親子旅遊今日: 1|主題: 161861

收藏本版

發帖

返回列表

跳至頁

查看: 3015 | 回覆: 39

[星馬] 分享5D4N 新加坡+Legoland之旅 [複製鏈接]

pillowcarol

大宅

積分: 3444

1^#

發表於 14-8-28 16:24 |只看該作者 |正序瀏覽 |打印

終於完左今次旅程，好多野安排得唔係太好，都分享下，比大家一個借鏡，希望令大家旅程更順利

我地8月23號搭虎航，下午3點幾落機，由於冇係香港唱錢，去到當地機場先唱左1000蚊港幣，兌換率6.29, 跟住我地搭地鐵去左牛車水諗住再兌錢，但唔識去邊換，唯有係唐城坊唱，兌換率都係6.29, 跟住去天宇買門票，買完都5點幾6點，再搭的士返酒店，我地第一，二日係hard rock住，安頓好晒，諗住食晚餐再去夜間動物園，點知阻滯就開始了，我地唔知有乜好食，行左幾個字先去到馬來西亞食街，叫左幾樣野，5.5至6.5sgd一樣食物，水要2.8sgd一支，但我2個小朋友唔岩食，食完野都已8點幾，去夜間動物園既計劃泡湯，唯有係附近睇下有咩買啦，原來附近有間屈記，d水2蚊2支咋，我地之前買水已買左8.4sgd好貴呀，最蠢既係明明酒店有免費水，偏偏出門口就冇攞，搞到要係出面捱貴水

。
第二日8點幾小朋友就起左身，見未夠鐘去uss, 我地就去左酒店泳池游早水，人好少，好舒服，玩左個幾鐘，跟住沖涼換衫去m記食早餐，價錢大概係HK既double, 起碼小朋友肯食先，跟手再進軍USS, 人唔係好多，但我對小朋友好細膽，我地第一樣玩Transformer, 太刺激，嚇親左2小，跟住睇史力加4d, 都係驚，連坐馬達加斯加既船仔阿女都驚，總之佢地乜都唔敢玩咁滯，好彩人唔多，冇買快證都好快排到隊，比起HK既主題公園，我地玩得舒服好多。玩到3點幾4點我地就出返去食野，諗住夜晚再去夜間動物園，今餐去左間日式餐廳食，每個set都十幾蚊，埋單都6x sgd食物一般，唔多，好慢，真心覺得唔抵。可能聖淘沙d野真係相對貴好多。夜晚6點幾出vivo city諗住搭大巴去night safari, 但搵唔到個站，唯有打的，但十分不幸地超多人等車，排左半個鐘有多先上到的士，d司機仲要揀客，唉…有錢都未必上到的士，到上到車去到都8點幾9點，足足2個幾鐘，早知聖淘沙直接打的去好過，之後排隊等上tram睇野，等左半個鐘左右，好黑，睇到既唔多，但小朋友都睇得開心，睇完就又等的士走，好嘥時間，返到酒店都10點幾11點，不過總算完成左要去既旅程。

第三日，大家都好攰，但都係8，9點起身出門口，去左食早餐，再去S.E.A，我2個小朋友同我家大爺都睇得好開心，我地book左12點半車去legoland所以11點半左右就走返去酒店check out喇，酒店包既ticket我地冇用到Adventure Cove Waterpark, 時間太唔夠用了，想去新加坡其他地方都去唔到。

包左阿寶車去legoland, 行快道 100sgd, 好順，好快就去到，到legoland後因未有房，行李先存酒店，跟住我地就搭的士叫司機帶我地唱錢再去hello kitty town, 先上左thomas果層，阿仔阿女玩得好開心，玩左好多機動遊戲，跟住落一層見到bob the builder同佢太太, 但我d小朋友唔夠膽同佢地影相，再去hello kitty果層見到xo, 佢同阿仔玩，阿仔勁驚

，跟住去做手工，但整完時間已5點半，唔夠整其他野，走左返酒店睇書先知原來有得玩搽指甲油，阿女成個旅程都想搽，但偏偏有既地方我就搵唔到比佢

，出到黎，就發現阿仔發燒

，我家大爺就狂鬧我，又話我唔帶衫又盛，頂，勁嬲，又問我而家咁去邊呀，佢出發前原全冇理過行程，有問題又淨係識鬧，好彩我個人林善，搞左1輪，都係返左酒店先，攞完房，出去隔離個mall搵食，我地去左間墨西哥餐廳，食pizza, pasta,食物ok, 價錢相比起我係聖淘沙時平好多，1餐100蚊馬幣有找，超抵，之後去左附近既shop睇下有咩買。返酒店後，大爺又問我咁聽日點，我唯有上網睇同係bk求救問有咩地方有supermarket啦

，好彩都有d頭緒，知道有aeon, 第3晚小朋友8點幾9點就上床瞓了。
第四日，先入Waterpark, 玩得好開心，玩左2，3個鐘左右，因我2小細膽，所有滑梯都唔敢玩，所以都係純玩水為主，連好大果座水城都唔敢入，好快玩完佢地想玩既野，可以入theme park, 人好少，可能係平日既關係，所有野都唔洗排隊咁滯，排既都係幾個，好正，可以玩好多野，超開心，玩到收園先走，跟手又去搵食，去到aeon個 shopping centre好大，我地都係揀食西式，好似叫vivo restaurant, 食物都ok，好過我地係聖淘沙既野好多，價錢都係120馬幣左右，食完買左少少手信就走，因商場真係好凍，係新山比起新加坡時凍d, 商場冷氣都好大，要帶多件衫。
終於到第五日，食完早餐飲park玩多陣，都係冇人，個幾鐘都玩到好多野同行左1個圈，11點半又包車返機場，都係好順好快，司機好好人，係新山，錢用得比聖淘沙時少好多，幾日都係洗1千港幣都唔洗，淨返既錢我地係機場買手信。

總括黎講，有得揀就唔好係聖淘沙食野，貴，唔好食。

玩方面，一日一行程會比較適合，動物園較遠，要預多少少時間去，我今次實左編排得太趕。

榴槤我淨係係aeon supermarket買，18蚊馬幣一盒，我揀左D24, 好正，全家得我一個食，冇得買多幾盒試。

全程連機票酒店洗左HKD27000左右，期待下次用少d錢可食得玩得更多啦