少年成長

收藏本版
發帖
返回列表
跳至頁

首頁
12

尾頁
   1
lifelong


別墅

積分: 535


1#
發表於 06-12-2 09:34 |只看該作者

我好心痛，請各位媽咪俾些意見我，千萬個唔該！

囡囡今年升上一間區內女校，初初都相安無事，亦很喜歡返學。但近呢幾個星期卻非常唔開心，我習慣晚晚湊佢瞓覺時傾埋心事，佢總會如洪水缺堤一樣，狂哭了出黎，真係好心痛。

事關前一排，亞囡同我講話在班上俾其它小朋友欺負，有人專登用腳kick佢，踢佢，又用食物袋"fing"佢，"蚊"佢頭髮，我己告知佢，如遇上呢D情形，最好話俾老師聽。

亞囡又話小息時，冇老師係度，又即使講左俾老師聽，老師話完佢地，佢地之後都依然故我，好似好無奈。

跟住上星期，亞囡主動同我講，老師帶左佢去見駐校社工，於是我主動致電學校了解情況，原來因為佢係學校"meet"其它小朋友，又"渣皺"佢後面小朋友的練習簿。

於是我夜晚同佢傾心事時問佢點解要咁做，佢就話俾我知，因為佢地取笑佢，話佢唔靚，話唔同佢做朋友，又叫其它小朋友都唔好同亞囡做朋友，所以佢好憤怒，講左俾老師知，都好似無咩幫助，所以佢就用meet人同"渣皺"人地本簿"sit"憤。

首先，我當然知道就算點怒都好，都唔可以用呢D手法傷害別人身體，我解釋左俾佢聽，佢亦在學校見左社工，我亦鼓勵佢有咩唔開心可以搵社工傾。

同佢老師通過電話，佢呢幾日，係學校表現乖左，冇再meet人，但夜晚傾謁時，一樣哭得好傷心，話冇人鐘意佢，冇人同佢做朋友。昨晚甚至話佢既朋友呃佢。因為佢從另一個小朋友口中得知，呢個小朋友話同佢做朋友係呃佢，其實根本唔想同佢做朋友，佢小息係操場同小朋友玩緊時，亦會有幾個小朋友夾埋叫D同緊佢玩既小朋友唔好理佢，唔好同佢玩。

我真係好心痛，因為亞囡喊住話：我都己經乖左，冇再meet人，而且好多佢地投訴我的事，我根本都冇做過，仲有個朋友以前一直都同我玩得好地地，依家佢又呃我，好多小朋友都呃我，佢地都唔鐘意我，冇人想同我做朋友。佢真係喊得好淒涼，仲喊到要用枕頭收埋自己。

我在能力範圍己盡量解釋俾佢知，交朋友需要時間，叫佢唔好心急，而且佢乖左，小朋友慢慢慢慢會再接受返佢。但我知道佢班上係有幾個女仔挑撥其它小朋友唔好同亞囡玩，亞囡唔係太識講野，佢地又牙尖嘴利取笑亞囡，所以亞囡至會出手。

咁既情況，各位媽咪，我應該點做呢？晚晚亞囡都喊得好淒涼，仲要嚴重打繫佢自信心，除左肯同我傾下心事，係學校更加沉默。 :-( :-( :-( 我唔想佢咁唔開心，佢都似乎承受左好大壓力，就算依家俾人蝦，佢都唔敢出聲，反而仲驚如果佢出聲會俾人鬧。

各位媽咪，我能做到既只有晚晚開解佢，佢在學校，我應該如何教佢堅強面對呢？佢依家日頭強顏歡笑，卻越加沉默，夜晚在暴發出黎，狂哭，直至睡著。我好心痛丫。 :-( :-( :-( 請幫幫我。
6W1D 0.436cm; 8W1D 1.74cm
私人傳訊

