自由講場今日: 3268|主題: 1342194

收藏本版

發帖

返回列表

跳至頁

查看: 254 | 回覆: 0

曾蔭權烏鴉口 [複製鏈接]

車厘子媽媽

複式洋房

積分: 248

1^#

發表於 07-2-7 16:59 |只看該作者

曾蔭權烏鴉口

我會收好我把口

政治係妥協既藝術，但唔代表人民容忍言行不一、兩面三刀既政客。煲呔宣布參選後，公開講就話唔排除 2012 年有普選，點知閉門同民建聯一家親，就話 2032 年都好難。煲呔見人講人話、見鬼講鬼話，大家睇佢既政綱時，真係唔好咁認真。佢兩年前已經用策發會呃左港人，而家又搞政制遊花園綠皮書，如果相信煲呔會同北京反映港人意願，完全係一廂情願。

環保團體指閉門變臉
政客一講真話就得人驚，煲呔閂埋門同民建聯圍威喂，除左恐嚇市民 2032 年都冇普選，仲死撐香港空氣唔差，只係 D 環保團體唱衰香港、渲染食物安全恐慌，傳媒驗菜前，就將 D 菜先浸過山埃水。八方以為老董就興話人地唱衰香港，原來煲呔都係呢亭人！好彩八方有「針」，呢 D 「鬼話」先有機會曝光，可以畀市民睇到煲呔落區派傳單背後既真面目。煲呔噚日去見自由黨，唔知有冇先派人做檢查， check 清楚自由黨總部有冇收埋針孔攝錄機、偷聽器，確保自己同自由黨既檯底交易唔會曝光。
煲呔對住保皇黨發 UP 風，明明個天灰色多過藍色，竟然擘大眼講大話，仲衰到屈 D 綠色團體唱衰香港，地球之友同綠色和平噚日都忍唔住寸番煲呔，指佢一閉門就變臉，如果香港空氣真係咁好，就唔使搞藍天行動啦，真係自打嘴巴。至於驗毒菜，就算唔認同人地既化驗方法，都唔好咁刻薄話人地浸過山埃水先驗丫！政府把關做得好，傳媒做乜要屈你先。莫非煲呔夠膽話大陸輸港 D 食物百分百安全？

被封「聖誕權」唔知衰
煲呔亂 UP 早有前科，好似 97 年咁，佢隨口亂 UP 話「金融風暴響聖誕節之前就完結」，結果多左個「聖誕權」既花朵；但最經典都係 01 年電視台同佢做訪問，講到北京成功申奧及中國入世，佢擦鞋叻唔切衝口而出話「香港想窮都幾難。」畀佢把烏鴉口一講，跟住果兩年香港就衰到貼地。兩年前老董腳痛落台，執到寶既煲呔就懶招積吹口哨，樣衰到爆。所謂舉頭三尺有神明，人在做、天在看，八方奉勸煲呔，唔好開門扮開明、閉門就張牙舞爪，咪一朝得志，就語無倫次先得架。

曾蔭權烏鴉口語錄
事件：去年底北上述職
曾蔭權回應：「今日香港經濟是 20 年來最好。」

事件：北京成功申辦奧運
曾蔭權回應：「今趟香港想窮都幾難了！」

事件： 97 年金融風暴爆發
曾蔭權回應：「金融風暴響聖誕節之前就完結。」

前日閉門見民建聯 … …
• 回應傳媒驗毒菜事件「直情係浸過山埃先拎去驗。」
• 回應空氣污染問題「（環保團體）將問題複雜化同醜化到不得了。」
• 回應普選問題「如果以兩制對抗一國，唔好話 2012 ， 2022 同 2032 都搞唔掂。」

李八方