Reborn，由聯合（集團）投資有限公司持有，而聯合的董事是鄧志輝。鄧在05及06年先後創立該兩間公司，2010年收購「變靚D」。鄧志輝已公開否認收購DR，但由上月中起，DR集團十多間分店相繼轉名為Dr Reborn，客戶也必須要在新公司接受餘下療程。
發表於 
返回列表