Kwan


伯爵府

積分: 15685


2#
發表於 06-12-2 10:04 |只看該作者

Re: 我好心痛，請各位媽咪俾些意見我，千萬個唔該！

:-( so poor
私人傳訊

shah


伯爵府

積分: 17739

魅力王子


3#
發表於 06-12-2 10:20 |只看該作者

Re: 我好心痛，請各位媽咪俾些意見我，千萬個唔該！

lifelong
我好心痛your 囡囡 ar!! :-( :-( :-(are u think exchange other school?
because if teacher also cannt help any thing....(1)exchange other school or (2)talking with 欺負囡囡既小朋友,maybe they will scard u no 欺負囡囡

this time your daughter need your support ar!
私人傳訊

nickx2


複式洋房

積分: 329


4#
發表於 06-12-2 11:29 |只看該作者

Re: 我好心痛，請各位媽咪俾些意見我，千萬個唔該！

真係wt the heck is going on!!??
估唔到女校都會咁!!

同意shah 既講法~一係趁就黎完一個term轉校
一係就同其他同學既mami講啦~
再唔係你試下陪你囡囡一齊返學~
睇下個實況&support一下佢

We need not worryas we are no longer two, but one flesh,and God will make with the test a way out of it, so that we may be able to go through it.
私人傳訊

moondream3003


男爵府

積分: 7101


5#
發表於 06-12-2 11:35 |只看該作者

Re: 我好心痛，請各位媽咪俾些意見我，千萬個唔該！

我只可以話比你聽我個Case, 希望可以幫到你啦.

我細個都係咁, 但係我無理佢地, 我心諗無可能要全世界人都鍾意我, 我又無錯, 老師又鍾意我, 我讀書叻就得啦, 我讀書叻, 我屋企人又開心我又開心老師又對我好, 0吾使理佢地. 佢地咁無愛心, 我都0吾會同佢地做朋友.

以上只係個人經歷, 0吾好
私人傳訊

webjen


珍珠宮

積分: 45944


6#
發表於 06-12-2 11:51 |只看該作者

Re: 我好心痛，請各位媽咪俾些意見我，千萬個唔該！

lifelong
我細個都比同學蝦過, 2年級時我比同學仔偷書 & 文具都唔敢同阿媽講,好慘 :-(

我知你一定好心痛 :-|
雖然轉校係一個方法,但係處處都可能有唔喜歡自己o既人,社會就係咁,有時係避無可避,或者你可以用今次件事教囡囡面對困難
我覺得有幾樣野可以做:
- 同老師,社工傾下囡囡係學校o既情況
- 去了解成件事:係唔係"有人專登用腳kick佢，踢佢，又用食物袋"fing"佢，"蚊"佢頭髮",咁老師知唔知 & 點處理!!!囡囡又係咩情況 meet 人呢??
- 囡囡不嬲o既人際關係 & 同人相處有無問題?? 有無其他朋友仔?? 其他人對佢睇法係點? 會唔會佢有 d 野係真係令人唔鍾意佢??
- 蝦佢個d 又係咩同學仔?? 係蝦蝦霸霸o既,咁即係佢地有問題啦 !!
其實呢件事係要老師,社工一齊合作解決,詳細同佢地傾傾,應該可以解決的!!
我把平安留給你們，我將我的平安賜給你們；我所賜給你們的，不像世界所賜的一樣。你心裏不要煩亂，也不要膽怯。(若 14:27)
Happy moments, praise God. Difficult moments, seek God. Quiet moments, worship God. Painful moments, trust God. Every moment, thank God!!!
私人傳訊

JAY媽


男爵府

積分: 5993


7#
發表於 06-12-2 14:18 |只看該作者

Re: 我好心痛，請各位媽咪俾些意見我，千萬個唔該！

我會主動日日捉住個班主任傾計囉!吾係找晦氣,而係同個班主任有番d溝通,面對面傾番個小朋友既問題同感受,講真吾好諗到班主任咁精靈咁聰明咁盡責囉!家長吾找佢麻煩吾煩住佢,d老師自己又要一個人對住幾十人,邊會自願花咁多時間去關心去理會一個學生既情況同感受...

