上一篇講咗我同老公同居嘅原因,
呢一篇就要講下我o地啱啱一齊生活所發生嘅事啦!
係有d長篇...不過全部都係我經歷過架~
嗯....應該點講起好呢??
我搬咗出黎之後 (我記得係老公幫我搬嘢就係用個紅白藍膠袋!)
仲有,我留低咗封信俾丫妹,內容當然唔記得晒啦,不過都係果d啦,叫佢好好照顧自己,我要走啦之類嘅嘢!跟住老公走果一刻,我冇o念咁多,唔會驚,亦都冇o念過自己將來會唔會後悔..
但我知道, 我的那個"家"係再也返唔到去架啦!我住青衣,老公住則魚涌...(真係好遠,我仲要返青衣返學!)
先唔好講返學遠唔遠嘅問題住,先講下我新嘅居住環境係點嘅樣先啦~老公係自己一個人租屋企住架,所以佢搬到好近公司,即係隔條街就係公司果只!自己一個男人住, 就緊係有得住就算啦,我o地個屋企好舊嘅唐樓, 冇笠...每日就要靠自己對腳爬上爬落9層樓架啦,我o地都算係住得風涼水冷啦,一層樓得我o地一家人,高就係高d,不過風景好丫...可以望遠D~
行出去...成個天台係我o地嘅, 可以bbq添丫!!嗯,冇錯,我o地就係住天棚屋,即係而家講都好嚴重嘅僭建屋~
有時上落樓梯我都驚驚地架, 因為真係好殘舊,陰陰暗暗咁!!搬出黎同一個男人住,唔係想像中咁過癮,咁開心架啦.其實大家嘅生活方式唔同, 飲食唔同, 性格唔同就會出現好多磨擦架啦,所謂相見好同住難,呢句說話用喺婆媳之間同情侶之間都一樣o岩用!
除咗我哋兩個之外,我哋仲養咗只狗仔,係女仔黎架,叫妹妹豬,佢好可愛,好鐘意笑.
搬咗過黎之後, 因為我又要返學,加上之前嘅情緒仲未平伏,成日得閒就喊,要老公多D著緊我,關心我…我開始胡思亂想, 因為我而家真係得返老公一個人,好唔想連佢都失去埋!唔可以~我好驚,好驚好驚有一日老公會唔要我,會離開我,就算老公對我幾好,幾貼心都好,我都會覺得唔夠,可以話,如果可以分分秒秒痴住佢我都愿!但係果陣時嘅老公,一兩個星期就會約d朋友出去睇波飲酒,係我眼中,我已經覺得佢心中冇我…點可以靜係僱住同d朋友飲嘢而忽略咗我呢個女朋友架~總之…o岩岩住埋嘅時候,只要老公離開咗我個視線,我就會好唔開心,又喊又發脾氣,又唔睬佢同黑佢面!(而家o念返,真係好細路女!)
一對情侶一定經歷過很多個第一次,而我同老公亦都唔例外.
第一次冷戰
記得有一次,我o地出完街返緊屋企嘅途中,本身老公話同我一齊煮飯仔架,o念到都勁開心,覺得好幸福…點知,老公突然間收到個朋友嘅電話,我都心知不妙架啦…果然,又係佢個朋友打黎約佢食飯.去觀塘wor~~我緊係即刻黑晒口面啦,老公都知..仲要停咁安撫我,話好快返架啦,又話個朋友好忙,咁難得佢約食飯,點都出去嘅! 我緊係應佢好啦,但係應完之後繼續唔出聲..老公係好好嘅,佢就算要去邊都好,都一定先送我返到屋企佢先出去.
老公送我返到屋企o念住走嘅時候,唔知咩事…我d眼淚喺咁流…覺得好委屈,做乜事明明個老公係我嘅,點解要分減d俾佢d朋友????我唔明…喊得愈來愈勁,老公見到我咁當然反返入屋,果時佢都興興地架啦…好大聲問我:”咁而家咩事姐???係唔係同個fd食餐飯都唔得啊??”聽到佢咁大聲同我講嘢,我都係唔出聲…靜係喊!
