多謝姊妹們對本人"誰的孽"(近日發佈於夫婦情感討論區)的錯愛和支持！
(sorry唔識在手机copy link)
無言感激！
今次再度講故，希望大家再次捧場。以下故事乃本人在美國讀大學時從書友處聽來，現在以文字演譯，內容3分真實7分乃個人創作。本人講故(寫故)除手痕之外，主要目的純粹與愛聽故的姊妹們分享一下個人劣作。
故事的真確性有時並不是最重要，重要的是故事有人性、有血有淚，能觸動人心(希望做到啦……)。
劣筆隨意發揮內容或有膠、錯漏、破綻甚至反拗成份，完美主義者或要求高的朋友請多多包涵、高擡貴手、勿見笑之。
善意批評及賜教無任歡迎，大力支持對本人更是鼓舞！
閑話少講，開波！
一、
八十年代中至未期，香港出現一股前所未有嘅逃亡潮。事頭婆(英女皇)照顧開，稍有少少錢又遇到移民黃金機會嘅香港人，又點會將家眷財產押曬落小平同志果句"五十年不變"嘅口頭承諾之上呢？
阿寧阿靜兩姊妹一家，同阿天阿朗兩兄弟嘅一家，呢兩戶香港小康，正正就係屋企有少少錢，喺時局不穩嘅波瀾裡頭，抆車邊當上移民潮中嘅弄潮兒。
人在異地，同聲同氣好自然集結起埋一齊。半途出家移民外國或者讀番書者，往往始終"能"住條黃皮根、繫住顆家鄉心。青年男女要揾朋友或對象，十居其九都會揾番自己友。兩對香港土生土長，本來各不相識嘅男女，各自繞行半個地球，相遇、相知、相戀……
兩姊妹遇上兩兄弟，唔知係月老引線、還是丘彼特放箭，總之就係郎情妾意、情投意合，造就姻緣路上兩對神仙眷侶。
兄配姊、弟配妹，寧天同靜朗兩對佳偶喺異地普出戀曲。青春永遠最強最無敵，佢地四個，有努力奮發嘅氣魄動力，各人因應自己所長喺大學努力苦讀;同時間奢侈咁傾注感情，四年間各人修成正果，賺得一幀令前途發光嘅沙紙、同埋令人生完滿嘅侶伴……
如果呢個係一個童話世界，故事到此應該可以劃上句號。偏偏天意弄人，沐浴於無憂同幸福嘅四個青年男女，從來冇預計到，前面有浪急風高嘅崎嶇旅途，要考驗佢地素來平坦暢順嘅人生。
(待續……)
老虎囡2010年2月10日於嘉諾撒出世喇, 早過預產11日~ 重6.71磅
發表於 
再加大量家務
所以睇得好慢……不過我會喺夜闌人靜嘅時候繼續支持你！
正呀！
加油呀！
返回列表