當然,老師已經搵左學校社工去跟進你囡囡既情況已經有去做過野,但係聽你咁講都係好表面囉!社工同老師呢一刻只係知道有件咁既事情發生,但係就吾係真係理解到你囡囡既痛苦同感受,你要同個老師講,呢d野吾可以治標吾治本,吾好好解決令你囡囡痛苦既根源(d小朋友蝦佢),件事只會一路咁發生,呢刻班女仔蝦你囡囡啫,好喇,到你囡囡真係頂吾順轉左校吾再讀呢間學校,咁嗰班女仔依然會蝦其他乖/林善既同學,到時老師一樣要解決番個問題,你要同個老師傾計咁傾,同埋一齊諗番d實際既方法去解決,既然班女仔鬧同話都吾驚,咪要搵d野黎罰黎等佢地收歛下囉!但最緊要係要你囡囡一定要識得搵老師講/投訴,佢吾講老師同你都幫吾到佢,呢樣我都同我個仔咁講,佢有d同學成日起飛腳踢佢又成日趁佢飲水食野嗰陣用水潑佢或者整蠱佢笑佢係白痴傻仔低能,我咪叫佢一定要即時同班主任老師講囉!千祈吾好還手同還口,因為佢有份打番人/話番人,變左係佢同埋d蝦佢同學都吾岩,兩個都有做錯,兩個都要罰!我同佢講,如果佢俾人打都吾走去同老師講,我就當吾知吾會聽佢同我講,由得佢俾人打到變豬頭我都吾會理吾會幫佢架喇!始終一黎要小朋友得到適當既保護,但亦要小朋友學懂點去處理呢d人際問題/社交,如果呢刻已經吾識得學習去處理,咁佢又點頂得順大人/社會出面嗰d人際問題/社交?呢樣野一定要佢去面對去學習,係就辛苦d,但始終為佢好.
老公VOICEMAIL 1 2 3 愛是恆久忍耐又有恩慈,愛是不嫉妒不自誇不張狂,不作害羞的事,不求自己益處,不輕易發怒,不計算人的惡,不喜歡不義,只喜歡真理,凡事包容,凡事相信,凡事盼望,凡事忍耐,愛是永不止息
私人傳訊

pandacat_bb


男爵府

積分: 7205


8#
發表於 06-12-2 14:25 |只看該作者

Re: 我好心痛，請各位媽咪俾些意見我，千萬個唔該！

其實學校老師都好有問題, 既然知道你囡囡比人蝦, 而且話完之後都唔聽, 繼續惡行, 就應該罰佢地同埋寫佢地手冊啦, 你囡囡meet人, 整縐人地本簿, 老師就帶佢去見社工, 咁成人蝦你囡囡啲同學呢? 應該要見家長啦, 佢地kick你囡囡喎, 如果kick跌咗你囡囡整傷咗, 邊個負責先, 仲有踢, 同抆頭髮呢, 全部都係傷害他人身體既行為, 點解呢啲同學唔駛比人罰

我覺得如果同班主任溝通都幫唔到, 要返學校搵主任老師先得架啦, 會唔會個班主任經驗唔夠呢

公平啲既咪集體見家長囉, 攤件事出黎講, 等啲家長返去教下自己的女啦
私人傳訊

IRON


男爵府

積分: 8513

好媽媽勳章


9#
發表於 06-12-2 21:14 |只看該作者

Re: 我好心痛，請各位媽咪俾些意見我，千萬個唔該！

明白妳既感受, 愛莫能助.......

不過, 學校就係社會既縮影, 頂得住既第時就會遇強越強, 頂唔住既就一早俾人淘汰; 作為一個媽咪, 只能將道理話佢知, 安慰與支持, 等佢知道係外邊點都好, 返黎總有愛佢既人.