冷冷的一句:“你自己好好冷靜下!”突然間….我聽到一聲好大聲嘅”澎”門聲,我成個心跳咗出黎..我好驚啊…”點解??點解呢個男人會喺我最需要佢嘅時候不顧我而去??佢係唔係我之下識果個阿Jack?我真係可以同佢一齊??佢唔要我啦??” 那時…我個腦只係不斷地問呢幾個問題…唔知幾時,我喊到好累,累到就咁瞓著咗啦….佢???我唔知佢幾時返黎,可以凌晨一點?兩點??唔知….!瞓醒咗,睜大眼,見到老公喺則跟,,瞓到好淋. 我冇嘈醒佢…出咗廳!
“對唔住,琴晚係我太大聲啦!”好溫柔嘅果一把聲又喺我耳邊劃過…我真係好鐘意呢把咁溫柔嘅聲音,老公喺後面攬住正喺度梳緊頭嘅我,我d眼淚又係咁流…(女人真係水做嘅.),我轉身攬住佢,終於講咗句:”對唔住,係我太任性..我會改,唔好唔要我,好唔好?” 老公只係攬實我:”係我唔好,我會改!” 果一刻…兩個心貼心,大家只係想將對方抱得再緊d.我o地仲彼此承諾對方,以後就算咩事都好,嘈架又好,都唔可以嬲過夜同埋一定唔可以唔返屋企喺出面過夜!
自從果次之後,老公真係出去出少咗..一個月先同朋友出去一兩次,其除都係陪住我!咁當然..我都有改下自己d性格,唔會少少嘢就黑面同埋唔會痴得佢喘唔到氣..
(彼此都要俾大家空間,從磨擦中學習,成長!)
第一次激嬲老公
咁果時,我同老公同居後,仲要考會考架嘛,你唔好話…我真係好慒架,我老公都知我又慒又蠢架啦,所以佢都會喺我會考前就同我搭一次車去d試場度,計下要幾耐時間先去到.
咁本來應該係相安無事嘅,但係….唉,我咁都中!
話說果日係星期日,我同老公準備好出門口(我自以果日係考英文oral)..臨出門口,老公仲要語重心長咁問多我一次:”今日係星期日黎架wor,學校會開俾你o地考會考??你有冇睇錯啊?再睇清楚d!” 唉..果時我仲好大大聲聲好肯定咁同老公講:”係架啦..我點會睇錯啊,咁會考邊有分星期日唔星期日架…行啦,再唔行就遲到架啦!”
好啦,聽我咁講,老公唯有相我啦! 下午3點幾,我o地喺則魚涌入到去天水圍某一間學校…e,好靜wor~學校都落埋鐵閘,我開始有d擔心,不過黎到都要問下…去到間學校門口,有個校工見到我o地裝下裝下咁就問我o地:”有咩事架?” 我即刻話:”我係黎考英文Oral架!”個校工呆咗一陣:”今日冇考試啊!你係唔係記錯?今日係星期日wor~” “死啦!”我個心驚啪啪聲,驚到好震震擰轉身同老公講:”真….真係唔係咁日!” “死啦…死啦…”我見到老公塊面好黑,呢一刻,我唔係驚考唔到會考,而係…我驚老公嬲! 果然,老公有少少重語氣咁話:”都話咗啦…叫你睇清楚d,一次冇幫你睇,你都搞錯晒! 仲唔快d睇下有冇miss咗個考期!” 我連望都唔夠膽望佢,埋頭睇下張準考證….大大只字寫住5月12日(唔係好記得,比如的.)…點解我當時會睇咗係5月21日呢??? 晴天霹靂啊呢刻真係..我驚到好細聲咁同老公講:”原來係12號,唔係21號.” 我無抬高頭望佢, 但我聽得好清楚佢好大聲咁”唉”咗一聲. 之後…佢冇再出聲,靜係講咗句:”咁返去啦!” 就喺返去嘅路程中,老公無同我講過一句說話,亦都冇拖住我手行!
