24/5
前一晚上堂差不多11點先返到屋企，訓到凌晨3點就起身去機場。預早call左的士，5點0係樓下等我地，20分鐘已經飛到去機場，個司機開到160~~到機場之後仲可以睇埋日出。
台灣觀光協會送0既悠遊卡，0係櫃位check in之後拎左，其實有d唔肯定入面有無面值，要出到市區先知道。宜家台灣便利店同香港一樣可以用悠遊卡付款，經驗證後證實卡入面係無錢0既……
長榮架機好細，左右兩排每邊3座位，無任何多煤體裝置，感覺有d似國內內陸機，不過其實我唔太介意，畢竟機程只有個半鐘左右。 0730 非常準時起飛！
0900已經落機，宜家唔駛俾錢做落地簽證，但發現台灣出入境時都要影大頭相！我覺得呢樣幾好！可以慳左d排隊做簽證時間。
買手機預付卡
拎埋行李第一件事就係去買電話預付卡，機場有3間可供選擇，中華電信、台灣大哥大同遠傳，其實我未出發前已經選定用中華電信，原因因為在台親友好多用中華電 信，同台大家打電話通知費會平d，另外，親友0既評語都覺得中華電信接收比較好，於是出左NT$500預付卡，包168小時(唔係日計)無限3G上網，同 埋NT$100通話費，另送多NT$50，呢NT$50可以用黎0係168小時後繼續上網，或者打電話用。
出預付卡時可以根據電話款式提供正常SIZE SIM卡，或者MICRO SIM卡，同IPHONE5專用SIM卡。之後如需充值，只有機場counter有NT$100面額0既充值卡，或者到市區0既便利店買，但面額係NT$300。
有問過預付卡WIFI係咪可以SHARE，SALES話唔得，但實証過係可以SHARE俾其他手機用。
而且預付卡0既3G速度絕對好過香港0既3G速度，快好多！當然上山有可能會有D地方收唔到或者收得無咁好，不過市區內無問題，快過香港0既好多！
租車
之前有睇過和運，車款同服務店多，價錢較貴，後來親友介紹艾維士，亦0係呢度睇過其他師兄提及都係租過艾維士，咁0岩5月有紅綠配優惠，租一日再加多一日， 第二日租金會特比，搵左最平0既車款，NISSAN TIIDA 1.6 turbo at 3000rpm，租6日，車租共 NT$6,600。租車唔難，只需要出發0係香港申請國際駕駛執照，到店取車時連同入台證同護照出示，再轆一張信用卡空白單就可以拎車。空白單係以防被抄牌或超速違規，有罰款時艾維士未能向客人追收。如有罰款，一般3個月左右會以電郵或電話通知客人，再由客人決定匯款俾艾維士，或者艾維士同信用卡空白單轆 卡。如果無罰款，6個月左右空白單會唔要。租金唔難，不過車身比較多傷痕，拎車時要好小心驗，艾維士職員會0係租車單上紀錄番車身原有0既傷痕作紀錄。
戰車相
24/5
中正國際機場 -> 客運到中和市 -> 台灣匯豐銀行提款 -> 公車到台北車站行街 -> 傍晚到圓山站附近艾維士拎車 -> 晚飯於中和市 -> 夜宿中和市 motel
機場客運
今次直到中和區，坐左大有客運0既1968號車，45分鐘就到！好快！台幣$125位，平！加上唔多人坐呢條線，又早，除左司機外，架車計埋我地得3個客！
兌換台幣
以前一直都係0係台灣機場台灣銀行櫃檯換，每次金額不限，只收台幣$20手續費。但上網搵資料先發現係最貴，如果可以0係市區銀行換會仲好，出發前做資料搜 集，打電話去到台灣0既銀行分行度問過，每人每日只可以換台幣$20,000，手續費唔記得，但係會貴過0係機場入面。
又知道可以去台灣櫃員機拎台幣現金，手續費每次港幣$15-20不等，排價跟visa、mastercard或者銀聯當日0既排價(可以上網查到)。最後check到匯豐 銀行有戶口去番台灣0既匯豐銀行拎，可以完全免手續費，於是就幫襯匯豐銀行。其實匯豐銀行0係台灣0既分行唔多，不過台北車站附近有2,3間，其他區就要 碰運氣。
當日兌個rate係0.26007，無手續費，所以無影響個rate。
中和motel
當晚入住0既係君迪商旅
http://www.slvmotel.com.tw/
房間介紹：http://www.slvmotel.com.tw/room01.html
之前只係0係美國住過motel，感覺係~~好殘舊，如果有時唔係真係太累唔想開夜車，真係唔係太想去住。反而對台灣motel一直聞名已久，因為聽過好多 都好正。今次第一晚原本係book左東門站附近0既新尚旅店，台幣$2,400/晚，訂都俾左，不過因為第二日會一早起身出發去清境，住中和區可以直接上北二高，行台3線福爾摩沙高速公路。
入房唔需要落車，直接開車可以到地下2層停車場，停車場入面唔係好似平時咁大家睇到大家架車，每個停 車位都係各自有電動閘，客人需要泊車時酒店職員先會遙控開閘門。泊好車後客人只需落番電動閘，車位側邊就有升降機，可以直接上到房間，升降機入面只有上同落兩個掣，無得揀去其他樓層。
房間0既出入口都係通往停車場0既升降機，所以門一打開就直接入房間。房間入面有睡房同洗手間+浴室+桑拿房兩部份。兩部份係相同大細，浴室缸係一張king size床呎吋，可以邊浸浴邊睇電視，桑拿房最細，只可以一個入，淋浴房都唔細，不過無影相。
房間內 (借motel網站內相)
因為當晚食到成11點幾先返到，拿拿聲訓覺，第二日早起身出發。
不過肯定有機會再去台灣，一定會再住motel！當晚房租只係台幣$1,980。
25/5
中和市 -> 清境雲頂渡假山莊 -> 青青草原睇綿羊show -> 小瑞士花園 -> 好土雞擺夷料理 -> 夜宿清境雲頂渡假山莊
GPS
本身0係艾維士租0既車係唔包GPS，只包左保險，所以問台灣朋借左個GERMINGPS，外型同IPHONE無咩分別，一樣咁薄！
晨早8點鬆D就出門口，開車直飛去清境。
開左3個幾鐘左右，沿途唔多車，天氣好好！
大概11點鬆D就到雲頂渡假山莊。
http://www.top-cloud.com.tw/
經台灣親戚介紹，所以先揀，訂左頂級雙人房-A，台幣$4,000/晚，係全個旅程最貴0既一晚住宿！
http://www.top-cloud.com.tw/homestay/index.php?option=com_content&view=article&id=4:room-top2a&catid=2:2010-12-31-02-30-53&Itemid=41
房間內
呢張竹椅係正向住房間露台，可以坐0係度欣賞露台外景色。
青青草原：http://www.cingjing.gov.tw/ins.php
入場費台幣$160 (平日)、$200 (假日)
綿羊SHOW一般只會0係假日舉行兩埸，分別為上午9點半同下午2點半，入場費已包括睇綿羊SHOW。
當日我地去到青青草原時仲早，所以周圍行下。
一入就見到清境綿羊城堡，室外有一堆羊咩咩！可以買飼料餵。
草原其他範圍都有羊咩咩通山跑
1點半開始已經有人坐定定等開場，到接近2點半就坐滿晒人。
開SHOW後專心睇SHOW，所以無咩影相！
發表於 
返回列表