學校方面, 應該同女女一齊去見老師同社工, 將開始時既情況講清楚, 或者可以請老師叫埋有份既人一齊傾清楚.
私人傳訊

EVA222


禁止訪問

積分: 81485


10#
發表於 06-12-2 21:58 |只看該作者

Re: 我好心痛，請各位媽咪俾些意見我，千萬個唔該！

提示: 作者被禁止或刪除 內容自動屏蔽
提示: 作者被禁止或刪除 內容自動屏蔽
私人傳訊

JAY媽


男爵府

積分: 5993


11#
發表於 06-12-2 22:32 |只看該作者

Re: 我好心痛，請各位媽咪俾些意見我，千萬個唔該！

都同意你講法,始終去到邊到都會遇到呢d事情同埋人,要好好觀察究竟完全係人地問題定係囡囡本身既問題令到人地咁對佢囉!要好好同囡囡分析,如果嚴重到係全班人排擠佢,你都要睇下係咪老師問題,因為以前我囝囝間幼稚園都遇到咁既情況,當然我囝囝本身都有d問題啦,但係老師吾好好去處理亦吾去處理,變相搞到成班小朋友覺得老師吾會去了解真相,佢地點屈都得,搞到最後變成個個小朋友覺得係咪都屈我個仔,d老師睇都吾睇就鬧定我個仔先覺得好過癮,到最後俾我同老公分別斷正幾次目睹d小朋友點屈我個仔之後(我地直頭即時當住老師同人地家長個面前大大聲問個小朋友究竟係自己專登扮跌屈我個仔推/打佢定係真係我個仔打佢推佢,班小朋友個個都即時笑騎騎扮傻認番係自己扮跌屈我個仔,d老師同人地家長即時吾敢望我又dup哂頭樣衰哂吾敢出聲囉!有個仲勁,即刻閃人,連自己個仔都吾要!),我至知咩事,

到個仔升小學雖則都有幾個同學好鐘意捉住我個仔黎打又踢,但係真係得嗰幾個有問題囉!其餘d同學仔(尤其係女同學)同老師甚至乎校長個個都鐘意我個仔又鐘意同我個仔玩,所以有時都好靠家長自己好好耐心地去觀察去做事,

上年鐘意打我個仔嗰幾個同學,我都有當面同班主任傾(吾係投訴,因為我吾惡,我只係當係傾計傾開咁講左一講),最後都知打我個仔嗰幾個有兩個本身同我個仔一樣係有過度活躍,老師本身都一早知道,知道其中有個過度活躍同學仔好鐘意撩到我個仔忍吾住同佢嘈交甚至打交,一分開佢地坐一頭一尾好遠,我個仔就會無事,上年d同學升左小二,我個仔今年重讀小一(佢有學障),同個過度活躍吾駛再同班,今年真係乖左好多,老師又話佢無再搞人整親人,上堂又專心,所以我都幾同意有時一d小朋友社交問題都係雙方面既...

俾心機啦!吾好咁灰喇!試下積極d諗多d方法同計仔去教去幫下囡囡啦!始終佢都仲細,一方面需要你去陪住佢安慰佢,另一方面亦需要你教佢點去處理亦點去面對.呢樣係好重要.
EVA222 寫道:
囡囡對得失看得很重,想下怎樣改善她的性格,遭人排斥總有理由.
一班應該有三十幾人,我估計攪事份子來來去去得三分一,呢類人最容易內鬨,囡囡同佢地玩得埋,可能聯手去作弄其他同學.
勸囡囡性格要主動些,放低固執還有其他同學可以做朋友,你今年幫到她,難保下年再發生,等如係大學裏,要和不同的人做組員,才會瞭解每人有不同個性,對將來出社會都有得益.
老公VOICEMAIL 1 2 3 愛是恆久忍耐又有恩慈,愛是不嫉妒不自誇不張狂,不作害羞的事,不求自己益處,不輕易發怒,不計算人的惡,不喜歡不義,只喜歡真理,凡事包容,凡事相信,凡事盼望,凡事忍耐,愛是永不止息
私人傳訊

lifelong


別墅

積分: 535


12#
發表於 06-12-3 11:12 |只看該作者

Re: 我好心痛，請各位媽咪俾些意見我，千萬個唔該！

各位媽咪，好感激你地花時間幫我分析問題及開解我。


首先，我覺得轉校暫時唔係一個最好解決方法，因為每個地方都總有人好，有人唔好，有人nice，有人惡，我覺得應該教佢去適應，去面對rather than去逃避問題。

我唔否認我個女都有問題，因為佢唔識同小朋友相處，會用好肉緊的方式表現她的喜惡，例如佢喜歡你，佢就會鐘意攬住你，無論你喜不喜歡都好，唔開心憤怒，就meet 人"sit"憤。