本來我o地係約咗我d朋友食飯架,o念考完會考啦,要慶祝下..點知搞成咁,老公同我搭西鐵搭到美乎,我終於忍唔住喊..但係老公無理到我,仲要好冷淡咁同我講:”你自己去啦,我唔去啦..自己小心d!” 下….就咁走咗去?? 考唔到個試我都唔想架嘛,我認係我大意,但至於要丟低我走咗去嘛? 佢從來唔會丟低我自己走咗去架!心係咁o念姐…但係我都知,佢真係要冷靜下,對住一個咁粗心大意嘅女朋友,佢真係好辛苦嘅! 就係咁…我自己去咗同朋友食飯..而我老公,我無問佢去邊,12點幾1點鐘返到黎屋企,一身酒味,我o念,佢一定係同佢朋友訴下苦架啦,辛苦你啦老公…
第二朝起身,我o地又好似以後一樣生活,o岩岩係有少少冷淡,但講過幾句之後就冇事啦,老公仲叫我要打電話去問下補考要點做,叫我今次一定要記清楚!
第一次入醫院
我身體好差,特別係女人病! 每個月經期更加係痛不欲生,所以自從同老公同居之後,老公會為我四周唸辦法,想醫好我月經帶俾我嘅痛楚! 基本上,如果我就黎M,老公就會好緊張,一定準備好經痛丸,經痛貼同按美露,果陣時老公喺屋企附近返工姐,所以可以放lunch嘅時候就返黎照顧我,有一次..我痛到要係頂唔順,面青口唇白,身體不停咁抖震..老公喺公司聲返黎,即刻背我落去睇醫生,點知…睇緊醫生嘅時候,我突然間就暈咗,醒返已經喺醫院! 睜大眼嘅時候,見到老公,老公好細聱咁問我:”豬,你見點啊?”唔知點解,果一刻我d眼淚又咁流,老公好緊張問我係唔係好咩唔舒服,我冇答佢..其實果一刻,係因為我好掛住屋企人,我病倒,結果只有我老公喺我身邊!
老公真係好好..每次我黎m,佢仲緊張過我,佢一定照顧得我無微不至.我痛得厲害,佢會攬住我,然之後唱歌俾我聽,個傻佬話wor,咁樣可以分散我d注意力,唔會咁痛!佢又唔知喺邊度見到話m完之後要焗d紅棗水飲,所以個個月佢都會焗俾我飲,我好怕紅棗水果陣味,老公以防我出古域唔飲,好多時都會睇住我,然後針定杯水俾我飲~
第一次求婚
哈,講起求婚,其實連埋之前嘅求婚,老公應該係求咗2次嘅,不過…我唸連老公自己都唔係好記得咗啦!喺07年嘅時候,原因又係因為我身體弱!
果陣時,我同老公會定期去捐血嘅,咁有一個星期六,我就同老公去咗旺角捐完血之後捨地鐵返屋企啦,點知..搭搭下地鐵,我突然間同老公講:”老公,我好暈.”之後就暈咗啦!後尾老公同我講我暈咗之後,佢好緊張,位喺度d乘客都起身讓咗成排坐位俾我瞓喺度,老公果時就好慌張咁拑停行緊嘅地鐵同埋不停咁叫我個名,,之後老公同地鐵職員聯絡上仲幫忙call白車,去到咗深水埗站就將我抱咗出去月台度,冇幾耐d醫護人員都到咗,仲問我叫咩名,果時我已經有少少知覺架啦,可以答到佢,不過都係要帶上氧氣,之後緊係去咗醫院啦!果日幫我調鹽水個姑娘仲話我:”係捐一包血,我o地要俾返你兩包鹽水,下次唔好啦,知自己身體唔太好就唔好格硬去捐!”我心唸我都唔知架,之前都無事.
就係咁,暈完之後嘅兩日後,有一日,我同老公喺食飯,老公突然間捉住我只手好凝重咁同我講:”阿豬,兩年後我o地就結婚,好唔好?””下…”雖然係有d突然,但係我都算聽得清楚嘅,唔知呢個算唔算求婚呢?我笑住望住佢點咗點頭:”好!”我知呢個傻佬,緊係因為我前兩日暈咗,驚會有一日我突然唔見咗,所以先同我咁講,唔理係唔係真嘅都好,我好開心架啦~果陣時,我仲好開心咁同我個女姊妹講老公同我求婚,佢仲話我咁容易就應承佢,冇d矜持.
咁當然,我哋兩年後緊係結唔成婚啦,如果唔係就唔會2012年先結到婚啦!因為...一路行過黎真係唔容易丫~
發表於 
追看
多謝你丫!我驚好似好長...睇得太辛苦丫~
返回列表
