問佢點解會咁，佢話屋企咁啱無南乳咪落腐乳囉，但見d色水唔似，咪落d茄汁溝下佢咁囉！次次知道我要包餃子食就話要黎學，仲要我一定要等埋佢黎先開始包，好啦！示範左成粒鐘，佢都仲係包唔到，捉手捉腳黎教點包，都係一住野咁扁晒，我惟有叫佢算把啦！我包就得，佢又唔肯，次次蹝我起碼三分一既材料，佢包完又唔攞返佢包果d返去食喎，次次都係攞走我包果d返屋企喎！
有次我包緊糭，佢啱黎到，我心諗死梗，點知佢真係話等佢黎包，我係咁話唔洗，佢又發火話唔俾佢試下，又點識呢？ok，咁又由頭教佢點包啦！佢包左十幾廿隻，無一隻個樣係完整既，做乜都求其，札條糭繩都係甩甩fing fing既，最後吼佢去廁所，火速同我媽兩個拆番晒佢果d出黎，再火速咁包過，好啦，到要烚糭時，佢又話唔洗係我度烚，俾佢攞番屋企自己烚，一來話費事等咁耐，二來話費事蹝我地煤氣費喎
，但第日佢打電話黎鬧我話點解d糭咁硬唔淋唔熟咁既，我話你話要自己攞返去烚丫嘛，我點知點解你烚唔熟呀？我話左俾你聽要烚起碼2個鐘架啦！佢話我烚左半個鐘架啦！煮飯都熟啦！洗2粒鐘架咩？你買d料唔靚呀？所以我地家人好怕要教佢煮野，佢煮左唔好食一定賴我地，又好怕去佢屋企食飯，我妹話次次都無餸食唔飽返黎，但佢開口叫我地去食，唔去又唔得，惟有每次去都一定斬料帶上去話加餸，叫佢唔洗咁辛苦煮咁多
最經典係有次聖誕前話煮餐勁既請我地去佢屋企食，我地想推話唔得閒，佢又話係咪嫌我煮唔好食呀！惟有話唔係，得得得，幾兄弟姊妹一定到，跟住果晚一入屋就聞到好臭既酸餿味，我地幾姊妹周圍睇都唔知係邊度黎，問亞姨，佢話無呀！唔覺呀！邊有臭呀！好啦！到開飯，亞姨就攞出佢由下晝2點幾已煮好既餸出黎，我地一食係凍既，妹唔識野，話咦點解d餸凍既，亞姨就黑面話，我由晏晝整到依家架啦！咁多餸唔早d煮邊有得食呀！又得我一個人煮，又點又點……下删1千字，ok，我做醜人話唔緊要，攞去微波爐叮下咪得囉！然後主角出場，我姨係個煲度碟臭到不得了既餸出黎，仲話係佢精心泡制既餸，特登煮俾我地食咁話喎，嘩！聞到都想嘔，仲點食呀！佢話好臭咩！無野呀！南乳煮齋丫嘛，係咁味架啦！我話亞姨，你落左d咩去煮呀？佢話加左d荀囉，我話荀都無理由咁臭架，佢又黑面話你地唔鐘意食果碟野就算啦，又話人臭又話盛，下删1千字。好不容易食完飯，仲叫我地飲糖水，兩位表弟妹已經望住我地，咁惟有排隊咁攞個碗去個煲度每人一d黎試啦！大家你推我讓之下，我做左第1個犧牲者，好似拍戲咁成村人睇住我食左1啖先，我馬上吐都吐唔切出黎，我都未食過紅豆沙係酸既，果種咸咸酸酸既味，真係一世難忘，我即刻話亞姨d紅豆沙酸既，亞姨話無理由架喎，我用壓力煲煲架噃，又無加過咩野，點會酸呀？我話係酸左呀！表弟話係咩？我話係呀！唔信？你試下啦！表弟個樣即刻好堅定咁話，唔洗，我信任你，你話係就係架啦！我係咁叫佢試下食，佢死都話唔洗試
發表於 
巳經睇住食譜學，但永遠都唔係嗰樣餸
返回列表