其實老師冇主動同我傾過呢個問題，係因為亞囡自己講左俾我聽因為佢係學校meet人所以要見社工，我主動打電話返校了解情況的。

我分別同駐校社工以及佢班主任傾過，老師話俾我聽，其實一路小朋友有爭拗，佢都覺得唔係咁大件事，話完就算，因為小朋友邊有隔夜仇，今日嘈交，聽日又可能攬頭攬頸。

佢今次帶我囡去見社工，係因為有小朋友家長打電話投訴，話我囡meet到佢囡紅左，所以佢要做返D野，向個家長交代。

我亦都同佢反應過，有幾個小朋友蝦我個囡，並玩杯葛，老師都承認佢知道，都有話過個幾個小朋友，同埋好直接同佢地講，"你地唔好一個投訴佢，就幾個都加埋投訴佢，我知有些事佢根本無做過"。老師在此件事上，都有幫我個囡，話過佢地。

但咁有如何，我記得曾有位媽咪講過，細個有個同學唔記得因咩事，個個都唔鐘意佢，結果佢媽咪打電話黎投訴話冇人同佢個囡玩，老師話佢地，結果。弄巧反掘，個個同學對佢更加反感，搞到到畢業都係冇朋友。

我同意老師，家長在適當時要介入，但同時，我亦考慮到一點就係"你改變唔到呢個世界，你唯有改變你自己"，人地既言行喜惡，我管唔到，我亦無得監人地鐘意我個囡，老師幫既亦有限，始終都係要我個囡自己去面對去解決。

我係好心痛，亞囡咁細就要去學習面對呢D野，但無論如何我都會陪佢一齊度過。反而我想知應怎樣去開解佢，令佢堅強面對比較好。

例如佢話我知，午飯時，有個小朋友好惡咁問"你做乜望住我"，我囡冇理佢繼續低頭食飯，個小朋友仲更加得寸進尺，話"你做乜唔答我丫，你咁冇禮貌，我話俾老師知架"。

我囡直情係驚左同學係又投訴，唔係又投訴，連無做過既都俾人屈，因為有幾個同學係夾埋口徑一致，佢覺得自己孤立無援，我叫佢唔使怕，如果再有同學蝦佢，佢就話俾老師知，但千祈要忍住度氣，唔好出手，如果唔係人地更加大條道理話佢錯晒。但佢又話，老師覺得投訴好煩，唔鐘意我地成日投訴"，所以我唔敢。

另外Jay媽你講得啱，佢班入邊蝦佢的小朋友之一，其中一個的而且確係過度活躍症，老師都同我坦白講佢係無時停，不停騷擾其它人，我囡話呢個小朋友特別喜歡跟住佢，整古佢，佢好驚。老師都明白，但佢希望我地俾多些愛心呢位多動症小朋友。

老師亦指出呢位過度活躍小朋友同我個囡的性格佢了解，老師話呢個過度活躍小朋友，如果你唔了解佢真係會俾佢表面呃左，佢好識講野tum人，把口long過油，例如老師叫佢唔好再搞人，要乖，佢就好可憐咁講，老師，我知架啦，我會乖架啦。但一轉頭, next miniute佢又走去蝦人。我個囡就係沉默型，咩都收埋唔敢講，但睇表面，我囡生得高大，就似蝦人o個一個，但其實虛有其表，怕事到死。

我唔怪個過度活躍小朋友，我囡在班上亦唔係冇人鐘意同佢玩，只係小朋友牆頭草，俾人扇風點風，講得兩講，就冇人敢同我囡玩，that's why亞囡前晚先喊得咁傷心，覺得俾朋友出賣，佢一路喊住問我 "點解，點解丫，之前都玩得好地地，依家又同佢地講其實根本唔想同我做朋友，之前都好好架，點解要呃我丫，點解？？？？"

我真係好心痛，好心痛，正面黎睇，係咪應該教佢咩叫俾人出賣，咩叫小圈子，咩叫杯葛，咩叫一沉百踩。

但我真係唔知應點講，才適合返佢既age，令佢明白，但又唔好令佢對人，對友情失去信心呢？

要教佢去面對，去處理才是正道，但如何去做呢？唉•••• :cry:
6W1D 0.436cm; 8W1D 1.74cm
私人傳訊

JAY媽


男爵府

積分: 5993


13#
發表於 06-12-3 14:34 |只看該作者

Re: 我好心痛，請各位媽咪俾些意見我，千萬個唔該！

[size=medium]只係小朋友牆頭草，俾人扇風點風，講得兩講，就冇人敢同我囡玩，that's why亞囡前晚先喊得咁傷心，覺得俾朋友出賣，佢一路喊住問我 "點解，點解丫，之前都玩得好地地，依家又同佢地講其實根本唔想同我做朋友，之前都好好架，點解要呃我丫，點解？？？？"---講真,呢樣野作為大人既我都未能承受得到,更何況係一個小朋友...所以呢刻我係好明白你個女既感受...真係好痛架!

過度活躍呢樣野我吾再响呢樹講喇,因為講左未必每個媽咪都會理解到,呢樣我都明白既(自己都有個過度活躍仔,又係遇着有個仲活躍過我個仔既小朋友成日蝦我個仔=.=),如果你想知你可以pm問我...

我都明白你既心情,囡囡番學同社交吾開心,做亞媽梗係吾好受...但吾開心還吾開心,始終你同囡囡都要面對亦要好正面咁去解決呢個問題,你吾可以要求個問題可以即刻完全解決到囉!始終我地都吾能夠要求人地配合番我地嘛!我個仔遇到呢類問題時,我都會叫佢避開人地同埋即時同老師講,呢d係佢既權利黎,既然嗰班蝦佢既人都吾鐘意佢,又怕咩佢地會吾鐘意佢去老師度投訴呢!如果個老師真係講到話成日投訴係好煩,我覺得係老師個問題囉!呢樣你要同老師傾,始終小朋友都係小朋友,吾係大人,佢地解決吾到自然會去搵大人求助架啦!吾可以一句話煩就吾去理,到時搞到d咩大鑊野番黎,整臭學校既聲譽係咪佢孭鑊先???

同埋我個仔同我呻d同學仔有幾衰有幾吾好時,我都會同佢講,呢個世上咩人都有,有d會斯文d,有d會活躍d,有d鐘意講野,亦有d吾鐘意講野,每個人都有吾同既性格,你有媽咪去教去鍚,所以你識得點去對人好,人地對你吾好時,你就吾好用番人地d吾好既野去對番佢地,因為你都知道人地咁樣對待朋友,朋友會好吾開心亦好傷心,所以呢d野人地做錯,我地都吾可以做錯,呢樣要佢明白,

查實真係好難要佢咁快去明白去理解人際關係/社交呢樣野,講真大人都未必搞得掂啦,唯有見招拆招,你又成日陪住佢提點住佢,亦叫佢吾好响言行同情緒方面出問題先,佢meet人一次人地會認定佢係一個吾好既女孩子,就算佢之前本身係一個幾好幾nice既人,就係meet左人地一下,人地點都只係記住佢呢一樣錯事而吾願記得佢之前有幾好,呢d都幾現實架,但真係要佢好好控制自己囉!因為做左出黎,最終吾開心既都係自己,咁樣真係好吾抵!你同佢講,呢次發生左就係發生左,我地吾好回頭望去埋怨,做好自己本份,等下年升班時寄望重新識到新一班同學,到時就要好好珍惜同面對吾同既人,當係重新開始囉!依家可以做既,就係你要支持佢信任佢,要俾佢知道,就算呢個世上個個人都誤解佢吾鐘意佢,媽咪永遠都相信佢係一個好人亦愛護佢,等佢吾會自我評價低產生自卑感.呢樣係好重要.
老公VOICEMAIL 1 2 3 愛是恆久忍耐又有恩慈,愛是不嫉妒不自誇不張狂,不作害羞的事,不求自己益處,不輕易發怒,不計算人的惡,不喜歡不義,只喜歡真理,凡事包容,凡事相信,凡事盼望,凡事忍耐,愛是永不止息
私人傳訊

BabyTing


禁止訪問

積分: 293


14#
發表於 06-12-4 17:46 |只看該作者

Re: 我好心痛，請各位媽咪俾些意見我，千萬個唔該！

提示: 作者被禁止或刪除 內容自動屏蔽
私人傳訊

BB2WONG


大宅

積分: 2837


15#
發表於 06-12-5 09:49 |只看該作者

Re: 我好心痛，請各位媽咪俾些意見我，千萬個唔該！

我覺得你個女女真係好可憐，但係我亦認為轉校唔係辦法，不過雖然話呢個世界去到那裡都會遇到壞人，但係如果慢慢教個女或者d同學，一來未必有result，二來拖得太長時間，不但會影響你阿女的信心、生活，仲會影響成績！如果唔轉校不如考慮轉班？

若果我係你，我會日日找校長、社工及班主任傾 下，我知而家既官校d老師好忙，但係總需要解決，或者你問下邊個老師你阿女最中意既，找佢幫下忙！

我大仔係私小讀書，呢樣野就比較易搞，佢一有什麼問題，我會即刻找班主任或社工或同佢最friend既老師傾下，佢地多數好快就會跟進（如小息多d巡視班房、調位、小息找阿仔傾下，什至有其他小朋友轉班）我知我阿仔最中意番學校團契，咁近來佢有什麼事我就找宗教主任或帶領團契既老師，等佢地引用聖經經文同佢解釋及抱著佢祈禱，對我阿仔黎講都好work！
另外我同佢參加校外好多activities如football、swimming、drawing，那些老師都好好人，有時我知阿仔有唔開心，我都會同d老師講，咁樣佢地又會開解下佢，阿仔就會開心番d！

你不如參加d如路德會、ymca、..近似團體搞既activities或親子活動，那些帶活動既人都係社工來的，可能對你阿女都有d幫助！

或者在學童保健時，你要求姑娘比你見醫生，寫紙轉介去見到"心理社交"，呢個唔係睇心理醫生，係教小朋友點樣去面對佢地既社交，我大仔曾在學校比人排斥，又係日日番來哭，我就同學校講之餘，亦轉介去看"心理社工"，亦有同家庭醫生講，（佢係心理專家）等佢又開解下佢，亦有同ymca既football領隊（社工）講，總之多方面找人幫忙，等阿仔唔好覺得自己有問題！過左無耐佢就無事之餘，亦學識同人相處之道！

仲知什麼方法都要試下，而且最好盡快進行，拖得太長時間對阿女只有害處無好處，而家咁多什麼焦慮證，唔好比阿女hurt到有病！希望盡快聽到你既好消息！
私人傳訊

megabee


複式洋房

積分: 242


16#
發表於 06-12-6 00:41 |只看該作者

Re: 我好心痛，請各位媽咪俾些意見我，千萬個唔該！

1. 除非情況太差, 盡量不要轉校. --> 要她明白, 逃避不是辦法, 要面對現實, 如她可以拆解問題, 就是叻女.

2. 雖然過程可能會好辛苦, 但係話俾佢知你會陪她一起解決.

3. 幫佢諗計, 逐步對每個同學埋手, 打動他們, 由最易入手的同學開始, 例如搞一些活動.....就算反應唔好都唔好氣餒. 預先有心理準備就會對逆境抵抗好d.

4. 陪阿女一齊睇"女王的教室", 俾佢知呢個世上真係有的case, 俾佢睇女主角點樣解決問題, 最重要, 現實真係殘酷0既.

我知講就易, 做會好難, 但係從我細個(小學)有人際問題, 到中學到大學一路學習, 會明白點樣改進自己先係啱, 仲有, 如果成功會好有滿足感0架.
私人傳訊

Lily


別墅

積分: 751


17#
發表於 06-12-6 00:59 |只看該作者

Re: 我好心痛，請各位媽咪俾些意見我，千萬個唔該！

不要太擔心﹐小女孩玩杯葛不會太持久﹐孩子天真活潑那有能力長期記仇﹐過一排她們忍唔住又會玩埋一齊。這期間鼓勵囡囡不要灰心﹐為自己又好為要朋友都好﹐請控制自己斯文D﹐粗魯行為要改﹐忌郁手郁腳﹐如不介意做多少少﹐叫囡囡主動邀請幾個同學回家玩﹐生日會呀﹐聖誕party之類﹐聯誼一下。

萬一囡囡做足工夫﹐老師有讚賞而同學仍不理睬﹐那就落力D讚賞囡囡﹐同學們不和妳做朋友是她們的損失﹐也請囡囡原諒同學們不友善行為。
私人傳訊

hkaman


別墅

積分: 529


18#
發表於 06-12-6 01:16 |只看該作者

Re: 我好心痛，請各位媽咪俾些意見我，千萬個唔該！

知道自己個心肝囡囡俾人蝦的確好心痛!

處理學校欺凌困難又漫長，非常同意由老師、社工及家人合作去處理，先可完全配合小朋友在不同環境的情況!

要學校協助小朋友再次融入小女生中需要時間，我覺得現在可以先同學校商量一下，如何讓小朋友多一點自我保護的方法，咁樣小朋友先可以安全地去適應學校生活!

以下是其中一個有關欺凌情況下保護自己的教材~ 可看看有否幫助! (教育城應該仲有其他教材~)


關懷校園 --- 齊創共融新天地
小朋友是可愛的!
私人傳訊

etbaby


大宅

積分: 1761


19#
發表於 06-12-6 11:34 |只看該作者

Re: 我好心痛，請各位媽咪俾些意見我，千萬個唔該！

我妹妹都試過同你囡囡一樣既情況, 我叫佢努力讀書唔好埋班人. 又唔係會同班人過人世, 可以再識過d好朋友. 俾其他課外活動俾佢, 等佢識多d人知道呢個世界唔係人人都唔鍾意佢.

結果佢真係好努力讀書, 果年攞全班第一. 下學期開始本來針對佢既同學開始同佢玩番, 仲成日問佢功課.

你可以試下
私人傳訊

lifelong


別墅

積分: 535


20#
發表於 06-12-7 14:20 |只看該作者

Re: 我好心痛，請各位媽咪俾些意見我，千萬個唔該！

各位媽咪，

真係好多謝你地的建議和鼓勵。最近我因工司事忙，少左上BK。今日一上，見到咁多鼓勵的留言，真的很感動。

我覺得各位媽咪的建議都很值得參考。囡囡爸爸亦諗了唔少方法希望幫囡囡再和其它同學重建關係。例如回校派聖誔卡，派書籤和準備邀請幾個小朋友回家玩。

呢兩日，我問過囡囡，佢話派左聖誔卡後，情況好左，之前挑撥其他小朋友唔好同佢玩的小朋友都有同佢玩並多謝佢的聖誔卡。

我覺得很開心。無論點都好，我都會陪住囡囡，鼓勵囡囡。亦希望和佢班主任保持緊密聯繫。其實我同佢爸爸都己做最壞打算，萬一用左呢幾招情況都無好到，我地先會考慮轉校。

但當然，轉校 is only our last resort, 未到最壞，我地都會陪佢一齊面對和解決。

最後，真的好多謝各位媽咪的幫忙，令我感覺人間有情，真的很感動。多謝大家！
6W1D 0.436cm; 8W1D 1.74cm
私人傳訊


首頁
12

尾頁

跳至頁
返回列表
回覆
發帖
Presslogic Logo
Baby Kingdom Logo
聯絡管理員 廣告查詢 使用條款 免責聲明 使用意見

Copyright © 2025 Baby-Kingdom.com Limited. | Privacy Policy